أيها الشعب الطيب المتساهل ، لمدة 23 سنة ملطوش و مغشوش ، نرجوكم التضامن مع بنية قوش المكشوش. وبما إنه يا شعبنا المسامح ومسالم وصائم ديمة, متحمل كل المعاناة بأنواعها على مر كل السنين الفاتت والجاية! لذلك نرجوك كمل جميلك وإتضامن مع البنية دي في ال 8 يوم الما أكلت فيها يا حليها، تمااانية يوم وآآ شري عليها، لا جبنة لا زيتون ، ولا كبدة لا بيض عيون ولا بيرقر ولا كستليتة ، ولا فراخ ولا ضلع ولا سمك, ولا سلطات بالطحينة، و لا المكسرات وشيتا تاني إسمو كتر( بضم التاء) زي(المانجنيز) كتييير فينا ما بخبروا,و لا( كورن فليكس) ده برضو شفعنا كتاااار ما شافوه!وكمان لا تحليات ولا فواكة ولا مربات ولا جغمت عصائر ولا اي نوع من الببسي كولات! مع إنه كلو راااقد شيء معلبات وشيء معبأ بالباقت في التلاجات والفريزرات!! وآآ شري عليك والله تقطعي المصارين! لكن يا جماعة بي إرادتها وكامل قواها حرمت نفسها من النعيم الفوق ده عنوة , إنتو يا شعبنا الحنين يعني فيها شنو كان الوجبة الوحيدة ويتيمة دي خليتوها!!ما فيكم زول حا يموت ،ولا حا يموت لو فط ليه فد صحين بي موية بوش !!( موية مش فول ) ولا كان فطيتوا ليكم يوم سخينة بي حبة ملحة زي فاقد السوائل!! عليكم الله صوموا صلحة وسترة على قول أهلنا الكبار, إنتو ما بتجيكم عوجة تب, متعودييين على كرب البطون و جوعكم ما زي جوع الباهوات ولا زي جوع اولادهم الهشين ومرطبين وعلى الشقاوة ماهم متعودين!! يا بنية كل زول ما برضى في ابوه, ولا بنلومك ونحن مانا عارفين عمرك كم؟ولا لايمنك تب في حردتك دي! لكن اسرتك التانية الفيها العاقل والكبير وعارفين البير وغطاها وعارفين عمائل الغول ابوك( قوش) اللهط كيمان القروش ولهط المعدوم في سوق الخرتوم!! أسألي اهلك ديل كلهم من طرف ! من أمك زوجة المجرم الكبير وختير لي أخوه الخايف عليه لي القبيلة كلها بي رأس القايدة زاتوأبوك قوش! أسأليهم هل في يوم فكرتوا في الشعب المطحون ده؟ هل حسيتوا بي معاناة اليتامى والأرامل؟ هل شفتوا عذاب بيوت الأشباح؟ لوما عارفين هل فكرتوا يوم و سألتوا قوش ده ليه بعذب الناس في بيوت الأشباح؟ وليه جهاز الأمن مقطع الناس النفس والهواء حق الله ده!! هل سألتوه من إنتهاك حقوق الغير وإنتهاك الحرمات وتعذيب الأبرياء من مواطنين وموظفين لي طلبة الجامعات !! حقكم حاااار ناار وبحرق في الحشا وحق الناس التانية ما مهم!؟البموت يموت والبمرض يمرض والمعذب ولا إتسجن ظلم وتسلط. منهم من جن وطفش بالبلود،ديل برضو ما بهموكم ؟ ناس مسجونة بالشهور والسنين ، ظلم وغدر وجور !! نساء وشباب زي الورد حرقتوا حشا أهلهم، وحرقتوا جلدهم بي موية النار وكويتوهم بالمكواة زي كأنه جلودهم دي ما جلود بني آدميين ولا هم معتبرنهم بشر زيكم !!! اما قوش مش كتر خير الحكومة السمحت ليه بي مستشفى الجهاز؟ قطع شك خدمات سبعة نجوم!! بعد ده كلو ماكم رضيانين؟ دايرين يودوه ليكم مستشفي القلب التخصصي؟؟