قال ليه : (مالك فرحان كدا ؟ عامل قميصك المشخط دا)...اذكر أننا في سنوات مضت (بدون تحديد)..ارتبط الفرح عندنا بالقمصان (المشخطة). بدون فهم كدا بس أو ربما عنده أبعاد لوجستية أو سيكلوجية.
بقى عندنا أي زول لابس ليه (قميص مشخط)...المعنى أنه (فرحان).
لو لابس قميص (سادة) ..لو نططت قدامنا زي (القرد) أنت لا فرحان ولا حاجة أنت بتظاهر ساكت.
والفرح ذاتو خشم بيوت.
الزول لو قالوا ليه من باب الاستخفاف ..(أنت زول فرحان ساكت)..هو بذلك أكيد شتموه ..وطلعوا عينو.
زي (الفرحانين) بتوع اللجنة ديل.
المهم هو أن الفرح ارتبط عندنا بالقمصان (المشخطة)..وفلسفة القمصان تلك ..أمر غاية في الأهمية ..ما تعاينوا ليها كدا.
وقد كنا نقيس الأمور على ذلك النحو.
الأستاذ وقت يدخل الفصل لابس ليه (قميص مشخط)..ذلك يعني أن الليلة (مزاجو) تمام ..ح ينكّت ويقص في الحصة...وما ح يسأل ليه طالب من رسوم الحصة الصباحية أو قروش الامتحانات.
هذا يعني أن الحصة (خالية من الجلد).
شايف الجماعة ديل قالوا شالوا (الجلد) من المقرر نحن زمان (الجلد) دا عندنا أساسي في المدرسة زيو وزي (الرياضيات).
يعني أبو الفصل زمان (لا أدري أن كانت هذه التسمية موجودة الآن أم لا؟)..أبو الفصل زمان كان وقت يضع (جدول الحصص) ..بخصص الحصة الرابعة أو الخامسة يومياً للجلد.
هسع ديل قالوا شالوا (الجلد) من المقرر هم ديل خلوا شنو ما شالوه؟..أي حاجة شالوها من المقرر.
ديل (الميدان) الكنا بنلعب فيه جوار المدرسة زمان شالوه.
مرة قعدت اتصفح في كتب مقررات الصف الخامس أو المستوى الخامس (زي ما بقولوا هسع) ..شفت الرياضيات ..ما فهمت فيها أي حاجة...دا شنو ؟..المقرر دا جابو من وين؟.
رياضيات (مدغمسة) دغمسة يا عباس.
دا شنو؟..أنا قلت (عباس)...يا جماعة ما تقولونا كلام ساكت.
شوفوا القال (عباس) منو؟.
أعرف أن الكثير من التشريعات القانونية المدنية استمدت من القانون الهندي.. الرياضيات حقت الصف الخامس دي يكون جابوها من المقررات الهندية.
احتمال ..ما في حاجة بعيدة ...لا سيما وأن (ولد الجيران) عندنا في الحارة بقرأ في الصف الخامس ...العصر وقت يطلع يلعب مع الشفع بعمل ليه حركات هندية.
الحركات الهندية دي يمكن من الرياضيات.
غايتو أنا شايف الرياضيات البدرسوا فيها الشفع ديل ما بستفيدوا منها فى المستقبل.
رياضايات ما عندها أي علاقة بالحياة.
يمكن تقولوا عني بالنسبة للرياضيات فقط ..(عشان ما تلخبطوا الكيمان) يمكن تقولوا عني أني زول (رجعي).
لكن بالجد كدا ..شايف رياضياتهم البدرسوها دي زي (كلام الطير في الباقير).
رياضيات ما عملية ..وأظنها كذلك ما علمية.
الطالب لو عاوز يحرجك يقول ليك أشرح لي (المسألة) دي.
طوالي تقول ليه : أنا لسع ما صليت العصر ..أصلي واجي أشرح ليك مسألتك دي.
