عِرِث.. ثُهير:- قال لها ابنها ذي العشرة سنوات وهو يقرّض رغيفة مع شاي الصباح قال لها وما زال يلوك في الرغيفة في خشمو "يمه الليلة ما تخلوني من المدرثة دي؟.. يمه؟.. البارح انا حلمان انتي مشيتي الحج" قالت ليه وهي تعدل من لياقة قميصو "إن شاء الله يا يابا.. إن شاء الله من خشمك لي الله" ثم أردف بعد ان ازدرد الرغيفة "وحلمان لأبوي جنث حلمة ثمحة خلاث".. عاينت ليهو بحب امومي.. وقبلته في جضمو.. وقالت ليهو "أها أبوك معاي في الحج؟" قال ليها بعد قضم رغيفة وجغم من الشاي "لا لا.. حلمان ابوي عرث ثهير جارتنا.. والحفلة رابة جنث ربة.. والله رضصنا جنث رضيص". لبعتو في ضهرو وطارت الرغيفة من خشمو "يعرس ركبيكم انت وابوك.. قوم امشي مدرستك.. قامت قيامتك" وفي خشم الباب.. قابلته سهير فصفق بايدهو الاتنين " ثهير ثهير.. أنا حلمان أبوي عرثك".. قالت لها الأم وهي تصر للشافع "ما تصدقيهو.. وحاااات الله كضاب الشافع دا.. يا ولد انت اصلو كضبك دا ما بتخليهو؟" فشمت الأم سهير لمدة ثلاث سنوات متتالية إلى أن تزوجت سهير من رجل آخر..! القيامة:- في الغناء الشعبي:- فنان وكورس "شيالين" أي شيالين أكتر من تلاتة يعتبر تجمع غير مشروع.. وبداية انتفاضة ومظاهرات.. سمعتو.. في إحدى القنوات.. معاهو أكتر من سبعة شايلين.. وأنا بين نايم وصاحي.. عندما صرخوا "الندامة.. الندامة.. النداااااااامة.. النداااامة.. . الندااامة.. الندامة".. قمت مخلوع قعدت، وقلت "أشهد أن لا إله إلا الله وأشهد أن محمداً رسول الله.. قامت واللا شنو؟".. سمعتها القيامة ثم شحدت الله ناس البوليص يقتحمو القناة دي!! خُلعة:- كانت في المتبخ تسوط في بصلة وهو راقد في البرندة جنب المتبخ قال ليها "انتي جارتك علوية دي، خلاص يعني؟ طلقوها طلقوها؟" قالت لو وهي تدق في الحلة بطرف الكمشة "أي ييا.. طلقوها.. عليك الرسول الراجل تطيرو وين؟" قال ليها وهو يشهّق "قلتي كدي؟.. خلاص الحقيها انتي طلقانة" ختت الكمشة في جيب القميص اللابساهو وجات مارقة.. غزت ايديها الاتنين في نصها وعاينت ليهو "أجي.. يا عبد القيوم.. انت أصلو الزول ما يتونس معاك يا كافي البلا؟"!! قصيدة الضُفُر:- حاسي انو.. ومصدق انو شاعر.. والخلاهو يصدق اكتر انو شاعر أصدقاء السوء.. كل مرة شابكنو يا مبدع يا مبدع ركب هايص كنبتين متقابلات.. جلست أمامه.. وقعت عينو علي جزمتها المخرومة ومارق منها أصبع كراعها الكبير والضفر واضح فكتب قصيدته:- الضُفُر: في هايص شفت العجب.. شفت أصبع من خرم الجزمة مارق يعاين لي زي الضب.. خلاني اتراجف أدق جرس.. خلاني اتكبكب ضفرك المحفحف لارهيف لا سميك ضفرك انتي يا ست البنات سراميك مترو بكم؟ الباب البجيب الريح- صحيفة اليوم التالي