والله سبحان الله , ناس مرضانة بالسنين وفي الشوارع قدام المستشفيات مجدعين ، يتوسلوا ويتسولوا العلاج من ناس الحكومة , المخزنين القروش برة لي مصالحهم الخاصة ومصالح اسرهم واولادهم ! يوم واحد قلبكم لا حن لا رق عليهم ولا على غيرهم من المسجونين من عامة الشعب الجريمتهم فقط الإحتجاج على ظلمكم وجبروتكم وعلى جرائمكم التي لا تحصى ولا تعد!!! ولسه السجون مستفة من نساء لي رجال و شباب من الجنسين!! كلهم محبوسين ظلم واهلهم حفوا من المطالبة بي شوفتهم ولا حياة لمن تنادي! شوفوا وجربوا يا جبابرة جربوا الضيم ولو لحين,وجربوا لوجع والمر والخوف . والذل والعذاب وسهر الليالي على جنا الحشا. ده غير القتلتوه وحرمتوا وليداته من حضن الأب , وياما زوجات إترملن بسبب عمائلكم وتسلطكم!! دحين يا بنية قوش كلمي اهلك ديل وأسالي ابوك من الظلم الزرعوا في البلد في الزمن الفات ده كلو ، أكيد مصيروا يحصد عمايلوا من دعوات الغلابة اضعاف أضعاف !! وبعد الحصل ليه ولسه حا يحصل ، لا إتذكر المظلومين ولا خاف من رب العالمين !! ولسه السجون مكتظة بالأبرياء , من الغلابة المطحونين, أختنا جليلة خميس ' عيدين إتنين خلف القضبان محرومة من اسرتها وحارمين اسرتها منها, مسكينة لا ذنب لها ولا حولة ولا قوة لها وغيرها كتير وكتير من الإتشردوا والطفشوا خلوا ليكم البلد كلها..!! بلد قوانينها مقلوبة. حرامي وقاتل ابرياء حر وطليق ينعم بكل الخيرات!و يأمر وينهي ,وعنده هيئة مكونة من 100 محامي !!! وبعد ده يتدلع في الحكومة والناس وبي بجاحة وبرا خجلة !! وناس مظلومة خلف القضبان وعدمانين القرش و محامي واحد فكر فيهم مافي ؟؟ الواجعني المحامين الدرسوا القانون وعرفوا الظلم كيف و وين !! هل مقتنعين إنه دفاعهم ده صاح؟ وكمان متبرعين؟؟ تدافعوا عن مجرم يا ما إترملت نساء بسببه وياما أتيتمت اطفال بسببه, وياما إتحرق حشا امهات بسببه!!! حتى لو فرضنا دفع ليكم مال قارون ، هل ضماائركم مرتاحة ومقتنعين إنكم تدافعوا عن المجرمين وتتركوا الأبرياء!!!؟ والله البلد إنتهت بي قيمها ومبادئها , ناس صامتة و الفساد والظلم يقدل وسطهم مفتول العضلات ! عيانا بيانا, زول واحد بحتج مافي! اللهم إلا من رحم ربي!!! طبعا مع إضراب الطبقة الحاكمة عن الطعام والشراب, حتى ولو كان فرد واحد زي البنية دي! بكون عمل خسارة كبيرة جدا في مبيعات البلد من خبز ( رغيف ) ومشروبات وغيرها ,طبعا بكون في مخبز ومصنع مشروبات ومطاعم فاخرة خاصة بالبنية دي! اصلوا الجماعة ديل ملقطين رزقهم من النوعية دي! و(كوش) الأحياء المميزة تحمد سيدها بتكون جاتها اعداد مهوووولة من الأطعمة المستوردة الفاسدة التمت 8 يوم مافي زول اكلها, وبالتالي هنيئا لي كدائس كافوري بالوجبات الدسمة , وأكيد الكدائس احسن من سكان البيوت ، قلوبها رحيمة وبترحم معاها كدائس الهامش و السكن العشوائي, تضامنا معاها لأنها 23 سنة محرومة من بقايا الأكل المميز ده والكان زمان مجدع في كل كوش البلد! سبحان الله مغير الأحوال من حال إلي حال !! غايتو لو ناس الحكومة ديل عندهم عقول بتفكر, يفترض قوش ده يكون ليهم عبرة, ويفتحوا عينهم ويتعظوا والجاي أعظم ! دحين فتحن عويناتكن يا حريم باقي العصابة.. وحسبي الله ونعم الوكيل عليكم جميعا ...... متاوقة يا جماعة أنواع الأكل الكتبناها فوق دي من قائمة طعام المتسلطين دي أسماء أكلات حقيقية ما خيالية ولاأفلام كرتون !!! المهم هسه يا بنية قوش لو الناس دايرة تضامن معاك تعمل شنو ؟ والله إلا يصوموا يومين ويفطروا تالت يوم بي موية فول .... يمهل ولا يهمل [email protected]
