عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. 1- مسدار سوداني متعدد أنا بعشق السودان بي كل سحناته بي كل لهجاته وبي الهنا الفيهو وبي كل معاناته وجمال حكاياته 2- مسدار أغانيينا أنا بعشق السودان غنواته تطربنا وتفرح الوجدان 3- مسدار أم درمان أنا يا بلد ظمان لموية المقرن ولي قبة المهدي وحضارة أم درمان 4- مسدار التاريخ أنا ديمة بتشرف وبمجد التاريخ آثارنا فيها دوام سوداني متجسد في حضارة الإنسان ماضينا كان والآن كل الجمال باقي في سنجة واريافهه تاريخها كان تاريخ بز الإنس والجان ممتدي من بدري من غابر الأزمان 5- مسدار تعدد الأديان هنا عندنا المسجد وفي حارة تانية كنيس هنا قبة شامخة لفوق وهناك صليب قسيس وهناك تعاوزينا ودفوف وزار وكجور وطقوس عروس وعريس 6- مسدار العاب الصبيان أطفالنا والقمرة لاعبين شليل وين راح أو كم دوام في الخط ومتين يدخلوا الميس طالعين مع البياح ساكين حمار إبليس 7- مسدارملوك الفونج أنا من ملوك الفونج والسلطنة الزرقاء ناس سنجة ناس مكوار بستلهم القدوة والصبر وأكل النار هم ساسة الدنيا وهم قادة الثوار حكموا البلد باللين وتسامح القوة وتواضع العلماء البررة والأخيار واللقمة والكسوة وتحالف الحكماء والعزة والخوة 8- مسدار الخرطوم أنا فيك يالخرطوم شايف منارات خير من ذكرى شيخ الناس الفارس أبو جنزير 9- مسدار شموخ دارفور أنا من شموخ دارفور شايف منارات علم وخلاوي ضاوية بنور تقابة القران بقاري فارسنا وزراعي حارسنا وزعيمنا ود تور شين الناصروا المهدي في الحكم وأمر الدين أنا بستحي ونادم لمن أشوف دارفور في قتال وسفك دماء صبيان بتتشرد وإذلال رجال ونساء وينه المروءة ووين جودية الحكماء أتواروا قادتنا وتحكموا الجهلاء أنا لم أزل طامح في تشاور الفرقاء لحوار حقيقي يقود لي عودة اللحمة لي بلدنا في دار فور وأنا من ملوك دارفور بستلهم القدوة في حكاوي من بدري سارت بها الركبان كل من يجيهم طاش يلقوه بالخوة ويدوه عز وحنان يتحزمولو دوام في الضلما بالفروة هم قادة المحمل العزة فيهم يوت والقوة والنخوة 10- مسدار كردفان وفي كردفان الخير الخيرة للعالم كان برة كان جوة والنجدة محرية والفزعة مرجوة 11- مسدار الباوقة وأحبابنا في الباوقة هم في الفؤاد جوة هم أكرمو ضيوفهم عبد الله بن السرح وصحابتو الأعراب العلمونا الدين وبقينا بي الإسلام أهل العلم وللين 12- مسدار كسلا أنا في فؤادي حنين لي كسلا والقلزم لي زفة الحجاج البرعي والماحي بي مدحهم نسلم أنا ديمة بتحزم وبي همة بتلزم جواي شوق عارم لحلاة مياه توتيل وأعلم الدنيا ومن دقنة أتعلم قومية السودان والذود عنه دوام ودفاع في شان الله عن كل أراضي النيل الغابة والصحراء ودخننا والقنديل 13- مسدار هتاف أنا السودان وأهتف أنا السودان وأقول بملء الفم بفديك يا بلدي بي كل غالي نفيس بي الروح والمال وقبله الدم 14- مسدار الإستقلال يا اهلنا يلا خلاص بي همة نتحدى نستلهم العبرة من مشهد الوحدة يوم الجدود وقفوا في صف متين واحد يوم أعلنوا استقلال كل البلد بقرار أسعد جميع الناس العمة والخالة والوالدة والوالد الأزهري ومحجوب رفعوا العلم عالي في يوم عظيم خالد واجبنا نحنا جميع لازم نصون نيلنا وهشابنا وانعامنا بي زيادة الإنتاج وتوحد الموقف والله ما بنحتاج هو وطننا متعدد أعراق ودين ولسان لكنه متوحد بالعزة والخوة وسلامة الوجدان لازم شعارنا يكون أنا عاشقنك أنت دوام يا وطننا يالسودان
د. عماد الدين بشير آدم المحامي الرياض- المملكة العربية السعودية
