*انتوا قايلين عالمي يعني شنو ؟؟؟ *يا تكون انت متواجد في فعاليات عالمية *يا عندك من ناسك ناس كانوا متواجدين في فعاليات عالمية *يا في ناس بعرفوك في الفعاليات العالمية *يا لعبت ضد ناس من ناس الفعاليات العالمية *يا في فريق بلعب في كاس العالم لعب في استادك والعالم كلو اتفرج *عشان كده المريخ ده عالمي *وبثبت ليكم بس روقوا شويه *تتذكروا شيكوزي حارسنا ؟؟؟؟ *شيكوزي النيجيري *أها في كورة نيجيريا الفاتت في كأس العالم كان قاعد في المنتخب *لابس واسمو مكتوب *تتذكروا ابالو ؟؟؟ *ابالوا الثيردباك ؟ *اها لعب كاس عالم ولعب في المريخ *بتعرفوا فيليب لام ؟؟؟ *موش كان لاعب في كاس العالم اول امس دي *اها ده فيليب لام زاتو اللعب ضد المريخ في قطر *ومولر *برضو لعب ضدنا في قطر *وكمان امير كمال قطعها ليو في راسو *جاب هاتريك في البرتغال *وما جاب ولا قون في المريخ *خليهو مولر *روبن بتاع هولندا *روبن الجنن اسبانيا جن *روبن الادهش العالم *اها روبن ده بعرفنا حق المعرفة *ويوم كورتنا ضد البايرن زاغ *عمل معوق *ضفر يا عمك *وقالوا يوم كورتنا مشى قعد في الريان في قهوة لما الكورة انتهت *اسي اللاعبين في كاس العالم لما يتونسوا في الكافتريا *تلقى سيرة المريخ بتجي كلو خمسة دقائق *اتوفيستر ده ما عالمي دحين !!!! *الحضري *الفرعون الكبير *العالم ده كلو موش بعرفوا ! *اها الحضري لعب في بيت اللعب ؟ *موش لعب في المريخ *خليهو الحضري *الجزائر اللعبت امس القريبة دي في كاس العالم *موش لعبت في استاد المريخ ؟؟؟ *لعبت فاصل خمسة من عشرة !!! *موش لعبت فاصلة مصر والجزائر *اسي ناس الجزائر سمع اضاني قالوا الاستاد اللعبوا فيهو امس بشبه استاد المريخ *عالمي يا زعيم *وده الفرق بيننا وبين الهلال *ما جاب محترف شال سيكافا سااااي *كلهم مواسير *اتوبونج وتسخاني وكوليبالي وسيرجيو *شوال بصل ما شايلنو *لكن الرخيص بي رخصتو *عرفتوا ليه اعلام الهلال بكره جمال !!!!! *يا عالمي يا مجنني *الجمهور في كاس العالم *الجمهور العجيب ده *الجمهور ده بعرفنا *موش جن مشجعات مع البايرن ؟؟؟ *موش جن نسوان لاعبي البايرن مع البايرن *فيهن البرازيلية وفيهن الالمانية وفيهن الهولندية ناقصات بس سعدية *موش في لاعبين من البايرن نسوانهم ما جن معاهم قطر ؟؟ *اها لما رجعوا ليهم ونسوهم بي شنو عاد غير المريخ *بلبس احمر وعندو نجمة *حتى الجمهور الحلو ده بعرفنا *في المدرجات تلقاهن يتونسن فلان داك بشبه لي زول ما عارفاهو منو ؟ *تنط الجمبها تقول ليها بشبه بلة بتاع المريخ العالمي *صدقتي يا انتي *الخالق الناطق *وببي لما طردوهوا سمع اضاني مشجعة قالت للتانية ببي ده بس ضفر *قلبو حار خلاس *وواحدة حالقة زي باسكال متأثرة بيهو *الزعيم العالمي *عالمي يا روشا *يا كافي البلا زول بعرفكم غير الفيفا مافي *مؤخر صداق وشكاوي سااااااي *عشان كده بتكرهوا جمال *نحنا عالميين يا روشا *والعارف عزو مستريح زي ما قال الريس *عزكم شنو انتوا ؟؟؟؟ *زول بعرفكم في كاس العالم مافي *انطوائيين ومتوحدين ومفلسين *خانتين بور يا القاري عند شامي كابور !!!!! *اول تمرين جايين دستة وغايبين دستة وناقصين لستة !!! *ما تمشوا الكنغو صدقوني *بتجيبوا ضقلها يتلولح *خندقوا اسمعوا كلامي *الخندقة حقتكم وبتشبهكم *وناس مازيمبي في فرنسا *وفيتا طلع الجبل *وانتوا لسه في يا طالع الشجرة جيب لي معاك بقرة *حايتشابه عليكم البقر بين فيتا ومازيمبي *ما حتفرزوا بقرة فيتا من ستة مازيمبي *زول عندو علاقة بي كاس العالم ما عندكم ؟؟؟ *الا الرشيد بدوي عبيد *زمان سافر يعلق على كاس العالم *ولما سافر قالوا ليهو في بلدكم عندكم فريق شال بطولة كاف ؟ *قال ليهم بالحيل *عندنا قالوا ليهو منو ؟ *قال ليهم المريخ *قالوا ليهو وعندكم فريق شال بطولة اقليمية دولية ؟ *قال ليهم بالحيل *قالوا ليهو منو ؟ *قال ليهم المريخ *قالوا ليهو عندكم فريق شال بطولات من الخليج ؟ *قال ليهم بالحيل *قالوا ليهو منو ؟ *قال ليهم المريخ *قالوا ليهو انتوا غير المريخ ما عندكم فريق في بلدكم ؟ *قال ليهم بالحيل *شخصياً *كاس العالم الجاي لو شفتوني في المدرجات مع الشعوب العجيبة دي ما تستغربوا *باقي الجماعة عالميين وزملانا *وبزعلوا لو ما قابلناهم في كاس العالم *عالمي يا عمك *اها نجي لي شمارات والي الخرتوم *والينا *ده شنو البحصل لينا ؟ *اشعاع شنو الانطلق فينا ؟؟؟ *انتوا عملتوا مفاعل نووي وما قلتوا لينا ؟؟؟ *بالغتوا واتلومتوا فينا يا والينا سلك كهربا ننساك كيف وبالطريقة دي لو متنا نعرف سبب الوفاة هناك، اللهم اجعل اسعد ايامنا يوم لقاك والى لقاء
