رسالة موجعه وصلتني من أحد أهالي الفتيحاب أمدرمان ما حأقدر أعلق عليها .. أقروها وشوفو الصور براكم .. —————————————– ود قلبا .. جمعتك مباركة ورمضان كريم يا اخوي الليلة جاي احكي ليك وجع كتم علي نفسنا .. المهم اخش ليك في التفاصيل طواااالي نحن ساكنين (الفتيحاب) مع البحر وركز مع البحر دي اهلنا جموعية فتيحاب .. اقدم ناس وحي في امدرمان استقبلو المهدي في (شجرة الحضرة) عشان يفتح الخرطوم ده عشان السرد التاريخي ما حصل في يوم شكينا من شئ اسمو (موية) وهي ابسط حقوقنا .. المهم لينا فترة زادت علي الشهرين ما شفنا الموية .. اااااي ما شفنا موية ونحن الجنب البحر .. بجي فنطاز الموية الما معروف جايب مويتو من وين .. ولا معروف كان شايل شنو قبل الموية .. المهم ماف زول شغال بيننا .. ولا مسؤول ولا زول جانا قال لينا موتو عطش ماف .. رمضان اهو علي الابواب .. كهرباء ماف .. أما الموية أخير الكهرباء بتجي وتقطع .. مويه نهااااائي ماف .. والله الا ارسل ليك صورها .. ده كوم .. والقاصدو ليك كوم تاني .. نحن بندفع حق الموية مقدم ولا علي كيف الجاب اهالينا .. بقلعو مننا حق الموية ونحن عطشانين .. وشيوخ الفتاوي .. الشئ ده هل عاااادي بحللوه ؟؟؟ بلقو ليه حل شرعي تحت ياتو بند ؟؟؟ ماف زول شغال بي وجعنا .. اتظاهرنا ونحن الفي وش امدرمان ولا حياة لمن تنادي طبعا ما حكيت ليك عن الاراضي الفي الشريط النيلي الاتباعت وهي ورثات جدا" عن جد .. يا ريت توري الناس خلي القضية دي كل الناس تعرفها وتشوف .. امدرمان عطشااااااانة الفتيحاب عدمانة الموية نهااااااااائي وبتاع كارو الموية يتجدع فيك بالسعر العلى مزاجو .. ويجيب الموية في الوقت العلى مزاجو —— محمد احمد ود قلبا