تصلي وتطلع بالباب التاني.
نحن زمان الرياضيات دي لو ما طبقوها لينا بالواقع العايشنو ..ما بنفهمها.
الرياضيات ذاتها كان بدرسوها حسب (البيئة) ..ناس يقولوا ليهم لو كان عندكم (7) غنمايات ..ماتت فيهن غنماية ...بكون فاضل ليك كم غنماية؟.
6 يا أستاذ.
شاطر أقعد.
طيب قوم أنت لو كان عندك (12) حمار ...في (4) حمير ..شردن منك ...بكون فاضل ليك كم حمار؟.
الطالب يقول للأستاذ ..يا أستاذ أنا مع الحمير الشردن ولاَّ مع الحمير الواقفات.
الفصل كلو يقعد يضحك.
الحياة كانت حلوة ..وظريفة ..والفصل كلو بضحك ..ما زي هسع الفصل كلو جاحظ بصرو في الكتاب.
شفع الزمن دا الواحد تلقى في رابعة ابتدائي ولابس ليه (نضارة) أبوه ما لابسها.
شفع الزمن دا (الصلع) عملوها في مرحلة الأساس.
الحياة اتغيرت.
طيب يا ولد لو عندك (حواشة) قمح ..بطلّع ليها في الموسم (16) شوال قمح ...الحكومة بتشيل منهن كم؟.
أقيف يا أستاذ الشيء دا عاوز ليه حساب تقيل ...(أديني فرصة).
ايوا ..الحكومة بتشيل (20) شوال ..ابقى مطلوب من الحكومة بعد الحصاد (4) شوالات قمح.
يعني (-4) يا أستاذ.
أقعد شاطر ..بمطلوبات الحكومة ..ورسومها وجباياتها ..اتعلمنا (السالب).
الأستاذ ذاتو قال لينا أنا بقيت أمشي عشان أصرف (الماهية)..القى ليك الحكومة هناك مستقطعة المرتب كلو شيء ضريبة دخل وشيء قيمة مضافة وشي دمغة جريح...الواحد في النهاية يلقى نفسو مطالب - يطلع (الساعة) من ايدو عشان يديها الصراف ..و يمضي على الكشف ويتخارج.
أها بالطريقة دي بقيت كل شهر ..أفقد (ساعة)...بقيت يوم يقولوا الليلة يوم واحد أشيل لي هم على ساعتى.
أما في الخرطوم فالمسائل الرياضية كلها بتكون على ذلك النسق ..(15) تفاحة أضفت ليها (7) تفاحات بكون عندك كم (تفاحة).
أها الزول أبو قميص (مشخط) داك نسيتوه ..ولاَّ متذكرنو؟.
يا جماعة ما تسرحوا.
الزول قلت ليه : المفرحك شنو؟.
قال لي عملوا لينا لجنة فيها (17) عضو ..عشان تدير المريخ في الأربع شهور القادمة.
قلت ليه لجنة ومن (17) عضو ..وعشان تدير المريخ (4) شهور فقط.
ليه (الكترة) دي؟.
زولكم قال لي (الكترة) بتغلب الفلس.
قلت للزول أنت عارف الوفد الذي سافر إلى أديس أبابا قبل أيام بقيادة إبراهيم غندور عشان يفاوض في مسألة تهم السودان كله وكان ممكن تنهي تلك المفاوضات مشاكل السودان كلو ..عارف الوفد دا كان فيه كم عضو؟.
قال لي ما عارف؟.
قلت ليه كان فيه (15) عضو يا حيدر المكاشفي.
أنا قلت حيدر المكاشفي.
الظاهر كدا.
الوفد دا فيه (15) عضو ...والمفاوضات دي يمكن تستمر (سنة) أو خمس سنوات ما معروفة ...ناس المريخ ديل ..القاعدين حدانا هنا في العرضة جنوب عملوا ليهم لجنة فيها (17) عضو لمدة (4) شهور.
