يوم الأحد أول البارحة.. وهو يوم ذروة في المواصلات.. مشيت المحطة حكمة الله لقيت المواصلات متوفرة.. تعزل عديل كده بصات الوالي.. حافلات.. هايسات.. أمجادات.. رقشات.. ركبت بمزاج أنا قلت ياربي المواصلات دى جنت ولاشنو؟ قضيت مشاويري رجعت مع صاحبي في عربيتو.. جينا جنب بتاع البطيخ.. قلت ليهو أقيف لينا نشوف البطيخ كيف! نزلنا.. «فضلة خيركم» اشترينا ثلاثة بطيخات من الحجم المتوسط قال بي خمسة وعشرين أديناهو عشرين.. البطيخة زي دي كانت الواحدة بي عشرين أنا قلت ياربي البطيخ ده جنَّه ولاشنو؟ أنا بعيد عنكم بشتري دواء راتب كل شهر كورس.. مشيت أشترى علبة(زارتان) وده دواء سوداني.. كنت بشتري «أديكاد» مستورد غيرت لي السوداني.. إقتصادي ونشجع الإنتاج المحلي فدَّ مره.. لآخر مرة اشتريت العلبة بى 37 جنيه قبل شهر وحيقول لي الدولار شنو! والسعر الموازي شنو! قلت حيكون زاد أربعه خمسه جنيه.. أداني العلبة بي كم قال بى سبعه وتلتين.. يعني مازاد.. قمت قلت ياربي الدواء ده جنّه ولاشنو؟ وأنا ماشي في شارع الكبري مسهي ومقهي.. زي تقول سارح بي بقر إبليس.. طبعاً زمان كانت غنم إبليس هسع بقت بقر مازادت وكده.. وأنا ماشي شفت ليك دكاكين فيها حلاوة مولد.. اتذكرت إني ماجبت خبرا.. قلت أشتري شويه على الأقل نتذكر حلاوة مولد زي زمان ولا اتغيرت ! مشيت على سيد حلاوة مولد وسألتو الرطل بي كم قال لي الكيلو بي عشرين جنيه اتذكرت إنو المولد الفات كان الرطل ب عشرة جنيه.. يعني هسع الكيلو بي عشرين فيهو رطلين وربع.. يعنى الرطل بي أقل من عشرة جنيه.. برضو سألت روحي: ياربي حلاوة مولد جنت ولاشنو؟ أها أنا ماشي شايل كيس حلاوة ومبسوط قعدت أغني في الليلة ديك لا هان على أرضى وأسامحك.. إتذكرت إنها أغنية حزينة قعدت أغني الدنيا منى وأحلام ياسلام فرايحية وكده.. لقيت ليك ستات الشاي والقهوه كل خطوة واحدة.. قلت أكافيء نفسي بي كباية قهوة.. قلت لي ست القهوة أديني كبايه قالت ليّ بي دوا ولا بدون دوا.. قلت ليها ياسلام بدون دوا مابتطلع بالخسارة معاي.. قلت ليها بي دوا.. شربت قهوتي وسألتها بي كم.. أنا قاعد أشربا في سوق بحري بثلاثة جنية قالت ليَّ: بي أثنين جنية سريع سريع أديتا وقلت لي روحي: إنتو القهوة دي جنت ولاشنو؟ مشيت على البيت.. وأنا أكاد أطير من الإنبساطه عشان الحاجات مازادت.. و في راس الشارع لاقتني حاجه.. سلمت عليَّ وقالت لى ياولدي باص صابرين بقيف هنا.. قلت ليها آي قالت ليَّ كتر خيرك ياولدي.. أنا ولد إتحسست شيبي وتجاعيد وشي وقلت ياربي الحاجه دي جنت ولاشنو؟ خشيت البيت(المدام) استقبلتني بي حفاوة وشالت مني الكيس وجابت ليَّ مويه بارده ! أنا شكيت المعاملة الخاصة دي أكيد حتتبعا طلبات يا توب ياملايات المهم أي طلبات انتظرت أشوف آخرة المعاملة الكويسة دي شنو؟ حكمة الله ماطلبت أي حاجه لغاية الصباح برضو ماطلبت أي حاجه..! العصر ماطلبت.. المغرب ماطلبت.. العشاء ماطلبت سألتها عديل: طلباتك شنو؟ قالت لي: سلامتك أنا قلت لي روحي ياربي الوليه دي جنت ولاشنو؟
