بسم الله الرحمن الرحيم في السلك *اليوم تقابل صقور الجديان سيراليون افريقيا *المجموعه صعبه *ويمكن خصمنا اليوم هو اقل منتخبات المجموعه خطورة علينا *برغم ان لهم محترفين كتاااااار *ومستعدين شديييييييييييد *وبرغم اننا كالعاده *نعتمد في اعدادنا علي اعداد المريخ والهلال *نسأل الله ان تكون تونس فال خير للصقور *فالقمه استعدت هناك *وثمار اعداد القمه يجنيه الصقور *ايها الناس *علوق الشدة هو ديدن الاعداد للمنتخب *ومجاهدات اسامه عطا المنان *هي مخرج المنتخب من مطبات الفلس الكتيره *والاتحاد قاعد *والوزارة قاعده *بل والمنتخب منتخب دوله *والله العظيم منتخب دوله *دولة تهز وترز *وفيها حكومه *حكومه هزازه ورزازه ومنتخبه *المنتخب منتخب دولة حكومتها منتخبه *آي والله *فقط نسأل الله ان تفوز الخرمجه علي المنهجيه *ان تتخطي العشوائيه والقصور اعداد الخصم الجاد *ان يفوز الصقور *وبعدها ما حايكون في الف حديث *لان الحال المايل سيستمر *ونعود لعلوق الشدة اعدادا لمجابهجة اعتي المنتخبات *نحنا كمان بنخاف *نلقط الاولاد قبل اسبوع من اي مواجهة *ولو كانت ضد المنتخب البرازيلي زاتو *الغريب شنو *كورتنا لازم تشبهنا *وطالما بنركب ستاير العيد بعد يذيعوا العيد *وبنفتح الخيران بعد المطر يطمبجنا *وبنذاكر بعد يعلقوا جدول الامتحان *يبقي نلملم المنتخب قبل الكورة بيوم *مافي شئ غريب *الخريف يفاجئنا *رمضان يفاجئنا *العيد يفاجئنا *بل يوم تلتين رمضان ما بننضف الا يذيعوا العيد *بعد الناس تفطر يوم تلتين رمضان *في ناس يقولوا ليك العيد ذاعوهوا ؟؟؟ *اصلنا كده *ولن يتغير حالنا ما لم نغير حالنا *ياخ نحنا تكون عندنا مواعيد الساعه سبعه *نتحرك عليها الساعه سبعه ونص *ياخ العريس بمشي الحلاق يوم العرس الساعه سبعه مساء *ومواعيد العروس في الكوفير الساعه سته ونص *ياخ نحنا فينا ناس *صلاة الجمعه دي *يقوموا علي الوضوء لما يسمعوا الاقامه *لا بنقرب بقره *ولا بنحرص علي الصفوف الاماميه *اصلنا كده *ياخ نحنا شافعنا (يتبول ) في السرير *بنقلب ليهو المرتبه يبول في السايد التاني *اصلنا كده *ياخ نحنا بنوقف العلاج قبل يكمل كورس الحبوب *اصلنا كده *ونحزن اذا خسرنا *شئ غريب جدا *لكل مجتهد نصيب *مادايرين نجتهد *ودايرين كل النصيب *ايها الناس *مانبقي زي الدوله *ونتخلي عن المنتخب *تعالوا لتتعاليهتافاتنا لمنتخبنا *اذا الدولة نطت منو *نركز نحنا *نسوي العلينا *نساند منتخبنا *بشده *ونجد العذر لاولادنا ان اخفقوا لا قدر الله *اما مازدا *فوالله مدرب غيرو ما يشتغل في ظروف زي دي ابدا *له التحيه *الراجل مضحي شديد *بس المطلوب منو *ان يبعد من محاولة الزج به في قصة محاربه اخطر واشهر مهاجم سوداني *بكري بن عقرب *بكرينا *لانو لو في نصر *بالتأكيد بجي من بكري بعد مجهودات اخوانه *الليله اللون واحد *علم البلد *والبلد بلد البنت والولد *هكذا علمونا *وهكذا كانت *وهكذا يجب ان تكون *ايها الناس *كلنا صوب الاستاد *لتنطلق من حناجرنا ثلاثة نقاط لمنتخبنا *وبعدها يحلها الف حلال *ايها الناس *يفترض ان يكون الحبيب المنتظر قد رجع البلد *وقصة نجاح من فشل معسكر تونس دي بنرجع ليها *جماعة يحقدون من باب ينتقدون *لا بعجبهم العجب *ولا الصيام في رمضان زاتو خليهو رجب *المهم *كنت اعرف مدي انتشار الانتباههه *ولكني ما كنت اعرف ان انتشارها مدهش لهذه الدرجه *بطاطير تلفوناتنا بنملاها في اليوم مرتين *ردا علي الاستفسارات *واقفين مالكم *وبعضهم تمني عدم تكرار الوقفه *ورمضان جايينا *والبحب رمضان وبعرف قيمتو *بتمني ان لا ينتهي هذا الشهر العظيم *ونهاية الشهر العظيم هي يوم الوقفه *في ناس بتمنوا الوقفه ماتجي *عشان يكتروا من الاستغفار والعبادات وينعموا بالرحمه *احد الظرفاء قال لي واقفين مالكم ؟؟؟؟ *قلت ليهو الوقفه بتجيب العيد *قال لي *الله لا جاب الوقفه وحرمنا من بركات رمضان *والله لا جاب الوقفه وحرمنا من الانتباهه *شكرا قراء الانتباهه علي سؤالكم عنها *وشكرا لكم لانكم اقنعتمونا بانكم ملايين لا مئات الآلاف كما كنا نعتقد *ومدد *المهم *الجمهور عليه الحضور باكرا اليوم *منتخبنا ينادينا والاهمال لا يقاوينا *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *السحاب اتلملم وساكت بعاين لينا *ونحنا يا والينا *ماعاملين شئ غير نعاين بي عينينا *وكان صبت المطيره لينا في عينينا *عينينا مافيها خيران تصرفها لينا *ونرجع لي مفاجئة الخريف لينا *ويادوبك استلمنا الولايه يومين لينا *سلفنا ما سلمنا الخيران مجهزه لينا *وغرفة طواري تتعمل لينا *والضبان والباعوض في رمضان كتار علينا *يبقي يا والينا *من اسي *عديل كده احفر لينا *متعودين نحنا علي الحفر يا والينا *احفروا لينا سلك كهربا ننساك كيف وكان حفروا لينا ووووب , وكان ما حفروا لينا بنغرق والي لقاء سلك عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