ليه؟.
ليه (البزار) دا؟.
هسع يا جماعة لو وفد التفاوض دا كان فيه مدير شركة أو صاحب (مزرعة دواجن ساكت)...ما كان المفاوضات يمكن تكون أفضل وأحسن بدل ما تكبوا الناس العندها قروش كلها في لجنة تسيير المريخ ..وتخلوا (لجنة) التفاوض ديك قاعدة في السهلة.
عليكم الله (لجنة التسيير) حقت المريخ دا ...ما تخلوها تضيع قروشها ساكت في ناس بلة وموسى وضفر ومكسيم.
لو عندهم قروش ..خلوهم يعملوا ليهم (شارع)..ويسفلتوه.
لو شفتوا لينا (المدينة الرياضية) دي موش أحسن ...من اللجنة الراصنها لينا دي زي (صورة التخرج).
أنا أول مرة في حياتي أشوف لجنة تسيير فيها (17) عضو.
لجنة زي فصل الإعادة...(فيها ناس كبار شديد).
وكمان فيها ناس عايدة...(من زمن كأس مانديلا).
أحكي ليكم حاجة.
بس يا جماعة خليكم عارفين ...(الكلام دا ما يطلع من العمود دا).
قالوا ليك أول اجتماع للجنة دي الأعضاء اتلخبطوا..(طبعاً ما بتعارفو).
ديل يفرزوهم كيف؟.
طيب يا جماعة الأمين العام للمجلس يرفع ايدو.
قالوا ليك أربعة رفعوا إيديهم.
يا جماعة الأمين العام للجنة الشكلها الوزير ...منو؟.
في اتنين نزلوا ايدهم.
يا جماعة الله ..اللجنة دي فيها أمين عام واحد.
الزول داك حلف ما ينزل ايدو.
دي يحلوها كيف؟.
بس قالوا ليك في واحد من الاتنين الرافعين ايديهم ديل ...استدرك ..وقال انتوا قلتوا الأمين العام للجنة وإلا قلتوا الزول العندو مزرعة دواجن.
قالوا ليه : قلنا الأمين العام للجنة...الدواجن الدخلها هنا شنو؟.
زولكم طوالي سحب ايدو.
غايتو ناسكم الكتار ديل ..عارفين بذكروني شنو؟.
بذكروني ليك بالإعلانات والحملات المدورة الأيامات دي في شركات الاتصالات تحت مسمى (سجل بياناتك).
أها الجماعة ديل ال (17) عضو ديل مفروض يسجلوا بياناتهم ..عشان نكون عارفين ...ما تقعدوا تلخبطونا ساكت.
أمس عبدالصمد عثمان قال لرمضان أحمد السيد ..انو ما كان عارف نفسو في تلك اللجنة وأنه تفاجأ بالقرار بعد إعلانه ..وأنه لم يتصل به أحد أو شاوره.
دا كلام يا جماعة.
أنت يا سيادة الوزير ...اللجنة دي شكلتها من (دليل الهاتف).
زول ما تكلموه ...تدخلوه اللجنة.
اخطار ساكت مافي.
بتاع مزرعة الدواجن أكيد ما شاوروه.
هذا الأمر يدعم مقولة إن هذه اللجنة نصها هلالاب ..نائب الرئيس حقها كان مرشح للجنة تسيير في الهلال.
وجمال الوالي معروف عنه (هلاليته).
واحتمال يكون في هذه اللجنة كم هلالابي كدا (مندس).
اصلو لجان التسيير دا بشكلوها (عشوائياً).
من طرف بس.
لذلك لا استبعد أن يكون اللجنة دي فيها (أجانب).
يمكن تكون (لجنة أجنبية)...في بعض الأسماء ...ما سمعنا بيها ..ولا شفناه.
الحاجة التانية ..البتدعم الكلام دا.
