أمرق من الروح قبل ما تفضل تنورق فيني لمَّا الروح تفوت الليل قميص الضلمه للبشتاقو لي الليل والخفوت أمتن من احساس إني أبقى معاك خيوط العنكبوت شان كت ضل الحر ورقراق البيوت الشاتية لي شوق الشمش كتّ الدفو البرجاهو شقيش انكمش كت ردة الفعل التضاد إرهاق خطاي وكتين امش واخترت تمشي عشان اعيش واتعشى موت مليت تفاصيل اختلاطك بالدم البجي للمداخل والعروق خليت شوارع الفرحة تفتح حوشه للبتباكو سوق صليت وما قبلت وش حرم احتمال جيتك لا استنيت شروق شليت مواسم الريده واتيقنت وين تسكن على كيف ياتو باب تمرق على باب ياتو وريد تشحد تذاكر دخلتك وامر المروق بي ياتو حق هسع تكفّت شفع احساسي الحزانى المنهكين ومن وين ادبِّرلك خلايا تعوض الفقد الكتل فيني اليقين كيفن بصبر وحدي الوطن البنيتو جواي ولاتق ياتو طين وحم احتضارك في رحم وجعي المسافر من سنين برد الشتا القاسي البخافو اعدي وين يات شارع اسع ممكن اتقبلني من غير ما توقع حضرتك في خاطري شان فيو استكين هو دا كلو هين بس بطن أحزاني يوم تكبر واشوفا الخوف أقبل أمشي وين وانا ما بورّيك كيف قبل ما أعرفك كفتََّا حس أوجاعي والحزن الدفين انا كتَّ كل ما الطير بكى وبكى شان سجين بفرح عشان انا في سجن قلبك مسكنه من متين ما شبهك غير الشقى الجواني أو هذا الجنين مابفهمك زول إلا يوم اشنق مساحات الفضا البراني منك صوت انين ما قلتا لي قبال أزفك لي مسام قلبي اليتيم إنك حنين أها هسي دي الحنيه وين وانت امتطيت صهوة جواد إحساسي سافرت وبعاين فيكا طفت مدن جواي علمت أطفال النبض في قلبي كيف يصطفّو في لحظة مرورك زي تمام الجيش.. واستنوك حنين وانت الصبغت الدم نشاذ لون حضرتك واتأكسدت لحظة مرورك في كريات الدما الوقادة لين ماك عارف انّك لحظة السفر التمرقك مني بتشل أي جين لو كنت عارف ما بكت بعدك عيون الفرحه دم أبداً ولا اغتصب السكون أوتاري لا مسّاني شين لا كنت بتمناك تموت جواي عمر كامل على راس كل حين يااااااا معين يا الله يا الخابر دبيب النمله في الليله المضلمه في حجر أملس ولا قاسي وتخين يا الله هسّع ممكن استنشق زفير النار وكت ينزل على رئتيني ذرات اكسجين يا الله يا السويتني من صلصال وطين يا الله أمرقو من عقاب الجتّه زي سل السبيبه من العجين
