حصل ديل قابلوكم. كتار هم ..قد تكون أنت ذاتك واحد منهم. الكلام وقت يقولوه ليكم عديل ..بتزعلوا. اتحضر..وجهّز نفسك ..يمكن الكلام دا يعنيك...يمكن تكون واحد منهم. يمكن ما يخصك في حاجة. ويمكن يخصك ..وتعمل فيها ما بخصك في شيء. في كل الأحوال ..تعالوا شوفوا الحاصل دا ..وبعدين احكموا ..أو ما تحكموا أنتوا أحرار. هي الدنيا فيها شنو؟. عندنا زول بحب (اللحمة)..وقت تقول ليه : (هي الدنيا فيها شنو؟)..بتمها ليك براهو وبقول ليك غير (نص كيلو لحمة ضان). طبعاً نص كيلو اللحمة الضان آخر الشهر قيمتو بتزيد ..وبكون عندو مكانة كبيرة. وعندنا زول بحب (السمك). وقت تقول ليه هي الدنيا فيها شنو؟. بقول ليك غير (سمك مشوي). جنو سمك. وزول تالت بحب الهلال. وقت تقول ليه : هي الدنيا فيها شنو؟. بتمها ليك ..ويقول ليك غير (الهلال) دا. دا الزول الوحيد العندو منطق في الجماعة ديل. قصدت أقول ليكم من الكلام دا ..أنو أي زول بنظر للحاجات من وجهة نظر خاصة. أي زول عندو (فهم) براهو. وأي زول فهمو جدير بالاحترام والتقدير ..ما في (فهم) ساكت كدا. أي فهم فيه فهم. ما في حاجة ساكت. وقبيل قلت ليكم (نحن أي شيء عندنا نظام). ما تقعدوا ترفعوا لي في عيونك ...زي الساعة العاوزة ليها حجر. الحاجة العاوز أقولها ليكم من بداية العمود ...وكتمتوني ليها..في ناس بدخّلوا فيما لا يعنيهم. تلقاهم قاعدين ليك كدا متل (يوم الخميس العصر). أول يوم الخميس العصر ..بقعد كدا. يوم الخميس العصر الزول بكون فاضي ..وما عندو موضوع ..عشان كدا تلقاه بدخّل فيما لا يعنيه. يعني بدون مناسبة كدا يقول ليك الجماعة طلعوا من (التمهيدي). هم الجماعة ديل طلعوا من الليلة ولّا من أمس. الجماعة ديل من قمنا لقيناهم بطلعوا من (التمهيدي). تقول (عدس). يا زول (العدس) هسع الدخلو شنو؟. هسع دا ما موضوعنا. ما تعملوا لينا موضوع ساكت. في ناس بدخلوا في حاجات ما بتخصهم..بدون داعي كدا ..وبدون مبرر تلقاهم اتسيدوا ليك الموضوع. أفضل نموذج للحكاية بتاعة (التدخلات) دي...بقصها ليكم الان. في واحد قام قال لي أنت أمريكا دي هسع ما بتتدخل في أي حاجة في البلد دي ..في زول بقدر يقول ليها حاجة. ديل رسائل الهاتف بيدخلوا فيها. قالوا أمريكا بتراقب (الواتسآب). سيطرت على العالم كلو. بتشوف الناس بفكروا كيف؟. أمريكا دي بتتدخل في العراق ...وتتدخل في أفغانستان ..وتتدخل في السودان. ديل ملامح البامية المفروكة بدخلوا فيه. ولا بقدروا يقولوا ليها حاجة. تدمجوا لينا في فاتورة الكهربة مع الموية. بس فلاحتكم فينا نحن. نحن ما ندخل إذا أدخلنا. الزول البدخل ساكت ...البشوت من طرف ..دا الزول إذا تلفونك رنّ..يقوم يقول ليك (جاتك رسالة). تجيك الملاريا أم سيسي. يا زول أنت مالك؟. تجيني رسالة ..ولا يجيني محمد علي كلاي. مالك بس؟. في ناس بعد ما يقولوا ليك (جاتك رسالة) ..