عبدالرحمن غزالى* [email protected] مقدمة : انها حكاية لاطفال الزمن القادم الذى سيجد هذا السودان الشاسع الغنى بالتنوع الذى فشلت النخبة فى ادارته بحكمة وموضوعية وواقعية قد تمزق الى اشلاء جهوية مبعثرة لا يجمعها رابط سوى العداء المتبادل والمرارات المتراكمة والغبن من فعل الاقصاء والانفراد بتقرير مصير بلد وشعب متنوع الاعراق والثقافات والاديان . واتمنى ان تكون حكايتى محض خيال وان لاتتحول الى واقع لان المعطيات فى الساحة الان تنذر بذلك واتمنى ان يبقى السودان الذى نعرفه وورثناه من الاجداد موحد بوعى والان الى تفاصيل الحكاية : - كان يا ما كان يا اطفال يا حلوين زمان بلد كبير اسمه السودان كان جنوب شرق وغرب وسط وشمال جاها يوم غول بدقن كبيرة كبيرة راكب دبابة ولابس ميرى طرد السادة وعمل بيوت اشباح وشرد للصالح العام نص الناس الفاهمين والعارفين التفاصيل وجاب مكانم ناس بدقون وشلوخ وشرد كمان عمال رزق اليوم جاع الاطفال الحلوين شربوا الشاى بالبلح وجاتم امراض اول هم ما بيعرفوا الالف من الواو الدكر ما الزمن داك المدارس بقت بى قروش الما عندوا قرش ما يقراء خربت ديك الدنيا الكان فيها بعض الحاجات الكانت حلوة قامت حرب لا والله حروب جنوب شرق وغرب ما الغول وجماعتوا كرسوا للجهوية والقبلية والعصبية والعنصرية وكنكش فى الكرسى الهزازبالبندقية وبالسكين بالتكفير بالتخوين وبكل الاشكال وخفف شوية من وجع الراس الفى دارفور وشرق السودان والفى جبال النوبة والانقسنا بالتخدير ما باالكى البيعالج سبب وجع الراس لانوا ما ناوى يسيب الكرسى الهزاز وما يدى مساحة فيهوا لواحد تحرق دار فور وكمان شرق السودان وجبال النوبة والانقسنا وكردفان وغيرم بس يقعد الكرسى الهزاز ما شاخت افكار السادة الاتولدت شايخة وقاعد تتخبط وما عايزين تجديد قبل كان كومين كبار الغول وجماعتوا بعثروا الكومين لى كيمان هشة واتوهط فى الكرسى الهزاز واخد راحتوا وعارف انو الكيمان لابتهش ولا بتنش وفكر يقطع جنوبا من شمالا ما جنوبا دى كان ديما رافض للجهوية والمحسوبية وديما قايل لا قام مشى مشاكوس وما شاور حد يا اطفال تعرفوا وين مشاكوس دى فى بلد اسمه كينيا وفى نيفاشا ودى كمان فى كينيا قطع الجنوب وما شاور حد وفى يوم من اول السنة بعد نيفاشا بسته سنين قال الناس فى الكان جنوب باباى يا بلد كان اسمه السودان باباى يا عنصرية ياجهوية يا محسوبية باباى يا ظلم نحن شعب حر فى افريقيا الحرة بلد جديد ودى يا اطفال كان فى زمن الجنرال ابودقن المطلوب للمحكمة الدولية القالت قتل الناس فى دارفور ومحاول يبيد الكل كان ما لحقنا كان حايكون زى ما حصل فى جبال النوبة والانقسنا والكان جنوب وغابت شمس السودان وشرقت فى الايام التانية خمسة بلاد راح الغرب تعرفوا وين الغر ب دى كان جمهورية دارفور الكبرى ودولة كردفان الحسى وبعدين راح الشرق تعرفوا وين الشرق دى كان دولة البجه الان .....................................................................! تعرفوا يااولادى السودان دى كان من اقدم دول العالم كانت فيهو حضارة عظيمة من كوش ومروى ونبته وعلوة اتعلم منا