أربع سنوات..نحن والمريخاب (أحمد وحاج أحمد) ..بنتكلم في حاجة واحدة ...كلنا كنا بنقول والله (وارغو) ما فيه كلمة ، زول لعاب وحريف وامكانياتو كبيرة ...بس لم ينجح مع المريخ. نعمل ليه شنو؟..نغشكم يعني ...حاجة واضحة وظاهرة وما عاوزة ليها كتابة. اخفاقاته في المريخ كانت مضحكة ...في موسمين سجل هدف وحيد في (الشجرة) في مباراة ودية (نوع دا يقولوا عليه شنو؟) ..ثم سجل هدف في الاتحاد مدني بعد ذلك أصيب بحالة هستيرية من الفرح. هذه الاخفاقات ..يمكن أن تسخر بها من (ميسي) نفسه. في اسبانيا عندما يغيب ميسي من التسجيل في ثلاث مباريات فإن ذلك داعي كافي للصحف والمنتديات والمواقع في اسبانيا للسخرية من ميسي الذي صام عن التسجيل في ثلاث مباريات. بل، إن ميسي لا يسلم حتى من الرسومات الكاريكاتيرية الساخرة عندما لا يسجل. اسبانيا كلها تخلي شغلها ..وتقعد تسخر من (ميسي) عشان تلات مباريات ما سجل. يشيلوا حالو عديل كدا. اذن السخرية من وارغو وانتقاده والتهكم عليه بسبب فشله واخفاقاته في المريخ وهو لاعب كبير أمر طبيعي ولا نجد فيه حرجاً...(في الهلال ح ينجح طبعاً إن شاء الله). وارغو كانت حصيلته في المريخ (صفر)...هذا شيء متفق عليه ..ولا خلاف فيه حتى بين المريخاب. وارغو في المريخ بلعب مع منو؟. بلعب مع ناس بله جابر وموسى الزومة وسعيد السعودي وضفر. ديل لو لعب معاهم (ميسي) يصرج الكورة. في الهلال وارغو ح يلعب مع مهند الطاهر ونزار حامد ومساوي وبشه وسيدي بيه. فرق كبير. قبل كل هذا ..الناس كلها عارفة أن (وارغو) من ناحية الموهبة ..والامكانيات الفنية ما فى محترف بلحقو. ح تشوفه في الهلال ح يعمل شنو؟. بعد دا يمكن أن نتحدث عن اخفاقاته في المريخ ..هذا أمر مفروغ منه ولا تحسّب فيه. ويمكن أن نسخر من ذلك ...حتى وأن جاء وارغو ليلعب في الهلال الان..ويمكننا أن نسخر منه إن اخفق في الهلال أيضاً. رغم أن مقومات السخرية منه في الهلال غير موجودة..هذا ليس لأنه صار لاعباً في الهلال. جيبوا ليكم ورقة وقلم واقعدوا احسبوا براكم. وارغو في المريخ ..اخفاقه لم يمكن مبررًا لأن اللاعب جاء للمريخ وهو هدافاً لبطولة الأندية الافريقية (صاحب أعلى معدل أهداف في بطولة الأندية الافريقية)...أما الان فإن اللاعب يبدأ من غير ضغوط بعد تجربة فاشلة في المريخ ، بل دوافعه للنجاح سوف تكون كبيرة. السخرية من وارغو كانت ناتجة في أن المريخ دفع في اللاعب (3) مليون دولار (ليه والبلد حالها واقف) ..وهذا يعادل الان بالسوداني قرابة ال (24) مليار جنيه. (24) مليار ..تعمل ليها (كُبري) بي تصاريفه. طبعاً هنا الكباري ما بعملوا ليها (مصارف) عشان التكلفة العالية...بخلوها تصرف براها. لاعب عمره (17) سنة ...دفعوا فيه هذا المبلغ ..ما عاوزننا نسخر منه. والله لو دفع الهلال فيه هذا المبلغ ..وظهر بالمستوى الذي ظهر به في المريخ كان قطعنا قطيع. كنا بنقطع رقبتو. ما بنرحمو. وارغو الان جاء للهلال بملبغ ليس كبيرًا ..ودخل كشوفات الهلال في ظروف عادية من غير مهرجانات ومؤتمر صحفي ترعاه أكثر من عشرين شركة. مقومات النجاح متوفرة له في الهلال..تخلص وارغو من الضغوط واكتسب خبرة الملاعب السودانية وكبر شوية ، بقى زول واعى ، فقد جاء للمريخ وعمره (17) سنة. كثير من المريخاب ..