* أمس مشينا الكورة * نسوى شنو عاد * زماااان كلمتكم * قلت ليكم الإنفصال ده ما من صالحنا * الناس ديل ببقوا لينا فى روحنا دى * لأنهم برغم إنهم دولة وليدة * إلا أنهم فى الرياضة بالذات بيشتغلوا صاح * المهم * أدينا شوط أول مختلف تماماً عن الشوط التانى * طلعنا كسبانين تلاتة صفر * وشفنا هامان * هامان الطرف الشمال * الزول بعرف كورة * لكن بقدر ولا ما بقدر دى بتحددها الأيام * أما المهاجم * فالذى شاهده فى الفيديو * أو شاهده من قبل * يستغرب للحجم الكبير جداً الظهر بيهو أمس ده * وده دليل على انو طول ما لعب * طيب طول ما لعب لييييه؟؟؟ * من ناحية إمكانيات شفناهو زمان * كلمة ما فيهو * وكتير على أفريقيا كلها * لكن التوقف لدرجة يسمن السمن ده كلو بولد سؤال * واقف ليه وهو بالمستوى ده * ياربى الإصابة أحد إحتمالات أسباب التوقف؟؟؟ * يا دكتور أسامة حافظ أفتينا * وفتفتو حته حته * كفاية أليغا تانا والمقلب الإتعمل فينا * المهم * شفنا هامان * أول مرة نسمع بى هامان أحسن من موسى * والغريبة هامان جانا بعد فوتنا الفرعون * أيها الناس * الشوط الثانى دخل الباشا وفيصل موسى وغاندى * الملكية إمتلكنا * لأنها تلعب برجولة وخشونة وإلتحام قوى * ولقت البلد فاضية * فيصل يقع يقوم موسى * بقع موسى يقيف فيصل * أما غاندى * فعربات جوبا كلها مشت بى سايدو * والباشا باشا يا باشا * وكثير رددنا * اللاعب الما قوى وشرس ما بلزمنا * الفات مات * جيبوا لينا أجساد قوية * العضلة قدر جيب البندقية * دايرين زول كفر موبايلو قدر الركشة * ناس تقاتل فى الأدغال * عشان نرجع الى منصات التتويج الأفريقى * لكن مع تملس ومن شابه تمليس ما ظنيتنا حانشم منصات التتويج * المهم * برة جابر كان بله * أقصد بله جابر كان برة * راجى أدى ما بطال * طبعاً مهارة لا يقارن ببله * لكن لياقة يخجلنا شوية * فى شنو يا راجى * أيها الناس * من الأمور الغريبة نفاذ مخزون اللياقة البدنية عند ناسنا * وما شاء الله عند ناس جوبا شاحنين فل * وين المعسكرات يا ناس؟؟؟ * ونرجع نعود الى غياب صانع اللعب المفيد المنتج * والسيد أوتو يصرح بأنه ما داير لاعب وسط مهاجم * طيب كيف حاتهاجم يا راجل يافاهم؟؟؟ * أيها الناس * باسكال يثبت كل يوم أن الفارق بينه وكثير من الناس كثير * أمس خارجنا بى باص القون الرابع * المحور العصرى يصنع اللعب ولا يكتفى بالجانب الدفاعى * وباسيرو فعلها أيضاً فى الشوط الأول * إلا أنهما إضطربا كثيراً بعد دخول غاندى وفيصل وباشا * كبرت المساحات عليهم لسلبية القادمين * عشان كده بذلوا مجهوداً شتت الجهود * ياناس * سيبونا من العواطف والتنظير * لاعب فى المباراة الواحده بقع اربعين مرة * قرعة الأراضى ما بتقع فى الخطة الإسكانية أربعين مرة * أيها الناس * إذا مافى صانع لعب قوى وثابت وحريف * جربوا نمر * والله ما بتندموا * إبراهومة مالو؟؟؟ * ميسى ده جربتوهوا؟؟؟ * الحكاية دايرة قرارا شجاع * المهم * محمد إبراهيم أمس لعب الشوط الثانى * ولجت شباكه هدفان * الأول خطأ منه * لكن نجد له العذر * سنة مالعب * أما الثانى ضربة جزاء لا يسأل عنها * أمير رجع للثقة البكتلنا بيها الزمان ديك * ومزيداً من التجارب لمحمد إبراهيم * تزرع فيه ثقة كبيرة * أيها الناس * الملكية خطير * ومتطور * وغيور * والله يستر ما يقابل فى الأدوار الأولى أفريقياً السنة الجاية فريق من عندنا * بعملها * أسى كان فى داعى للإنفصال ده؟؟؟ * برانا متضايقين * لكن يا ناس التسجيلات ورونا عينكم الفاحصة فى كورة أمس * ما بوريكم النمرة * الجماعة بخنقوها * بالتلفون يا حبايب * الزول ده مغروضين في نوعو ده شدييييييد * المهم * وإنت السادق * أقصد فاطمة الصادق فى برنامجها المحايد * كنت أتوقعها تخصص حلقة لما قاله المصور لجمعة * ده إذا قال طبعاً * لكن ما عملتها * لعل المانع خيراً * بالمناسبة دى * وليد بشرى الهلالابى قال لى * المصريين ديل بعملوها بس ما واضحة * وقال لى * زمان كنا فى القاهرة * مشينا الموسكى معاى قريبنا * قريبنا ده برغم خفة روحو إلا أنو قبيح قبيح قبيح * ككو بس * فى الموسكى وقفنا قدام طبلية *قريبنا قعد يهبش فى البضاعة * صاحب الطبلية المصرى قال لى قريبنا * عاوز أيه يا بيه * قال ليهو عايز الوش الشين البخوف بتاع البلاستيك داك * المصرى قال ليهو وتعملبوا أيه ماهو عندك واحد * قلت ليهو المصريين * بعملوها * لكن أصلو ما تخلوهم * أها * نجى لى شمارات والى الخرتوم * أكان شفت يا والينا * طبعاً يا والينا * إسم القاهرة أساساً على النجم القاهر * والنجم القاهر هو المريخ يا والينا * والإنتخابات فى مصر مدورة بدونا وبينا * والسيسى شعارو النجمة يا والينا * أها نبقى مع نجمتنا ولا نبقى مع حكومتنا يا والينا سلك كهربا ننساك كيف وفى عز الصيف. والللللللللللى لقاء سلللللللللللللللك في السلك - بابكر سلك
