الواضح ايها السادة ان البعض منا قد أدمن الفيس واصبحوا مفيسين (مدمنين)ولاداعي للأنكار إطلاقا. الواحد من الصباح تلقاهو قبل مايتسوك عاوز ينزل بوست يبل بيهو ريقو. والاجمل البنات بينزلو مواضيع علي طريقة (الليلة طابخي ن كده...!) تلقاها المسكينة اليوم كلو تقوقل عشان تنزل ليها بوست تطقم بيهو مع افكارها. اها حالات التفييس دي كوم واللايكات كوم تاني . الواحد ينزل البوست وهاك يارفريش. الجماعه لايكوا... لا..مالايكوا ريفريش واحد لايك ..نردها ليك في بوست السعادة انشاء الله. وين الباقين..ريفريش ماتلايكوا ياخي محننين..قطيعه. عوضية دي مااونلاين حسع انا عملت ليها كومنت مستخسره فيني لايك وعثمان ده برضو اونلاين امبارح عملت ليهو لايك في موضوعو الفارغ داك ساي مايستاهل ...حريقه. وبالطريقه دي الناس بقت عندها وجبتين اضافيات بوست الصباح وبوست المساء وخاصه بوست المسا ده مهم عشان الواحد ينوم قرير العين تلقاهو مساهر لامن يلايكو ليهو بعدين ينوم ويصبح اول حاجه يجر يشوف اللايكو ليهو بالليل منو.. يمسح عويناتو..بعدين يتسوك ويشرب الشاي وينزل بوست الصباح.. ويظل متابع البوست اليوم كلو لايك كومنت وبالعكس في الشغل في المسجد في المواصلات في السوق العربي يدقش ده ويرفس ده وعينو في الموبايل لحدي المسا(يلم كومينتيهاتو ولوايكو) ويرجع البيت .. عاد ده ماإدمان ياجماعه ..!!؟؟ هو الادمان ده الا يدسو ليهو البدره ولا يعبو ليهو اللايكات دي في اكياس تمباك ولا شنو..؟؟ الواحد بعد كده الا ينصح جناهو(يابني ابتعد عن اصدقاء (الفيس)...واذا صاحبت فصاحب من لايكومنت ولايلايك واذا دردشت فدردش مع من لايطمع في لوايكك وكومنتاتك .. وكما قال نعمان لابنه ذات مرة من المرارير: تريث في الصحبه حتي يرسل لك طلبا ولا تتشالق وتطلب من الفتيات اعجابا غدا تجد خلف صوره الفتاة فتا فتصبح العوبه الفيس ويغلق في وجهك البابا فلا تطول كومنتا ولا حتي من عنب الفيس اعجابا اها ياجماعه الكلام الفوق ده كوم وانكم تلايكو لينا كوم .. برضو الصديق وقت الضيق ياجماعه ولا شنو...لايكو وكومنتي وماتشتغلوا بالحكي الفوق ده..والمايلايك انشاء الله جهازوا يعلق يومين لحدي مايبقي زي حدائق بابل المعلقه....... الكاتب : لؤي شرفي
