قال لا فُض فوه "او فض" ان (السريحه) هم بالمعني سبب البلاوي ، وحملهم سعادته مسئولية التلاعب باوزان الخبز . بالله ده كلام ده ؟؟ انا ما عندي تفسير غير انو في بعض المسئولين بسطلوا ويجوا يستلموا المايك قدام الناس ، لا انا الحقيقه ما قلتا يسطلوا .. قلتا يصلحوا الهد ، والراس ده انا قاصد التصليح الحلال ، عشان واحد فهموا ما يمش بعيد ويجي يسوينا في سين وجيم .. وبكرر .. انا قاصد ظبط ووزن راس بالحلال .. شايفين كيف !! يله وصلنا وين ؟؟ وصلنا ان السريحه هم سبب البلاوي اول ياربي هو بيقصد ياتو سريحه ؟؟ الشئ التاني ياتو سريحه ياسعادتو وانا (والله العظيم) بعد مغرب الليلي حسبتا الناس (الانت عايز ترجعم شباك المخبز عشان السريحه تبطل تلعب في الحاجه دي) والله حسبتا الواقفين في الشباك اكتر من اربعين نفر (اربعوون نفر لا غير) لا بل غير .. لانهم حقيقه اكثر من اربعين ، وبعد كدي في مناديب كافتريات وكده بي عجلات واقفين بالجمبات . ايي والله ويجي الراجل ده (سامحه الله"او لا") يقول السريحه هم السبب السبب في شنو ؟؟ والسريحه ياتا ؟؟ ايوه .. يكون في سريحه من النوع الكبير ونحنا علي نياتنا .. يمكن .. عااادي يكون في سريحه بدرجة وزير .. وفي حجم وزارات وكده .. هو التماسيح انواع واحجام وكده مش ؟ هسي ناس سوق العمله ديل صحي تماسيح لكن تماسيح بتكل لحمها .. عااادي مرات (يتخموا) ويترموا في السجن زيهم وزي ايي سمكه صغيره .. اهه دي تماسيح لحمها مستساغ .. لكن يكون في تماسيح لحمها لا يوكل ولا يتبلع وليس في المستطاع السيطره عليها .. اهه زي دي يجوا الجماعه يرموا بلاويهم فوق السريحه وما عارف شنو . ونحن بدورنا نسال .. علي محمود بتاع الماليه وديل .. في زول بيقدر يشم ريحة اللحم بتاعم ؟؟ لا .. لا .. انا قاصد ريحة لحم قدرهم .. بس .. ما قاصد حاجه (نقطه) أل سريحه آال . عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
