يعني أرحل وانتَ عارف يا (مُدلّل) غأير رحيلك مافي حل لو بتفهم ... خلي عندك مرة دم ما اكتفينا من الألم وراح الفرح أصبح عدم وعشنا أحزانك مسلسل وتهنا في الأيام بنسأل : ربي هل من عوْدة هل؟ .. لو بتفهم ..... قبُل باكر تفوت ترحل يلاّ روح .. يلاّك تعجّل والرحيل بالسُترة أسهل لينا أحسن .. وليكا أرحم لو بتفهم ... يلاّ أرحل ... قبلي ما تنهار وتندم أو كمان بالقوة تُرغم يلاّ أرحل .. عشنا في الدينا وجحيما وإنتَ ترفُل في نعيما فوق ضهورنا الديْن مردّم ولو بتفهم ... من عميرك باقي كم شان ليكا نقول (نعم )؟ وإنتَ سرطان في بلدنا هَم بياكل في جسدنا وفي العصب ساكن تمرحل وانتَ جالس في قصورك والحرام عندك مُحلّل يلاّ أرحل .. يلاّ أرحل .. ولو بتفهم ... ما بي تغِدر بىْ بنات العم وتعرس في الحريم أجمل ونحنا خلاص قِرفنا معاك تِعبنا من الكذب وإياك ومهما تطول سنين حُكمك ويَحفّك كم ملاك يبراك مصيرك نحنا عارفنو هناك (لاهاي) يمين راجياك وعنأك بالسنين تسأل يلا أرجل .. فوتنا أرحل .. صََبرنا كتير ومنتظرين صبرنا كتير وعشنا سنين حصادنا حروب لهيب الدم أريتك إنت بس تفهم .. لو بتفهم ... تفوتنا وتمشي بس ترحل كفاية الشُفنا من الذُل ياما أُم فقدت دليلا وياما أب مسكين ترمّل وياما .. ياما .. ياما لو بتفهم ... في الدروب مات العشم والجنوب حسرة إنفصل ماتو بالآلاف وكم أمشي في (دارفور) وأسال قبلي ما تغادرنا ترحل .. وقبلي ما تغادرنا ترحل ولو صحيح انك بتفهم حقو تعلم ... ياما ردّد شعب أعزل : يلاّ أرحل .. يلاّ أرحل فوت اليوم قبل تندم أريتك بس عديل تفهم ونحنا البى الرغيف نحلم نشرب في الخَبوْب والطين ورويان إنتَ من ( زمزم) أريتك إنتَ بس تعلم : حتى الجوع ... هراها ضلوع أكلَن مافي ليهو طعم سنين مأساتنا تِتكلّم : يبكي شافع ما إنفطم حليب أُمو البقالو عدم شمس حردانة ما تطلع وحتى النيل يمين برطم لو بتفهم .. يلاّ أرحل .. يلاّ أرحل ولو في مرة بس تخجل تمشي براك تفوت ترحل عشان واقعنا يتغير وحياتنا بلاك تصير أجمل يلاّ أرحل .. يلاّ أرحل .. ولو بتفهم ... يلاّ أرحل سوق معاك كل الرمم لو بتفهم ... أصلو مخك جد (مسكّر) وباقي عقلك نصو عسكر كيف عليك بالله تفهم ؟؟ لارؤية عندك لا فِكِر لا إرادة بتنتصر وفيك غبا راسخ مَغلغل يلاّ أرحل .. يلاّ أرحل .. سبناكي يا بلد السجم وهاجرنا لى دار العجم لا سِعِدنا هناكْ ولا حال إنعدل يلاّ أرحل .. يلاّ أرحل لو بتفهم ... في بلدنا الموت حصل لا في طالب جد نَضَم ولاصحافي يقول بِغِم والبلد صابَ المَحَل والمهازل يا بطل بقيت عنتر.. بقيت أرجل مآسي علينا تِتِلملم وإنتَ رئيسنا ما بتفهم وداير ليك نقولاَ (نعم) وحاتك عمرو ما يحصل ونحنا الفيك فقدنا أمل يلاّ أرحل لو بتفهم يلاّ أرحل الموت يصارع في الأهل وكلُ زول راجي الأجل يلاّ أرحل ... يلاّ أرحل .. فينا طبّقتَ الشريعة وعشنا اسلامك خديعة وحتى ربك وحدو يعلم لو بتفهم ... الشريعة .. وما الشريعة لينا كانت جد فجيعة في بلد معدوم وجيعا والفساد بالكوم مردّم اقتصاد مرضان مهلهل وكلُ زول فقران ومُعدم لو بتفهم ... يلاّ أرحل .. يلاّ أرحل .. شعب قاعد في الصقيعة وفقدت الأيام ربيعا والعُمر شلناهو هَم لو بتفهم ... البلد عاشت قطيعة وساءت الأوضاع مريعة وإنتَ في (كافور) ُمنعّم لو بتفهم يلاّ أرحل يلاّ أرحل .. كلمة قُلناها ومشينا والبيحصل ما علينا ياما بُكرة تشيل وتندم لو بتفهم ... يلاّ أرجل ..وفوتنا أرحل لينا أسهل .. وليكا أرحم لو بتفهم ... أريتك مرة بس تفهم . خضر عطا المنان