البطيخة اصلو ما عندها (نظرية) يمكن تعرف بيها سرها حلو وإلا مر؟.
بغض النظر عن حجمها وسعرها.
انت وحظك.
يعني ممكن تجيب ليك (محترف) ما فيه اي كلمة زي (وارغو)...ويطلع اي كلام.
تشرب ما تروى.
يقعد ليك تلات سنوات في الكشوفات ...(كورنر) زي الناس ما يرفعو ليك.
واول الشهر يقول عاوز المرتب.
يلعب ما يلعب ما فارقة معاه.
وارغو قال لما رجع من السودان الي نيجيريا اهلو في نيجيريا قالوا ليه كورة (بلة جابر) دي ما بتلعبك معانا.
المسكين بقى زي (بلة جابر).
تذكروا وقت المريخ سجل وارغو ...قالوا شنو؟.
قالوا المريخ ح يكون بوابة وارغو الي اوروبا ...وجمال الوالي قال في المؤتمر الصحفي..نحن جبنا (وارغو) دا عشان نستثمر فيه.
ونحن نشيل ونصدق.
دفعوا فيه (3) مليون دولار ....يعني مهرجان جمال الوالي دا في تلاتة.
قارورة موية ما استثمروها فيه.
وارغو دا المريخاب نفخو فيه نفخ.
الولد صغير في السن ..قرب يطق.
اعلام المريخ طبعا في التسجيلات اي واحد فيهم بركب ليه (بابور) طاحونة في ضهرو..ويقعدوا ينفخوا في اللاعب.
وارغو دا نفخوه ليك لمن بقى (ميسي)...يمشى ويترفع في الواطة تقول العمدة.
انت يا زول عندك (اطيان) معانا.
انت يا زول البلد دي عندك فيها نص.
في النهاية وارغو رجع (نيجيريا).
الكورنر بقى يرفعها في (الكشافات).
اهلو يقولوا ليه : دا شنو يا وارغو البتعمل فيه دا مالها كورتك بقت تمشى الكشافات؟.
يقول ليهم (موسى الزومة) برفع الكورة كدا.
ما كنت كدا يا وارغو.
خربتو (طبعو).
الكورة الفى رأسو طارت منو.
وارغو بقي لو ادوه (املاء) في الكورة يجيب (اعد).
بقى ما عندو اي شيء.
وارغو في نيجيريا ...قالوا من الساعة تلاتة بطلع (كنبتو) قدام البيت ويقعد فيها.
صاحبكم اتعود على قعاد (الكنبة).
وكمان قالوا وارغو من تمغرب بقوم من (الكنبة) يسخن ...زي ما كان بقوم هنا يسخن في اخر (5) دقائق.
وارغو كان بقوم مع (الحكم الرابع)..وقت يرفع الزمن البدل الضائع.
مسكين جابوه بي كورتو ..رجعوه (فشل في الارسال)...كورة ما بقدر يرفعها.
قطع عديل كدا.
والله (الكنبة) دي لو قعد فيها (رونالدو) تفك منو ...ويبقى زي محترف المريخ البورندي سليمانو.
بعدين ناس موسى وبلة وضفر وسعيد السعودي الكورة الفي رأسك بطيروها منك.
بجففوها.
بعملوا ليها (نضب).
تبقى (ناضبة) خلاص.
وارغو بقى ما عندو حاجة.
عامل كدا زي الزول البيقيف قدام الفرن.
قبل ما تدخل يقول ليك ما في (رغيف).
زول فقري.
عشان كدا المحترفين ديل اصلهم ما مضمونين.
اوعكم تتكلوا على (المحترفين) ديل.
الوطني ما في احسن منو.
الثابت هو الثابت.
المحترفون زي (البطيخ).
البطيخ الايامات دي طار السماء ...هو ذاتو بقى زي (المحترف).
البطيخة ب (40) جنيه.
دي بطيخة شنو دي؟.
وبعد ما تدفع الاربعين جنيه بتنتظر (الكرت).
يمكن تطلع حلوة ويمكن تطلع مرة.
مرة مشيت اشترى لي بطيخة.
عزلت لي بطيخة معقولة كدا.
قلت ليه دي بي كم؟.
قال لي : (50) جنيه.
قلت ليه : طيب وينها سيرتها الذاتية اكيد البطيخة دي كانت مزروعة في النشاط بتاع (اكسفورد).
يا حاج دي (بطيخة) وإلا (صرفة) البي (50) جنيه دي.
صاحب البطيخ ما قدر يقول لي اي حاجة قال لي خلاص شيلها بي (20) جنيه.
قلت ليه من (50) لي (20)...دي (بطيخة) وإلا (سلفية).
طبعا الزول لمن تقول ليه سلفني (50) جنيه بقول ليك معاي (20) جنيه بس.
نخلى البطيخ نرجع للمحترفين.
ممكن تجيب ليك (محترف) بدون اي ضجة وضوضاء ..وينجح ليك زي (قودوين).
قودوين دا قالوا جاء البلد دي بتاع تلفونات.
قام مشت معاه قلب كورة.
هسع سليمانو دا ..جابو البلد دي (الدهب).
ناس عصام الحاج قالوا جابوه من (قبقبة).
لو ما مصدقين كلامي دي شوفو كرتو بتلقوه مرسل من اتحاد (قبقبة) للدهب.
ما شفتوا (سليمانو) دا المباراة كلها يقوم ويقع.
