تَلُخْ سُكّر.. وتشرب يومي تتحنطر . إمِسْكَك سُكري وتمرض ... دا ما بِفرِق . تَسِبْ تزهج .. وتتقفّل شرايينك .. وإجيك الضغط ... ما بِفرِقْ . تجيك بلهارسيا تهَرْسَكْ .. تَحِتْ ضُلَعك .. تَسِلْ نَفَسك .. تروري الموية في كرشك ...دا ما بفرق. ملاريا تكَتّفك , تبرد ... وفي نص البرد تعرق . تضوق الببسي زي حرجل .. تحِس طعم التمر حنضل .. دا ما بفرق . إمِسْكَكْ أيدز ... إجيك مرض الزمن طُبّيز .. هِنا بْتفرق . عشان ربّك رسم لك خط .. وقال لكْ اتمشي فيهو عديل .. وما تلخبط . تقوم تغلط .. وتتخَبّط .. إضُرْبَك أيدز .. إحِتّك حتْ . وتتبرّط ... وتتزعّط .. وشعرك كلّو يتمعّط . قَدُر ما تروح تشوفا ظلام ... وكلّ الدنيا فيك تشمات . ومهما كان سبب مرضك .. ومهما كنت إنت بري .. فهم الناس يظل واحد .. إنّو الزول دا ما دُغري . وكل الفيكَ والما فيك .. يخُتّو عليك . تقبّل وين ؟ يمرمغوا سُمعتك في الطين .. وما تدري . وإعافوك الخَلِق والناس .. وكلْ ما ليك ماش في نقاص .. وينسَلِب اللحم منّك .. يموت في داخلك الإحساس . تحِس بالدنيا ضيق في ضيق ... ويتراكم عليك الباس . ها شِن ودّاك لي مرضاً تجيبو براك .؟ شهور وسنين ولسّع ما لِقولو خلاص .. ولَمّان جد وليلهم حاس . أكان قالوا الختان الحل . وقلنا خلاص .. تقوم نقع الخلق طِهّير . حتى انشا الله بي منجل . كان سوداني .. كان لبناني .. كان نيجيري .. كان ياباني . كان بلجيكي .. كان أمريكي .. كان سوفيتي .. كان طلياني .. إطّهّر . نسوّيلو العديل والزين ..دلاليك الطهور تنقُر . من هولندا لي يوغندا .. في دلهي وسهول أمجر . ومافيش واحد إستنكر .. عشان دا الحل . هو كان ما كانم زمان اشتر .. وكان فينا الجهل منشر . ومِلنا شوية للمنكر .. دا ما كان الحصل بحصل . ولا كان المرض بكبر .ويملا الدنيا يتفجّر . ومافيش حل . إلاّ الخلق تعقل .. ويخلّو الكان بسووا زمان . ويتوبوا لي ربّهم .. ويقبل