حركة قرفنا حركة مقاومة لا عنفية .. تقاوم الظلم والقهر البمارسو المؤنمر الوطنى الفاشي عليك انتا وعلى كل السودانيين. تقاوم العنصرية والقبلية البعملوها ناس الحكومة لى مصالحهم. تقاوم فساد ناس الحكومة الخلاهم يقومو عمارات بقروش الشعب. تقاوم إهمال الحكومة للتعليم والصحة وتقاوم هوسها بالحروب والدمار. قرفنا من سياستهم الظالمة واتفقنا انو لازم نسقط المؤتمر الوطنى عشان نرجع بلدنا السرقوها حركة قرفنا هي حركة لا مركزية. يعنى مافى قيادة لى زول. وده اصطلاح بيعرف بالحركات عديمة القيادة في حركات المقاومة السلمية اللاعنفية زي حركة قرفنا بيكون في مجموعات عمل أو خلايا.. بتكون مكونة من الأصحاب والقرايب عشان يعتمدو على بعض ويحمو بعض وده كمان هو الضمان الرئيسي لعدم إختراقها وعدم تعطيل الشغل لما تحصل إعتقالات. المجموعات دي بتكون متصلة ببعضها وبينسقوا الشغل سوا عن طريقة جسم تنسيقي كل مجموعة من هذه المجموعات ممكن تعمل مقاومة سلمية (وقفات احتجاجية، مظاهرات، مخاطبات عامة، كتابة على الحيط، إلخ) ويكون الجسم التنسيقي بربط المجموعات بى بعضها، وبيسقو الشغل المقترح، وبساعدو، و بنسقو مع القانونيين والإعلاميين بإختصار، لو كنت مؤمن بالحرية والعدالة والمساواة وقرفت من الحكومة وعمايلها ومن المعارضة وتحايلها... وداير تعمل جد جد لتغيير الواقع الكعب دا، لم أصحابك وقرايبك واعملو مجموعة واتصل بينا على البريد الإلكتروني وحنبدأ من هناك ياهو ده بريدنا [email protected] وحنبنيهو البنحلم بيهو يوماتي وممكن تلقا فى الرابط التالي معلومات أكتر عن مفهوم الحركات اللاقيادية http://www.wri-irg.org/node/14001
