جماعة الشات والفيسبوك يعيشون هذه الأيام ظروف استثنائية (السهر بالكوم صباحي) ..كلام اشكال وألوان وحتى مظاهرات كمان ..والله حيرتونا ياناس المزرعه السعيده ..وللمعلوميه السعيده مزرعه (عمرانه) يزرع فيها الشباب حتى الساعات الأولى من الصباح وفي هذا الوقت تحديدا ينهض المزارعون التقليديون مع صياح الديك، والمزارع دي ياجماعه تنافس مزارع اهلنا الطيبين بشده وفيها الأبقار والأغنام وكافة إحتياجات الأسره السعيده...!!! والله شيء عجيب..عالم تاني رمضان جرى ..وكلها ايام من عمرنا.. ثمانية عشر يوما (يااااااحليلو)هكذا تحدثت عمتي بخيته وامي آمنه عن جريان الأيام والسنين وحتى جريان السيول وجد حظه في دردشتهن الصباحيه، ..وعدت بتفكيري لجماعة الونسه الفيسبوكيه واحترت في امرهم ياربي ديل يعملو ليهم شنو ؟؟ شبابنا بقى هارب من واقعه بسبب الظروف الصعبه التي يعيشها يريدون متنفسا ووجدو طريقهم للعم فيسبوك ومعاه بقت اللمه فيسبوكيه وهاك ياشااات.. هم صنعوا عالمهم الخاص بعيدا عن ازعاج السلطات ..وبداخل هذه الأسلاك والألياف يتجولون بحريه غير عابئين باحد فهناك مزارع وميادين وحقول وشوارعهم مسفلته ومافيها حفر ولامويه محصنه ضد الأمطار والعوامل البيئيه ولا معتمديات ولا محليه. ومابين الشير والكومنت ودوس لايك عوالم تدور بيك بأريحية ،. والمحيرني الجماعة ديل مادام وصلو للمرحلة دي معناها النتحرى معاهم ليلة القدر، وذي ماقالت حاجه آ(منه )تاني مافي نوم عديل كده كلها ايام وينتهي الشهر ولابد من الحصاد ..طبعا ناس الفسبكه حصادهم حصاد الهنا ..المزرعه السعيده صباحي وغايتو (النشوف آخرتا) معاهم شنو ونتحرى ليلة القدر عساها ليلة قدر فيسبوكيه. ، والشيء الجميل اللافت للنظر هو المجموعات والروابط التي تكونت و اقامت العديد منها مجموعه من اللقاءات والإفطارات الرمضانيه وهى حاجه حلوة ..والسؤال المحيرني مدى متانة هذه العلاقات الفيسبوكيه ...اها ياجماعه وبلغة الفيس بوك لو اعجبك كلامي هذا رجاء لاتبخل ودوس لايك وشيرها لغيرك وشوف نتيجتها.