حسبوا يمكن أن يكون (تناقض) فيما كتبناه في وارغو عندما لعب في المريخ ..وفيما يمكن أن نكتبه عن وارغو وهو لاعباً في الهلال. ما في أي تناقض..مشكلة وارغو لم تكن في وارغو ..وإنما كانت في المريخ ..لذا نجاحه إن شاء الله سوف يكون كبير في الهلال. المشكلة في المريخ. قول وارغو فشل لا قدر الله. نحن دفعنا فيه (3) مليون دولار. عملنا ليه مؤتمر صحفى برعاية (21) شركة. قعدنا نتفاصح بيه في الشوارع والجرايد. شوفوا (الشغيل) الان ..والشغيل زمان في المريخ ..(الفرق واضح). كورة الشغيل في الهلال الان بقت بالمنقلة والمسطرة ..كورة تستمتع بيها عديل كدا زي (بتتعلم من الأيام). وارغو دا مع سيدي بيه في النص..ومهند الطاهر ونزار الصاقعة وبشه...والله قطر ما يثبتهم. تاني المريخاب ما بتعشوا. الموسم الجديد مع (التمهيدي) حقكم دا ما اظن تتعشوا. خلاص ح تنوموا من سبعة في الموسم الجديد. ح تتمتعوا عديل كدا يا هلالاب (وارغو وسيدي بيه) ..ح تشوفوا الكورة على أصولها ...وتعرفوا الفرق بين الهلال والمريخ. بس ما تلعبوا لينا مع (الشجرة). هناك تحفظات على سلوك وارغو وتخوف منها في الهلال ..رغم أننا طول وجود وارغو في المريخ لم نكتب عن سلوكه ..إلا أننا نستطيع أن نؤكد أن الهلال قادر على أن يضبط سلوك وارغو وقادر على تهذيبه. مجتمع الهلال فيه القدوة الحسنة...وعمر بخيت وأخوانه قادرون على أن يجعلوا وارغو واحدًا منهم بعد أن فشل لاعبو المريخ في ذلك ..فشعر اللاعب بالغربة والاحباط ..مع الضغوط العريضة والكبيرة التى تعرض لها. الفرق واضح بين كلتشي في الهلال وكلتشي في المريخ. تراوري قنعنا من خير فيه فكينا....ولا بنجامل في الحاجات دي. علماً أن كل المحترفين أو أغلبهم أصحاب سلوك مرفوض من المجتمع السوداني وغير مقبول. عليه نقول إن تسجيل وارغو في الهلال هو قنبلة التسجيلات الحقيقية (ضربة معلم بحق وحقيقة) ..لأن اللاعب وصل الخرطوم في سرية تامة ..واكتملت الصفقة على نار هادية. ناس المريخ اتهجموا..اتخلعوا في رقبتهم دي. لقوا ليك وارغو قدامهم وجه لوجه في مطار الخرطوم ..لمن ضفر قال ما عاوز. ضفر قال ليهم رجعوني أهلي. كذلك تسجيل وارغو في الهلال فيه رد شافي على المريخ الذي ظل يطارد لاعبي الهلال ويلاحقهم اينما كانوا. الشيء المحير ..وارغو من مطار الخرطوم منذ وصوله للسودان قاعد يضحك. فرحان جنس فرح. وارغو دا وقت كان في المريخ ..أنا كنت فاكرو ما بعرف يضحك. الزول دا تصوروا طلع بعرف (يضحك). من مطار الخرطوم قاعد يضحك إلى أن وقع في كشوفات الهلال. بعدين موهبة الزول وامكانياته ذاتها ظهرت وقت لبس (الأزرق). بالأحمر ما في زول كان فاكر ليهو. وارغو دا قاعد في المريخ (4) سنوات ...ما في زول شافو (ضحك). قالوا ليك وارغو دا في المريخ وقت يكون عاوز يضحك بطلعوه (اعارة) بره البلد. موش مرة طلعوه اعارة ليبيا. عارفين طلع اعارة ليه؟. عشان كان عاوز يضحك ويرجع. طلع ضحك وعاد. وارغو دا في المريخ قبض ليه (اكتر) من مليون دولار غير ملايين النادي ما ضحك. هسع قلت ليكم قاعد يضحك من المطار. الهلال دا اصلو كدا ..بفرح أي زول. هيثم مصطفى غابت (ضحكتو) في المريخ ..زعلان من يوم التسجيل في المريخ إلى الان. فيصل العجب ناس الهلال فاوضوه ساكت ..(الفرحة) ظهرت عليه. الهلال مفرح ..بيسعد أي زول. الفرحة الجاية وين؟. الشغيل من الفرحة ..