قالوا ليك أول مرة اللجنة دي تمشي لتمرين المريخ ...أعضاء اللجنة كلهم كانوا بسألوا.
أي واحد فيهم بسأل التاني.
أسمع أنت الزول البمشي كويس ..وبكمل اللاين ..وبعكس الكورة في (الكشافات) دا منو؟.
واحد من المشجعين يقول ليهم : (دا موسى الزومة).
كمان ما بتعرفوا موسى الزومة ...(لمعلوميتكم الزول دا بي كشافاتو دي كان مفروض يحترف في فرنسا بس ما لقى حجز).
طيب الزول ..البمشي خطوة ..وبقع جوز ..وكل مرة برجع يكورك في (الحكم) دا منو؟.
دا بلة جابر ...كمان ما بتعرفو بلة جابر ..دا صاحب أشهر هدف في الدوري الممتاز.
هدف زي (العفش داخل البص على مسؤولية صاحبه).
كفتك ليك الكورة زي الحديّة.
طيب الزول القاعد التمرين كلو يربط في الكدارة دا منو؟.
دا ضفر...كمان ما بتعرفوا ضفر.
والزول الهناك ...البيلعب بي عقل ..من غير ما يتعب ...يديك الكورة زي (الجلي)..دا منو؟.
دا هيثم مصطفى ...كمان ما بتعرفوا هيثم مصطفى انتوا جيتوا من وين؟.
انتوا هيثم مصطفى دا موش كابتن الهلال؟.
كابتن الهلال شنو ؟..الكلام دا كان زمان ..أنت قاعد وين يا زول...هيثم جاء المريخ.
وفيصل العجب وين؟.
فيصل العجب ...الزول الزعلان داك ...الما بتكلم مع زول.
والباشا.
الباشا ...ما في قالوا منتظر خبر سعيد.
خبر سعيد غير لجنتنا دي...(الزول دا متمرد ولاَّ شنو؟).
الطريف في الأمر أن الأمين العام للمريخ الجديد الفريق طارق عثمان إبراهيم (شفت الاسم والله من الجريدة ما بعرفو) ..الأمين العام الجديد دا طوالي احتل ليك مكانة عصام الحاج في قناة الشروق.
أول جمعة ليه ظهر ليك في (ساعة رياضة).
مستعجل شديد على الشروق.
الزول دا موش ساعة الاستضافة في البرنامج كان عمرو في المريخ (24) ساعة الأمين العام دا ..قعد يتحدث في الأمور الفنية ..والبطء وسرعة اللاعبين...والهجمة المرتدة ...واللعب الهوائي.
يا زول أنت جابوك في اللجنة دي مدرب ولاَّ أمين عام؟.
لو دا أمينكم العام ...لجنتكم دي اقنعوا منها.
منها العوض وعليها العوض.
تصوروا الأمين العام بعد (الشركات) الكتيرة دا ..وبعد عفراء والسلام روتانا ومزرعة الدواجن وقناة الشروق ذاتها ..قال عاوزين لاعبين عينة هنو وعلاء الدين بابكر.
دا شنو دا؟.
الزول دا قاعد وين؟.
بتكلم كيف؟.
ليه بقول كدا.
احبطنا والله.
بعد التعب دا تقول عاوزين لاعبين عينة علاء الدين بابكر وهنو.
ديل على كدا بكون طمحوهم يثبتوا المريخ في الدوري الممتاز.
بس المريخ ما ينزل.
هنو شنو يا سيادة الفريق؟.
هنو في فريقو (الأهلي الخرطوم ما بيلعب أساسي)...وعلاءالدين بابكر بعد العمر دا ...لسع بخاف من الطيارة.
تاني عاوزين يرجعوني لي ركب ..ما ركب ..وسافر وما سافر.
انتوا لجنتكم دي تموها من ( دار الوثائق).
والله الحاجات دي لو انتوا بترضوها للمريخ نحن ما بنرضاها ليه.