بقولوا ليك الرسالة دي من منو؟. من البيت الأبيض. من ناس الكهربة. من الأممالمتحدة. من ناسنا ديل. مالك أنت يا زول؟. وفي ناس أكعب من ديل. بعد ما يقولوا ليك الرسالة دي من منو؟..بقولوا ليك (رد) ليه عليك الله. كمان يحلفوك. يمكن ما عندي رصيد. يا زول أنت مالك معاي؟. المشكلة في ناس أكعب وأكعب وأكعب من الناس الأخيرة دي. بعد ما يقولوا ليك (رد) ليه ..بقولوا ليك عليك الله قلت ليه شنو؟. يا جماعة انتوا مالكم معاي ..ما تحددوها مع الزول البشكل دا. أخطر من ديل كلهم...في ناس بنتظروا (رد) الرسالة الرسلتها. يقولوا ليك : أها الزول دا لسه ما رد عليك. يا جماعة في (تدخلات) اكتر من كدا. يقعدوا (يساسقو) ليك في الرسالة ..لمن تبقى ليهم (موضوع)...تبقى ليهم (قضية). يخلوا شغلتهم ..ويقعدوا (يصنقروا) لي (رسالتك) دي. غايتو الزول وقت يطلع من (التمهيدي) بعمل جنس عمايل. الزول ما بكون فاضي ..وما عندو شغلة. طالع من دور ال(64) ..يعني ح يعمل شنو؟. ما عندو في الدنيا دي برنامج غير (جاتك رسالة)..ورسالتك تكون ما وصلت. والأيامات دي الشبكة كعبة. بس دا كلامهم. عندنا (مريخابي) صعب. النوع الما قاعد يتعشى داك. طبعاً المريخاب بطلوا عشا من فترة طويلة. البتعشوا ليها شنو؟. المريخابي الصعب دا ..وقت يقول ليك جاتك رسالة ..طوالي أنت بتعاين في الموبايل وبتقول ليه : (الهلال جاب الرابع). شفتوا لو الهلال ما لاعب ..لمن تقول ليه (الهلال جاب الرابع) زولكم بتبهدل...وريقو ينشف. عشان كدا الأيامات دي بقى ما بسأل. ولا بقول ليك (جاتك رسالة). ما تجي...أنت مالك. تجي ولّا تطير. كمان عندكم كلام. عندنا زول تاني عامل فيها شاعر. بكتب قصائد. وقت تلقى في حالة ( شعورية) كدا ..طوالي أعرفو بكتب ليه في قصيدة. يا زول مقسم في الهموم بين بين وبين بين وجعتك بين رجعتك بين الصباح وكتين تغالب دمعتك بين فكرتك بين انشطار عارف ملامح سكتك زول منقطع زول منجدع متحاتي فيه الانحسار مستوطن الاخر وجع يا قصتك يا رقتك وكتين تحس أنو الودار في زول بغافل لوعتك هسع ..يقوم زول يطلع يقول لينا تاني ..(جاتك رسالة)...أنت مالك؟. يقولوا ليكم الكلام مية مرة. عشان كدا نصيحة ليكم من الليلة ولي غادي ...اعملوا التلفون (صامت). انتوا مالكم ومال (التنظير) دا. ريحو بالكم شوية. زمان في حلتنا الفوق ..كان جنبنا (روسي) ما كان بشرب عصير الليمون. الروسي دا وقت يمشي ليه زيارة لي ناس..الناس كانوا قصد كدا ..بعلموا ليه (عصير ليمون). عارفين ليه؟. عشان ما بشربو. في ناس (الغتة) حقتهم في (الليمون) بتظهر. أها (الروسي) دا في الفترة الأخيرة الظروف جبرتو وبقى يشرب الليمون. الروسي دا بقى وقت يمشي ليه لي ناس ..يقولوا ليه : نعمل ليك ليمون. بقول ليهم: اعملوه. الناس بقولوا ليه : الليمون العملناه ليك قبل سنة ونص ..