قال عرس عديل كدا في الهلال. العجب في المريخ (خميس) فاضي ما لقاهو عشان يعرس ..شالو وقتو كلو ..وقالوا ليه في النهاية اعتزل. بي صراحة وبي كل أمانة ..وارغو وسيدي بيه (الاتنين) في فريق واحد ..ما في فريق بقيف قدامهم. أحسن من هسع تشوفوا ليكم (حضري) تسجلوه. حنسوه ..اقنعوه. حضري واحد ذاتو ما بحلكم. مع تسجيلات الهلال دي ..عاوزين ليكم (17) عصام الحضري. تلعبوا دفاع من رأس الحربة حقكم. تراوري ذاتو يبقى ليكم (عصام حضري). لو ما عملتوا كدا (سبعة) الوحدات ما بتحلكم. ونحن ذاتو ما بنقيف فيها. تاني من تسعة ولي فوق. ما عندنا فوز أقل من كدا. المريخ عندنا زي جزيرة الفيل ..أصلو ما عندنا فرق. بقيتوا واحد. هسع اوليفيه بي قصرو دا ما مفروض يلعب في الرديف. أنا عارف عمرو عمر مساعد مدرب. لكن قامتو دي قامة (رديف). شكلو رديف ..رديف. اغشكم يعني. ملحوظة : غشنا ..أحسن من تقول لينا كلامك الصادم دا. هوامش وارغو قال بعد التسجيل لوسائل الإعلام : (أنا سعيد بإختيار الهلال لي فهو نادي كبير وقد حاول تسجيلي من قبل حينما كنت لاعباً لفريق إينيِّمبا, وهذه فرصة جديدة بالنسبة لي لتقديم لعب جيد, وأنا على إستعداد لتقديم أفضل ما عندي، وأنا سعيد وأنا أشاهد الناس الآن من حولي سعداء). شفتوا الفرحة. وارغو ما دساها. أنا عرفت وارغو فشل ليه في المريخ. الزول دا كانت عينو في الهلال. تعالوا شوفوا وارغو ح يعمل شنو؟. الهلال أمس أيضاً سجل المدافع ديفيد سمبو المدافع الافريقي الصلد القادم من أوروبا. مدافع كان بيلعب في أوروبا أكيد مدافع خطير ..لأن فرص الاحتراف في أوروبا مفتوح فقط للمهاجمين. ما في مدافع ذاتو بحترف في أوروبا. ولا يكون التعاقد مع المدافعين إلا إذا كانوا تميزوا بصورة واضحة. أتمنى أن ينشط الهلال في اضافات وطنية بعد النجاح في ملف المحترفين الأجانب. ننتظر صلاح الجزولي. ونتمنى فارس عبدالله لاعب الطرف الشمال في الأهلي شندي ..لتكتمل صورة الهلال البهية. لجنة تسيير الهلال عندهم المفاجآت زي (البسكويت). حاجة أسهل من الساهل. لا بد من أن تختموا التسجيلات بي (قنبلة). القنابل ما كعبة معانا. الهلال وطنياً لم يضف غير وليد علاءالدين. عاوزين لينا لاعب لاعبين على الأقل. ليس هناك أفضل من صلاح الجزولي وفارس عبدالله. طبعاً لابد من حارس مرمى بعد شطب بهاء الدين. استمرارية بكري المدينة في كشف الهلال أهم من تسجيل أي لاعب. ناس المريخ بعد وارغو وسمبو وسيسه وكوليبالي وسيدي بيه ..قالوا بفتشوا ليهم في طريقة للتخلص من مالك وباسيرو. ما في طريقة. السيستم قفل. الهلال يجب أن يكمل تسجيلاته اليوم. الجمعة (السيستم) ما مضمون. بقينا نتعقد من (السيستم). قالوا ليك المريخاب بقوا يخافوا من طيارات الفجر. الهلالاب بقوا أي طيارة تصل فجرًا عندهم فيها محترف. يا ربي (فجر) الليلة ما في حاجة ظهرت. بالمناسبة وارغو دا لو المريخاب عرفوا الهلال بتفاوض معاه كان شافوا ليه (مريخ فاشر) في نيجيريا. المريخاب مساكين ...باقى قرشوهم سجلوا بيها فيصل العجب في مريخ الفاشر...وقعدوا يحنسوا في محمد كوكو. شفتوا موضوع العجب ..بهدل ليك الجماعة ديل كيف؟. كروجر لي هسع بضرب لي ناس بايرن ميونخ. الزول دا كمل قروشو في التلفونات. ..... وإن طال السفر - محمد عبد الماجد صحيفة قوون
