بسم الله الرحمن الرحيم في السلك • المصريين جروا (واطي ) • لكن كلام اول مابتحول • زعلنا من اولاد بمبه شديد • وده ما الموضوع • الموضوع اننا استطعنا ان نستضيف هذه المباراه بنجاح علي جميع الاصعده • كانت لدينا بعض السلبيات ولكن العتره بتصلح المشي • والكمال لله وحده • القلعه الحمراء شرفتنا • ولما اقول شرفتنا بقصد كلنا كسودانيين • صفوه واهله ومورداب وشتي الانتماءات • حتي الغير رياضيين تشرفوا • والحال السمح بعجب • مافينا زول بنكر دور الوالي في اعدة تأهيل الاستاد • ملعب ابراج مقصوره طابق تاني • سته سنوات من العمل المتواصل والصرف الخرافي • شكرا جمال علي هذا الجمال • ولكن ليييييييه يكون عندنا استاد واحد يستقبل مثل تلك الفعاليات ! • مفروض يكونوا كتااااار • اناشد وبشده جمال • وبقول ليهو ياجمااااااااااااااال • عليييييييييك الله تبني المدينه الرياضيه ودق صدرك • خلي البلد تتشرف باستاد تااااني • وبالمناسبه جمال خدم الوطن عبر بوابة المريخ • ولا غرابه ان خدم الوطن مباشرة دون الولوج عبر اي بوابه • والمدينه الرياضيه ياوالي كانت مكافأه من الانقاذ للرياضيين بمناسبه تتويج الزعيم بمانديلا • اعلن المكافأه الشهيد الزبير محمد صالح بمطار الخرطوم عند وصول البعثه الظافره بالكاس • وقال نحنا قررنا نكافئ الرياضيين بمناسبه احراز المريخ للكأس بمدينه رياضيه • يبقي ياجمال المريخ كأن السبب المباشر في قرار انشاء المدينه الرياضيه • وعليه لاغرابه لو اكمل رئيس المريخ انشاءات المدينه الرياضيه • علييييييييييييك الله ياجمال • البلد تحتاج للمدينه الرياضيه • فكر وقرر ونحن في الانتظار • واحد مصري بعد اتغلبوا قال لي الاستاد ضيق مو ش زي الاستادات عندنا في مصر • قلت ليهو انت تسكت خاااالص , ده استاد بتاع فريق , انتوا في مصر منو من الفرق العندو استاد ملك وسلك وفي السلك ؟ • قال لي الانديه عندكو بتمتلك استادات ؟ • قلت ليهو بالحيل , نحن فرق درجه تانيه عندها استادات خاصه بها , ودنوباوي , التحرير , وفرق كتيره مورده هلال • سكت • انشاء الله ياربي كاس العالم القادم تكون في مباراه فاصله بين البرازيل والارجنتين واختاروا السودان مسرحا لها • طبعا بكون فريق السودان القومي تأهل لكأس العالم من بدري وراجي يا البرازيل يا الارجنتين • ايجابيات كثيره خرجنا بها من استقبال المباراه • وايضا هناك سلبيات بسيطه ستعالج انشاء الله • وسنعود للموضوع بالتفصيل • لكن الواضح اننا محتاجين لطابق تالت ومحتاجين لمطاااار عشان الناس تاني من الطياره للمقصوره • انسب مكان للمطاااارهو الملعب الرديف • ونحول الملعب الرديف شمال شارع العرضه جوار كشك بيع تذاكر المباريات الدوليه والفاصله • المنازل حول الاستاد رائعه وجميله ويمكن ان تتحول لفنادق صغيره تستقبل الضيوف • يعني بدل فندق كبيييييير خمسه نجوم نعمل فنادق صغار • كل فندق نجمه • ونجمه نجمه الليل نعدوا • تاااااني بقول ليك المدينه الرياضيه ياجمال • بالمناسبه هناك جنود مجهولين كان لهم القدح المعلي في اخراج اليوم بتلك الروعه • ناس منتدي الجماهير • وناس البوهيه • وناس النجيله المخططه • زي حمار الوادي • نجيلة الوادي • طربت • وعمال الاستاد • والناس البتدخل الاستاد الساعه سبعه صباحا و تعمل وتطلع منو تاني يوم الساعه حداشر عشان تعود اربعه وتواصل العمل • والناس الصوروا المباراه لكل القنوات • ناس الشروق • كل من ساهم في ذلك اليوم سنذكره بالتفصيل ونشكره شكرا جميل • لهم علينا حق ان نعرفهم ونشكرهم ونصفق لهم وندين لهم بما انجزوا لخاطرنا • شكرا لهم جميعا سلك كهربا الحتانه زاااااته محتاجه فنادق يا جمال , روادها كتروا والي لقاء