وقت يقع ...بحفر في الواطة.
بفتش في الدهب.
نحن الحاجات دي بنعرفها.
الحاجات دي حافظنها كويس.
نحن (شفوت).
بعدين يا جماعة الموضوع بالمنطق كدا واضح.
ايام (التقشف) ايام عصام الحاج ..محترفو المريخ ديل كلهم كانوا بمشوا الدهب (خميس وجمعة).
بس يا جماعة عشان ما تحرجونا مع ناس الضرائب (الكلام دا ما يطلع من العمود دا).
تطيروا في عيونكم كدا ...زي (المروحة) المفتوحة في خمسة.
بعد عودة فريق المريخ من معسكر تونس ..كنت قد التقيت باللاعب هيثم مصطفى ..وسألته عن المحترف المميز في المريخ الان فاشار الي الكمروني (مكسيم).
هيثم قال (مكسيم).
هيثم مصطفى عاد وقال يبدو ان مكسيم يشكي من (اصابة) ..لذلك لم يظهر بمستواه الحقيقي...لكن (فنيا) يمتلك هذا اللاعب امكانيات كبيرة.
هيثم مصطفى طبعا نظرتو خطيرة في اللاعبين ...بعرف ليك اللاعب من مشيتو.
فيصل العجب سألته قبل ايام قليلة ايضا عن المحترف الجيد في المريخ فقال من غير تردد (مكسيم).
واضاف (مكسيم) دا ممكن يهبل المهاجم ...بثبت وبراوغ وبطلع صاح.
وعاد العجب وذكر نفس ملاحظة هيثم مصطفى ..وقال يبدو ان (مكسيم) جاء للمريخ وهو بشكي من (اصابة) لذلك لم يظهر بمستواه الحقيقي.
لكن الان واضح انه اتعالج من الاصابة ..وعاد يتألق وقد ظهر مكسيم بمستوى مدهش امام الاهلي المصري.
انا لا ارد عدم ظهور (مكسيم) لاصاباته وانما ارجع ذلك للمدرب (الكوكي) الذي حكم علي مكسيم في مرحلة الاعداد ...واصدر ضده حكم جائر وظالم وصدر انطباعه للاعلام والجمهور.
بينما كانت رؤية هيثم مصطفى وفيصل العجب ابعد من رؤية الكوكي.
الكوكي نهى مكسيم بتصريحه.
واعلام الهلال ما برحم.
فكيف الحال اذن اذا وجدوا تصريح من مدرب المريخ الكوكي يقول فيه ان (مكسيم) خارج حساباته.
انت يا الكوكي عندك (حسابات).
حساباتك كلها (فشنك).
تاميها (صلعة) ساكت.
الكوكي هذا هو الذي نهى (مكسيم)...وواضح ان هناك اكثر من لاعب في المريخ قضى عليه الكوكي.
من بين اولئك اللاعبين ...اللاعب نجم الدين عبدالله الذي تعامل معه المريخ بصورة فظة وكان غليظا معه.
وكل ذلك ..لأن نجم الدين عنده رأي في الكوكي.
علما ان كل لاعبي المريخ عندهم رأي في (الكوكي).
بل حتى اعلام المريخ ...وجماهيره عندهم رأي في (الكوكي).
لكن (التقشف)...ولا شيء غيره هو الذي يبقى (الكوكي) في المريخ الان.
صلاح ادريس يحسب له انه كشف (الكوكي) صاحب الشخصية الضعيفة جدا ...والقدرات المحدودة.
ويمكن ان نعود يوما ونذكر آراء بعض لاعبي المريخ في هذا المدرب الذي يصرف راتبا اقل من راتب (كلتشي).
اراهن منذ الان ان (الكوكي) سوف يجعل المريخ يخرج من كل البطولات هذا العام وصيفا.
ومع ان المريخ الان يتصدر الممتاز بفارق (5) نقاط من الهلال إلا ان المريخ سوف يأتي ان شاءالله ويخسر الممتاز بسبب هذا المدرب المتواضع.
الي جانب تواضع الكوكي ...فهو غير محبوب من لاعبي المريخ وليس له كلمة وسط لاعبي المريخ.
الكوكي هذا اضاع على المريخ المحترف الجيد (مكسيم)..واضاع كذلك اللاعب الوطني (نجم الدين)...ويمكن ان يفقد المريخ اكثر من لاعب في الفترة القادمة في وجود الكوكي.
الامين البرير عنده رأي واضح في اي لاعب قادم من المريخ ...ولولا ذلك لطالبنا ضم (مكسيم) لكشوفات الهلال.
لكن البرير لو شطبتوا ليه (الباشا) لن يسجله في الهلال.
على ما يبدو ان البرير غير مقتنع بي اي لاعب في المريخ.
وليس هناك لاعب في المريخ ...يمكن ان يملأ عين الامين البرير الذي يرسم ويخطط لبناء هلال قوى قادر على ان ينتفع منه الفريق لسنوات طويلة.
البرير في حضرة الاستاذ رمضان احمد السيد بدأ يعلن عن محترف الهلال القادم.
والذي سوف يصل في فترة اقصاها (48) ساعة ...وهو محترف عاجي الجنسية.
مفاجأة الهلال تسعة تلات سينات.
قالوا ليك مهاجم الهلال الجديد بجيّد (7) لغات قدام المرمى يعني ما بتلفت.