اشربو. ما قلت ليكم. ما حدثتكم. في ناس (الغتة) حقتهم في (الليمون) بتظهر. في روسي (جديد)...النوع الما بعرف عربي داك. تسألوا سؤال ..يطرش ليك (الروسي) زي ملاح الخدرة. ما بتلفت. أنا ما عارف الروس ديل اتعلموا الروسي وين؟. الروسي القاطع دا ..مرة قالوا ليه المريخ طار من التمهيدي. الروسي الما بعرف عربي ..انفقع لينا (ضحك). يا زول مالك؟. هسع الكلام دا فيه حاجة بضحك. والروسي بضحك. يا ود الناس مالك؟. في شنو؟. البضحك شنو في (المريخ طار). الروسي قال لينا : (هسع يقولوا ليكم عاوزين ننظم دورة حوض النيل). اتفقعنا معاه ضحك. الروسي طلع فاهم أي حاجة. عارف أي شيء. دا طلع حافظهم حفظ. ملوحظة : الروسي التالت بحكي ليكم حكايتو مرة تانية. هوامش نحن الأسعد أن ملعب استاد المريخ اقترب من الافتتاح..وسوف يستقبل استاد المريخ (العالمي) مباراة الفريق أمام الرومان. الهلال في أشد الحاجة لملعب المريخ في الدوري الممتاز وفي البطولة الافريقية. استاد الهلال بدري عليه. كما أننا لا نريد (كلفتة) استاد الهلال. ملعب استاد المريخ سوف يدفع الهلال كثيرًا في مبارياته الافريقية والمحلية. كمان استاد المريخ فيه كلام. أحسن استاد في البلد. (ما تسمعوا الكلام دا)..نحن بنقول كدا فوق رأي. فوق فهم. كمان ما تقولوا الحكومة دافعة كتير في الاستاد. يعني عندنا نص في استاد المريخ. على العموم جمال الوالي ومجلسه سوف يفتح استاده للهلال من أجل مبارياته الافريقية ولتمثيل السودان بصورة جيدة. حزنا لرحيل نجم الرابطة والموردة السابق محسن عبدالله. نسأل الله له الرحمة والمغفرة ..ولا حول ولا قوة إلّا بالله. حال الدنيا ..والموت ما بقيف. كلنا إلى ذلك المصير. اجازة ملعب كريمة. كدا يا محمد النصري بقى ما عندك مشكلة. يعني ممكن تغني في استاد كريمة (افتكرتك)..والاتحاد الافريقي ما يقدر يقول حاجة. محمد النصري طبعاً ...وتر وكفر. كورة النصري عندنا فيها ألف كلام. لكن غناك ..ما في زول بقدر يقول فيه حاجة. بس ما تتابع لي المريخ دا ...مع التمهيدي دا ..فاصل ما بتكملو. ناس طلعوا من دور ال (64). يعني لو غناك قدر كورة الجماعة ديل يا محمد النصري ..(كوبليه) واحد ما بتكملو. بس (رمية) والحفلة تنتهي. الجماعة طلعوا من دور ال(64). المحيرني (اتوفيستر) دا بعد السن دي جاء يعمل شنو؟. غايتو إلّا تفتحوا ليه (استوديو) تصوير في ودنوباوي. يتخيل لي الزول دا ينفع (مصور). شكلو كدا بتاع استوديو تصوير. أنت يا اتوفيستر عندكم زول في العائلة (مصور). كمان نحن ما بنعرف (التصوير). كورة شنو كمان بعد السن دي. غايتو يا بلة جابر اتوفيستر دا إلّا يقعد يقص ليكم. يحكي ليكم بس. لكن يدربكم ..دي ما تعشموا فيها. .... عاجل : كمان بطلعوا من دور ال(64) وبتكلموا عن محمد وردي. وإن طال السفر - محمد عبد الماجد صحيفة قوون
