بسم الله الرحمن الرحيم في السلك الحوثيون 8/1000 عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. *جنينتنا الاتكلمت عنها امس *عجبت الشفوت شديد *وقالوا فعلا ثمرها حلو المذاق ومبالغه *واصروا انو نحتكر تلك الجنينه *ونركز علي فواكهنا منها *جنينه جابت بلح المدينه *عيبها لي *واليومين دي الموضه المنقه بالشطه *يعني ممكن تقطع المنقه من امها قبل تنجض *وتاكلها بالشطه *اطهر ومحمد عبدالرحمن المنقه الخضراء *اقطع يا والي *الشطه في *اقطع يا معلم *والبتنجض في امها برضو جيبها *نزار وسيمبو خلهن يا كردنه *اقرع الواقفات *نزار لو داير يجدد كان وقع علي العقد الاتعرض عليهو قبل مدة *جيبهم يا والي *المنقه الخضراء بالشطه بتتاكل *والنجيضه بتتقطع وتتاكل *والقديمه شويه بتتخلط *اسي مساوي ده ماشفتوهوا بتخلط كيف !!!!! *بوتاكو زاتو بتخلط *ناس الميرغني خلطوهو عمل بلنت *الحكم كالعادة صهين *غايتو يا جيمي لو مشيت جمب الجنينه *بسألوك *الجناينيه كتااار *بقولوا ليك *منقه خضراء بالشطه *ولا منقه اكل *ولا منقه خلط *قول ليهم كرتونه مشكل *جيبها لينا *نشيل الدايرنو ونجدع الباقي *المهم *الزعيم شرف البلد وشرف البلد *ماقابل مرافعين ساكت *قابل فرق قويه *اسود *وتأهل بشرف *امامنا الترجي *وسنفتح باب سويقه براحه *مفتاحنا اسمو العقرب *شكلو زي العقرب *تدخلو في اي باب *بفتح طوالي *والتوانسه دائما عمق دفاعاتهم تقال شديد *والعقرب بتحب التقله *بي بكري بس سنتخطي الترجي *وحايقابل الجماعه هناك *في الكونفدراليه *باقي قريب مازيمبي وفيتا قالوا زيهم *ود عمهم عاد *ومابقصر *ايها الناس *مفروض الترجي يندب حظه الذي رماه في طريق المريخ البطل *ما نحنا البنخاف من الترجي *مدربنا زينه *وجمهورنا شفت *وبكرينا مدينه *واولادنا نار *البخوفنا من الترجي شنو !!! *الترجي بعرف ناسو *يقابلهم هناك *في الجعرانيه يا ود البلال *ايها الناس *انتو حجر الاساس ده من ختوهوا ما اشتغل *ماشغال مالو ؟؟؟ *يكونوا ختوا حجر بطاريه قايلنو حجر اساس ؟؟؟؟ *الزول ده يا استاذ هاشم ما يكسر *الزول ده قولوا ليهو لو داير تبني ابني محل فاضي *استاد المورده الكسيرة الياها *استفيدوا من تجارب الآخرين *ايها الناس *استغربت لما سمعت كلام عضو مجلس قال *تكلفة الجوهره كلها اندفعت *كان البتكلم مجنون *مفروض البستمع يكون عاقل *المشاريع الزي دي ما بتندفع تكاليفها كامله *بندفع جزء *وبتحول الباقي بحسب صرفيات الانتاج والانجاز *بتمرحل حسب الشغل *يبقي لو قالوا ليك التكلفة اندفعت كلها *يكونوا غشوك وجهجهوك *الخريف جاي والمكسر بدوب *والحفر بتتملي قعونج *موش كفاية الجقور *كمان جابت ليها قعونج !!!! *ايها الناس *هدفنا للمرحله القادمه هو تخطي الترجي بسهوله *وبعدها كالعاده بنبقي راس مجموعه *اصلو الفريق المسجل في لوح الشرف الافريقي *ببقي راس مجموعه *مازي ناس قريعتي راحت *وهزيمة الفرق التونسيه عادي عندنا *هزمنا البنزرت بهدفي سانتو واقصيناه *فعدنا بمانديلا *هزمنا النجم الساحلي بالقلعه *واجبرنا الشوالي علي تمني نهاية المباراه بتونس *هزمنا الترجي زاتو بهدفي سامي وجمال ابو عنجه *ايام الترجي ترجي *وكان فيهو طارق دياب *عادي نهزم التوانسه *وزي ماقلت ليكم *التوانسه تقال في قلب الدفاع *قريب ده منتخبنا موش غلب تونس تلاته *علاء طيارة سريع *جهجهم *لكن ما اسرع من بكري المدينه *موسي الزومه جاب فيهم قون من بره الخط *وباليمين كمان *وموسي الزومه ما اشوت من كوفي *قصة نغلبهم دي مؤكده *فقط نصر عليها لتتحقق *شامي لي ريحة مطار *بتعرف ريحة المطار يا محمد عبد الماجد ! *شميتها متين ؟؟؟ *ريحة المطار لو بتتوصف كان وصفتها ليك *لكن ما بتتوصف *بس بحاول اوصفها ليك * المطار يا محمد عبدالماجد *ريحتو مطار مطار *المهم *استاذنا بابكر يحي *الشفت ود الفتيحاب *تواردت خواطرنا في الجفلن خلهن *والشفت مصر شديد *سنتأهل علي حساب الترجي *ايها الناس *علمتني امي *وقالت لي *يا جناي *ما تطلع رجولتك بمبه وتشحد الرجال بالليل جمب الطلمبه *وحظك يكون كعب وتشوفك لمبه *قلت ليها انا ولدك يمه بلا سنكيت بلا لمه *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *انواع الضرائب اختلطت علينا *كل المسميات ماقلنا شئ مشينا *بس اتلخبطنا يا والينا *في القيمه المضافه *هل هي المضافه ام المضاعفه ؟؟؟؟ سلك كهربا ننساك كيف والقيمه المضافه للجيوب نضافه والي لقاء سلك