الناس كتير من الحاجات من سته الاف سنة وشوية حضارة ملوك النوبة وكوش فى الانجيل مذكورة طبعا تعرفوا ما الانجيل وكان فيها ملوك عظام اشهر من فيهم بعانخى وتهراقا حكموا لمصر وسمعت بيهم كل الدنيا كانت ليهم هيبة ومذكورين فى التاريخ بالعظمة وحاول دى الجنرال وجماعتوا يدرسوا الطلبة تاريخ غير سيرة العظماء من كوش لعلوة وحاول يطمس معالم الناس وقال شلوخك هويتك دقنك حمايتك كان ما عندك ديل امشى جنوب او دارفور او للبجة فى الشرق او كردفان وجنوبها ديك الدول النحنا عملنها للقال لا وللرطانة وللمسيح وللكفار كفار قال هم عندهم القال ليهم لا كافر والضرب البندق كافر والقال انا مظلوم كافر والقال جعان كافر والعايز يغنى للحرية كافر والوقعت الطرحة وانكشف راسها كافرة فاجرة تلموا عليها اجلدوها فى قلب الشارع كيف مايكون فى الراس فى المناطق الحساسة مايهم واضحك وخلى العالم يتفرج فى اليوتوب والفيس بوك والتلفزيونات ع العدل وتقويم الاخلاق بالسوط وتصحيح القيم الما سمحة ...........................................! وهما العمل اهوال يشيب منها الراس طاهر معصوم والنهب المال العام طاهر معصوم مكافاة ترقية لمنصب اعلى عملوا قروش وكروش من عرق الناس التكدح ...........................................................! فىديك الايام قامت هبات فى بلد اسمه تونس وركب رئيسهم بساط الريح خروج من غير عودة للكرسى الهزاز وفى مصر القريبة قام الشعب وقال كفاية للمفسدين وفى داك الكان اسمه السودان قام شباب الجامعة وثار وقال كفاية عايزين حرية الاسعار مولعة نار وما لقوا سند ضربوهم ومات كم واحد والساسة الشاخت افكارم بيحاوروا فى الجنرال وجماعتوا قالوا ع الاجندة الوطنية والباين غير ذلك ممكن عشان يوسع ليهم شوية فى الكرسى الهزاز وباين بشروط الجنرال قال ليهم تقعدوا فى الكنب البرا وانا فى الهزاز وشكلهم راضين امكن متفاهمين ما مافى خلاف افكار الخلاف على الكرسى الهزاز والناس ما راضية والشباب بيغلى يفور وممكن يتجاوز ديل الساسة الشاخت افكارم واقفة فى محطة الخمسينات ويعمل ثورة تغير للواقع الشين والفهم السايد من ما فات الانقليز تغير تهز عرش الطاغوت والمتفاهمين معاهو وينتج فكر جديد يستوعب كل الناس ويرجع تانى السودان يتوحد احسن من ما كان بدل الكيمان الهشة ويبقى الكل سودانين سوا فى كل حاجة هويتم سودانية ما شلوخم هويتم سودانية تديهم الحق ما دقونم ويهتف فيهم كل واحد انا سودانى دنقلاوى جعلى شلكاوى نوباوى دنكاوى شايقى حمرى هدندوى قمزاوى شكرى فوراوى حسانى رباطابى ميدوبى مسلاتى فلاتىزنداوى بقارى محسى عصارة موية النيل والطمى انا الابنوس المخلوط بالنخيل والدوم وبالتبلدى والدليب ان سودانى بصرخ لا للجهوية لا للعنصرية البغيضة وابواقها النشاز انا سودانى وسجل يا تاريخ انا سودانى متوتدة جذورى فى ارض جدى كوش ولد حام ولد نوح وجدنا كوش ولد حام ما ولد سام ويااطفال بكره نكمل الحكاية وكلكم صلوا على النبى المختار وانشاء الله بكرة القاكم تامين ولامين وسالمين . --------------------- * طرابلس / ليبيا 9/2/2011 نشر بتاريخ 02-10-2011
