* فى البر يطير * فى النيل يغرق * أنه المريخ العظيم * هذا هو حال الفريق ايها السادة * يسجل التاريخ اى شى * يسجل السمح والسين * والشين كتر * حتى أضحى فريق الكرة دشن جداً * مليان شنة * وأقبح شئ فيه * هو الإستهتارهو عدم إعتبار الشعار * هو الدلع والعجن والمسخرة * أيها الناس * إعترفوا بفشل دفع ثمنه الكيان * إعترفوا بقوة راس أضرت بنا وأخجلتنا نتائجها * ولذا تفشل كل الأشياء * فكونا من الذين إنتفخت بطونهم من خير المريخ * فكونا من الذين إشتهروا بالمريخ وشهروا به * فكونا من سماسرة أدمنوا إسكراب دبى * يأتون الينا كل موسم بإسكراب من نفايات دبى * وندفع الثمن * من سمعتنا * ومن تاريخ فريق كبير وخطير * أضحى لايهابه حتى أصغر الأندية المحلية داخل الملعب * إعترفوا * صبرنا عليكم * وصبرت الجماهير صبراً * حتى خلتنا من أحفاد سيدنا أيوب عليه السلام * أيها الناس * أى شئ مدتو إنتهت بسمم * بكتل عديل كده * وأوتوفيستر خبير نعم * لكن مدتو إنتهت * لأنه ليس من المنطق أن تلعب بإصرار بدون صانع ألعاب * وتصرح بأنك لاتحتاجه * من سيصنع اللعب للمهاجمين ولو هاجمت بسلاح الجو الأمريكى يا فيستر!!! * حتى أمس * التغيير منذ العشرة دقائق الأولى *يستحقه المستهتر غير المسئول المدلع الأنانى غير المنتج المدعو تراورى * فإذا بنا نفاجأ بأن السيد فيستر يغير تراورى التانى * إتنين تراورى ما عصرتوا علينا يا ناس؟؟؟ * عليكم الله جيبوا لينا ستة شيميلس بالشطة يا حبايب * وتلاتة فيصل موسى وصلحو * عشان كده بجيبهم لينا * أيها الناس * هذا التراورى بايخ ومستهتر * وأمس لعب بطريقة أنا داير أبوظ الدافورى * الطريقة التى يتبعها اى صعلوك فى الحلة * يتبعها تراورى فى المريخ * لأننا نسكت ونسامح ونجامل * أين التدريب وراعى الضان فى الخلا يعلم ان باسكال بضيع البلنت ولو القون فاضى * كيف تختاروا يشوت؟؟؟؟ * والغريبة من المختارين كان تراورى برضو! * وهو الذى بإستهتاره أضاع لنا ألف ضربة جزاء * أيها الناس * لا للتنظير *بكره ينطوا لينا ناس * ينظروا * أيها الناس * أيها الناس * الإصلاح فى ذهاب المجلس بأذنابه والمعارضة بأضنابها والجهاز الفنى والإدارى واللاعبين * يبقى فقط الجمهور والإستاد * عشان نبنى مريخ جديد يشبه القديم ويشرفنا * غير كده يبقى بنحرث فى البحر * فشل فشل فشل * ما معقولة ياخ * أيها الناس * الفريق الطيرنا أمس ده أكاديمية * يعنى ممكن نطير برضو إذا شاركنا فى الدورة المدرسية * معقولة يا فيستر يصنع لينا لعب ود أم لعاب؟؟؟؟ * شيميلس ده لا يملك الحجم الذى يعينه على المدافرة فى موقف جاكسون خليك من ملعب مليان عضلات * وفيصل موسى والباشا ورمضان عجب * لايصلح فيهم واحد للإعتماد عليه فى صناعة اللعب * بل زى ديل عايزين صانع لعب يصنع ليهم اللعب عشان يلعبوا * أيها الناس * سامعين ببعض الأمور من بعض اللاعبين ضد هيثم * شوفوهم * تلقوهم كلهم بيلعبوا مليس وإستهتار * ولأنو هيثم طوالى بوجه وينهر ويحاسب * عشان كده ما دايرنو * ما دايرين زول بقول يا فلان أنزل معاهو * وما دايرين زول يجبرك بالباص إنك تجرى وتبذل مجهود * ديل يمشوا سواء قعد هيثم او مشى *أما هيثم فله حرية الإختيار * شخصياً المرة لو قالت لى راجلها طلقنى * مفروض تبيت فى بيتهم طوالى * لو حنسوها تانى ما بتنفع كزوجة تعتمد عليها * أياً كان خيار هيثم * الحقائق لازم تظهر * وتسجيل صانع لعب آخر غير متوقف على إستمرار هيثم من عدمو * وهيثم حتى لو فارقنا * فإنه لن يعود للهلال البتة * لأن كرامة هيثم لا تسمح له بالعودة لكيان وقف متفرجاً عليه وهو يذبح نهاراً جهاراً * لأن كرامة هيثم تذكره دوماً بالذين وقفوا معه فى الحرب ضد البرير * ثم زاغوا فى منتصف المعركة * بل وشاركوا فيها معاونين للبرير ضد هيثم * زى ديل يرجع ليهم تانى كيف؟؟؟ * أيها الناس * أحرجتونا * أى بطولة شاركنا فيها أخرجونا منها * بقينا محرجين حتى من مخداتنا التى تشهد على سهرنا على هذا الخذلان * نسوى شنو؟؟ * نطفش؟؟ * نمشى الدهب يعنى؟؟؟؟ * أيها الناس * الجماهير كمل صبرها * والما واثق من روحو ما يجينا * والبجى مسؤول من نفسو * فالشعار لاصبر لاتسامح لاإستسلام * والإدارى او اللاعب داخل الإستاد على مسؤولية نفسه * أها * نجى لى شمارات والى الخرتوم * أكان شفت يا والينا * نادينا ينادينا * ومافى زول يتدخل فينا * موش نادينا سلك كهربا * ننساك كيف والتاريخ غير السقطات بقى ما بسجل لينا والللللللللللللى لقاء سلللللللللللللللللللك في السلك - بابكر سلك
