بتاع لقاء جمال الوالي مع قون روشا عمل منو مناحة وقال على جمال ان يستقيل الليلة قبل بكرا وبصرف النظر عن صحة الفيديو من منتجته خطأ اللسان وارد بالذات اذا كان المتحدث يرد على استفسارات كثيرة ويقاطعه مقدم البرنامج بسؤال جديد قبل اكمال اجابة السؤال الماضي ده طبعا اذا الفيديو ما فيهو مونتاج الناس الزمن ده بتمنتج ليك زول ماشي عديل وبنضم وبعمل في حاجات لا انزل الله بها من سلطان ده غير الفوتو شوب الذي صنع من صورنا على الصحف جانب جمالي وفي حقيقتنا جمال النفس هو كل ما نملك روشا لن يهدأ له بال الا اذا ابتعد عن المريخ جمال وده دليل على قناعة روشا بخطورة موقف الهلال في حال وجود جمال لان الناس تقارن بين ما يفعله جمال وما ينقص الهلال الا يكفي بقاء خانتين بور في كشف الهلال لانعدام المال ؟؟؟؟ على العموم يا روشا دينياً جمال افضل من الذين يصلون الركعة الاولى بالفاتحة وطلع البدر علينا والتانية بالفاتحة ويا راحلين الى منى بغيابي على العموم دليل نجاح جمال عدم رضا اعلام الهلال اليوم الذي يترك اعلام الهلال جمال في حالو حانغير جمال طوالي لانو بكون قعد ساي واوعك تقطع صفقة شجرة يا روشا عشان ما يجيكم جفاف وتصحر جفاف اكتر من خانتيتن بور وحق التذاكر للكنغو واقف طابور جفاف اكتر من كده كيف ؟؟؟ اتجففي المهم اتفرجنا في كاس العالم عندهم اطراف صاح ونحنا عندنا طرائف عكسة غلط مافي مدرب بكورك ارجع يا موسى مافي مدرب بكورك هليفة هليفة مافي مساوي بعمل بلنت في الدقيقة خمسة وتمنين مافي اتير يديها للمهاجم مافي زول جاري ساي زي جري المدينة مافي ما شفتو روبن اي جرية بي قون في كاس العالم الاطراف زي البساتم بطلعوا في وكتهم وبنزلوا في وكتهم والبساتم غالباً اربعة بطلعوا واحد واربعة مع بعض يكونوااتنين وتلاتة نازلين مع بعض يطلعوا اتنين وتلاتة ينزلوا واحد واربعة وبتتوزع كهربة العربية على كده اي خطأ بعمل كومبريشن تلقى العربيه طاخ طاخ طاخ اليومين دي اي طاخ تجري بس لاقاكم بستم طالع والمفروض يكون نازل غير في مكنتنا السودانية دي !!!! عشان كده كورتنا كلها كومبريشن الله يستر البستم ما يجينا طالع بره يلحقنا الزينين اها نجي لي شمارات والي الخرتوم ما شفت يا والينا مآسي الطب والعاملاهو فينا يدخلوا الزول العملية يجوك مارقين جيب الروشتة دي بسرعة وهمية تصرفها من بره طبعا بكل الماهية اي روشتة بره المستشفى وبره التأمين تصرف الروشتة بالمبالغ اللي هية الباب يفتح الناس كلها تقيف مهتمة ماها ملهية يقولوا ليك جيب لينا قسطرة وحواشة قطن ودربات وجيب كل الصيدلية تمشي تجيب القطن ده بره التأمين تجيبوا وتديهو لي زولا امين يفتحوا الباب تاني يظهروا ممرضات وممرضين يقولوا ليك فتش ليك نقالة عشان نقالة العملية دي ما بتطلع بره العمليات شبرين يجيك مارق زول لابس اخضر في اخضر وشراب مع شبشب ظاهر صناعة الصين يقولوا ليك ده المستر العمل العملية لي جدك الزين المستر جنس طنقعة ويتخفف ما رزين تحلف تقول غير للزول قلب وفشفاش وكلية والكبدة ربطها بالدربكين ورفع الطقطاق زاد ليهو عمرو تمنية سنين يقدل كأنو جاب الديب من ديلو او جاب المرفعين المهم تمشي للنقالة تلقى وظيفة ما بتلقى نقالة في مستشفى حزين تفتش نقالة وما بتلقى ساعتين النقالة الناس راقدة فيها بالجوز وفرحانين واذا نفوس المرضى اتطايبت تلاتة تلاتة برقدوا في النقالة عم الطاهر وهيثم ود احمد وام سترين حسب الألم ووجع الرجلين وبعد تزهج يمكن يدوك كيس مخدة يقولوا ليك ده باقي زولكم جدك الزين المستر القبييييل داك ضقلموا كلو اي حاجة دايرة شغل لغاها بالدربكين ابو الدمام مخنزر بلغيهو طوالي الحين الكبدة فيها حصوة وشوية طين بفصل الكبدة ويشقها يخليها ليك نصين ويبقى عندك بدل الكبدة طلبين لكن قاعدات ساي الكبدتين زي المكيف الما شغال في عربية موديل سبعين مستر ياخ في حصوة في الكلى او حصوتين ممكن يربط ليك درداقة طبية تشيل بيها الحصوة حجر حجر وممكن حجرين حجرين بس درداقة من المحلية مستر حريص عشان ناس المحلية ما يشيلوها من «البيشن» اذا شافوها باقي ناس المحلية يا تأجر الدرداقة منهم يا ما تدردق اطلاقا وآخرتها يا والينا سمعنا بي مأساة الطب الفينا وقصة الطفلة الحزينة الطفلة فاطمة من ولاية نهر النيل يا والينا سنة يا والينا والعود في احشائها يقطع الحشا الفينا ويبين الحال العلينا والمستر حايم فينا لا بعبرنا ولا بهتم بينا بالطريقة دي بعد العود ممكن ينسى كمان اوركسترا كاملة في بطن والدا لينا اغلي ليك حرجل ومص ليك قرض اخير من مستشفى داير يكتل البت بعد كتل الولد اخير من طبنا القرض الناس قرض وقرض الناس قرض وقرض الناس قرض وقرض الناس قرض سلك كهربا ننساك كيف وعود في بطن طفلة وسط الزحمة منسية والى لقاء سلك