صاحبي من هسة مهموم، داير يطير لي برج نافوخي قال لي: تصور .. في روضة رسوما بي أربعة ألف جنيه؟ يعني أربعة مليون بالقديم – يا قديم انت – والتمهيدي (طبعا ما تمهيدي ماجستير) بي تلاتة ألف جنيه؟ السؤال البطرح نفسو (طرح غرائب الإبل) لو التمهيدي والروضة بقوا كدة، طيب الأساس والثانوي ديل حيكونوا دايرين القفز بالزانة، بدل السلم التأليمي ده؟ وبعد دا كلو الشغل بقي تجاري .. ويكفي ان الوزارة قرمشوا منها (التربية) وبقت (التعليم العام) فقط لا غير، يعني ما بعيد الوزارة بعد فترة تبقي علي الحديدة ويختفي التعليم كمان ويختصر الاسم لي (وزارة العام) .. وبالمناسبة دي ، حندي القراء بعض الأسئلة الساهلة – زي الموية في الاحياء السكنية الطرفية – ويا قارئ: هاك الأسئلة دي الزول الطالب البقرا بالقروش، الكمية من الأموال دي حيشتغل كام سنة كدة عشان يسدد الدفعوهو ليهو من قولة تيت (التمهيدي) لحي قولة ضربات الجزاء (الجامعة)؟ أذكر عدد (اللفات) و(المعاينات) .. وفترة الطيران حتي يجد الشغل ومن ثم تبدأ الإجابة علي السؤال الأول وكدة؟ حاشية: لا تكتب الاجابة علي الجريدة .. ومافي أي خيارات .. والما عاجبو يقع البحر عديييل كدة بدون لولوة هو وهي: هو عِيدكُم مُبَارَك يَا حَبَايبِي ازيَكُم وَين نَلقَي وَاحدِين زَيَّكُم أمَرَا ومُلُوك زَي الكَهَارِب ضَيَّكُم دِي تَحِيَّه مِن وَاحِد مُحِب دَايمًا مِجَرِّب كَيَّكُم بَقَدِّم طَلَب لَو تَقبَلَونِي أصِير غَفِير فِي حَيَّكُم ******* هِيَ يا اللَّابِس الكَدمُول حَولُو القُرُوش تَمبُول تِمسَاح وجَدَك غُول العِزَّه لَيهَا أصُول والرَّوقَه ليهَا أصُول عَرَبِيَّه عَرض وطُول وعَرُوسَه زَيَّ الفُلْ والهَاتِف المَحمُول وشَقَّه فِي لَندَن والتَانيَه فِي اصطَنبُول لَكِين كَمَان تنسَانَا دَا الأصلُو مَا مَعقُول حدث عام 2050 الدكتورة/ شاهيناز هيثم وزيرة الصحة الاتحادية تهدد باغلاق أي كافتيريا لا تقدم خدماتها عبر (النافذة الالكترونية) .. وتمنع اي انسان آلي (روبوت) من ممارسة البيع المتجول عبر الطرق .. وتعلن تنفيذ اجراءات صارمة ضد المخالفين الذين تكشفهم الكاميرات العاملة علي القمر الصناعي (سودانسات). ادارة مرور الخرطومجنوب تطلب من جميع مالكي السيارات بحي (الكلاكلة صنقعت) البقاء في منازلهم يوم السبت الثاني عشر من ابريل 2050م وذلك بغرض استقبال فريق العمل الذي سيصل كل المنازل التي يملك اصحابها سيارات بغرض اكمال اجراءات الترخيص للعربة .. علما بأن جميع سيارات هذا الحي سوف ينتهي ترخيصها في وقت واحد يوم الأحد الثالث عشر من ابريل. أقوال مأسورة: السماء صافية .. لأن البشر لا يعيشون فيها حكيم يسكن الصافية بعض المنعطفات قاسية جدا .. لكنها اجبارية لمواصلة الطريق مهندس زفت هناك شهادتان، شهادة في سبيل الله، وشهادة في سبيل الأهل طالب شهادة مثقف جدا مسدار تيش: يوم الأربعاء أصبح سخن من فجرو و الناس فيهو بس بي كلمتين ينكجرو الزول الصبر مولاي يعظّم أجرو و يلهمنا الشعر شان لينا يسهل نجرو أمّا حكاية!: في بعض الكتب المترجمة أنّ يحيى وشمعون كانا من الحواريين ، فكان يحيى لا يجلس مجلساً إلا ضحك وأضحك من حوله ، وكان شمعون لا يجلس مجلساً إلا بكى وأبكى من حوله، فقال شمعون ليحيى : ما أكثر ضحكك، كأنك قد فرغت من عملك ، فقال له يحيى: ما أكثر بكاك كأنّك قد يئست من ربك، فأوحى الله إلى عيسى عليه السلام: أنّ أحبّ السيرتين إليّ سيرة يحيى.