أكاد اشك في الخواجات ،وإنهم اشتغلوا علي فيروس أنفلونزا الطيور وفيروس أنفلونزا الخنازير وفيروس جنون البقر لخبطوهم مع بعض وأنتجوا فيروس جديد وطوروهو لحدي ما بقي فيروس جنون الشعوب .يشبه في مراحله الأوليوباء الكوليرا الفرق بينه وبين الكوليرا في الكوليرا المصاب يكورك (الشعب يردد دخول الحمام )،أما فيروس المظاهرات فالمصاب يكورك (الشعب يردد إسقاط النظام )،فيروس المظاهرات او مرض متلازمة جنون الشعوب ،فيروس سريع الانتشار ،العائل له الفيسبوك ،يلتقطه الإنسان سريعا جدا ،فترة الحضانة من أربعة وعشرين ساعة الي عشرة أيام ،أعراضه المصاب يطير عيونو ثم يعضعض شلاليفو وحكة بفروة الرأس ،هلاويس بتغير النظام ،المصاب تغلبوا القعدة عند أهلوا وفي بطن بيتو يكوس للسهلة يشيل بطانيتو ويمشي يرقد هناك ويشوف ويتواري ليهو الرئيس حق البلد بتاعتو قدامو ويقعد يكورك فيهو (شتت ،شتت ،شتت )ينتقل الفيروس بواسطة الانترنت او بواسطة الموبايل او بواسطة قناة الجزيرة او بالخشم يصيب الفيروس كل الأعمار من عمر يوم الي تمانين سنة نسبة الوفيات تتراوح بين خمسة من عشرة في المية ،الي خمسة بالمية تعتمد زيادة الوفيات علي سرعة العلاج وطريقة العلاج تزيد عند محاولة العلاج بالكي وتقل عند استعمال المكمدات الباردة المسكنات ما ينتفع معاهو المسكنات زى قطع الانترنت التشويش علي قناة الجزيرة قطع شبكة اتصالات الموبايل مقاوم للحرارة والرصاص والبنبان يمكنه التحوصل والبقاء بالتربة لمدة خمسين سنة ينشط عند زيادة الأسعار وتفشي الفساد المالي والإداري والبطالة والخبيرات التحت تحت عن ثراء الرئيس وأقارب الرئيس او أي زول عندو سلطة حتي او كان رئيس لجنة في حي صغيروني لمقاومة الوباء لابد من وضع الاحتياطات اللازمة زي محاربة الفساد ،توفير الوظائف ،الحكومة تقعد في بطن الواطا دي وتراجع نفسها وعلاقتها بشعبها وتخلي أمور التلاتة ورقات البتسوي فيها دي ،ترجع القريشات من ناسها الشالوها ايديه وحمرة عين وقالو حقتهم تخلي شغل دا زولنا نديهو زنحميهو ونوديهو لي قدام ودا ما عندنا بيهو شغلة نخليهو في سجمو ورمادو ونسجمو ونرمدو اكتر (ويا عاجبلكم الزول السجمان و الماعندو شيء يخاف عليهو وشقيان ،والحياة والموت عندو واااااااحد )علاج الفيروس والوباء اولها استقالة الحكومة ججججججججت ،محاكمة الفاسدين والمفسدين من اصغر رويس لأكبر رأس كل شي أتشال من غير وجع حق يرجع في بكانو الاتشال منو ،من اهم نتائج المترتبة علي انتشار وباء مرض فيروس جنونالشعوب ،انو الناس بتقعد في الشارع طواااالي ودايرين مظاهرات طواااااااالي ،وتغلبهم القعدة في البيت ،حسي عاينو انتشار الوباء في تونس ومصر سوا شنو ؟بعد ما مساكين مبارك وبن علي شتتو ،لي حسي الناس في السهلة وكل يوم والتاني دايرين يكوركو ويظاهرو ،وحالفين علا يحكوها لمن تجيب الدم ،الخبر الكعب انو الفيروس دا ما عندو لا لقاح ولا مصل تب !ولا بتنفع معاهو لا حجبات لا كواديك غايتو الله يكفينا شرو ! قفل الباب :- الأعادي ، يتسلون بتطويع السكاكين ، وتطبيع الميادين ، وتقطيع بلادي نقلا عن صحيفة التيار بتاريخ :21/2/2011م