وكما كان متوقعاً حقق الهلال فوزاً كبيراً على اتحاد الكرنوس وبسهولة، ولكن يبقى السؤال .. ماذا تستفيد الكرة السودانية من منافسة مثل كأس السودان ؟ لا لون ولا طعم ولا رائحة، حتى رائحة الفساد غير موجودة ! لا في أموال تلفزة من البداية ولا نيل ولا نيلين ! ولا توجد أموال رعاية ولا سوداني ولا عالم تاني .. ولا برازيلي ولا ياباني ! ولا دخل حتى يذكر .. ولا زكي عباس وقروش كاش .. ولا هي منافسة بها حوافز تذكر، لذلك فإن أسماء مثل دكتور المناقل لا تظهر بها كثيراً ! منافسة (ميته) من النادر جداً أن يلعب فيها الهلال والمريخ، وكأن الفريقين يتبادلان الانسحاب .. شارك الهلال انسحب المريخ .. شارك المريخ انسحب الهلال .. والانسحاب نفسه لا يكون بسبب المنافسة وإنما بسبب (زعل) في الدوري الممتاز ! وطالما الأمر كذلك لماذا يبقى الهلال بدون مباريات طوال أكثر من عشرين يوماً، إلا هذه المباراة، ويتم ضغط مبارياته في الممتاز في فترة قصيرة لدرجة عدم القدرة على متابعتها ! ماذا تفعل معظم أندية الدوري الممتاز في هذه الأيام .. تتفرج فقط على مباريات المريخ ! والمريخ نفسه يرفض أداء المباريات .. وهلال الأبيض يرفض تلفزة مبارياته .. والصحف تتحدث عن مصالحة مع التلفزيون، ولا أثر للاتحاد الذي تعاقد مع التلفزيون السوداني ! كل الأخبار عن التلفزة مرتبطة بالنائب الأول أو وزير المالية أو وزير الإعلام .. وفي المشاكل فإنها مرتبطة بالولاة حتى أن الوالي أحمد هارون تدخل من أجل السلام بين الطرفين ! وهلال الأبيض زعلان عشان النيلين لم تنقل مباراته السابقة ! وهو أمر غريب لا يحدث إلا في السودان .. فحقوق النقل أصلا حصرية علي قناة النيلين، وليس على (هلال الأبيض) يعني هلال الأبيض ما عندو حق يزعل أصلاً عشان القناة لم تنقل مباراته ! والأغرب أن القناة لم تزعل لأنها لم تنقل، ومن المفترض أن تكون حريصة علي النقل أكثر من هلال الأبيض لأنه من المفترض أن نقل الدوري الممتاز يحقق أرباحا للقناة، لذلك هي تشتري الدوري بثمانية مليار ! وسكرتير الخرطوم الوطني يقول إن ناديه لم يستلم مليماً أحمر من حقوق التلفزة والرعاية .. طيب القروش بتمشي وين ؟؟؟؟؟؟؟؟؟؟ عرفنا قروش الفيفا مشت تقريبا كلها لوكالة تاكس ! قروش التلفزة برضها حولتوها تذاكر .. قروش سوداني ممكن يكون فيها جزء مشى لتذاكر اليابان والبرازيل والدوحة، لكن برضو دي قروش كتيرة ! معقولة تذاكر بثلاثة مليار !! كلو جائز .. الهلال يهزم إتحاد الكرنوس في المرحلة الثالثة من كأس السودان .. وشنو يعني ! قووول إتحاد الكرنوس هزم الهلال وأبعده من كأس السودان ؟؟ شنو يعني .. قول الهلال وصل للمرحلة النهائية من كاس السودان ! ولا أي حاجة .. قول الهلال رفض يلعب مباراة نهائي كاس السودان !! عااادي جداً .. قول الهلال رفض يلعب مباريات الدوري الممتاز ؟؟ ولا أي حاجة بتحصل .. لو في نادي إتضرر ممكن الدوري يبقى عشرين فريق .. تلاتين فريق ولا في مشكلة ! عااادي جدا .بطل الدوري الممتاز للموسم الماضي غير معروف .. الجمعية العمومية لم تحدد بطل .. وحتي لو حددت بطل كل قرارات الجمعية لم تنفذ .. لا الرابطة هبط ولا مريخ كوستي في نفس مركزوا ونقاطوا ولا نتيجة هلال مريخ إتعرفت ؟!! مافي أي حاجة الأمور ماشه وزي ما بقول أخونا محمد عبد الماجد .. أهو النفس طالع ونازل .. أصلا غير الميرغني والنفس ما حدث نزول ! مسكين الميرغني .. الفريق الوحيد المتضرر من دوري الموسم السابق !! الهلال ربحان .. رئيسو قال العايز يقولو .. الامل ربحان .. اتحدي ورفض الميدان وبقي في الممتاز . المريخ اكيد ربحان .. مغلوب وربحان .. وعمو سمير .. شال الحوافز .. والفاتح خضر سافر .. ومحامي باجعفر لسه محامي .. مافي زول خسران غير الميرغني والكرة السودانية !! والهلال هزم اتحاد الكرنوس في أرضه ووسط جمهوره ؟؟؟ خبر عااادي لن يثير اهتمام أحد .. ياخي دي بلد مافيها زول بستغرب .. الدولار فيها وصل 14 ألف و وأسامة عطا المنان شال أكثر من مليون دولار لوكالتو، ومافي زول شغال بالقصة !! عااادي جدا زي مباراة الهلال واتحاد الكرنوس وكأس السودان .. منافسة وناس بتسافر وتجي ومباريات وحكام وفي النهاية ما عندها أي سبب .. ضياع زمن بس ! واحد قال لي إنته ذاتك بتضيع في زمنك .. ناس الاتحاد ديل ما برجعوا القروش .. قلت لي نشوف .. لسه الشوط الثاني ما بدأ !!!