استغرب فيهم الدكاترة النفساويين ديل.. الواحد فيهم يقول ليك عندك انفصام شخصية أو هستيريا النمل.. وفوبيا القعونجات.. وهم ما بتجيهم أي حاجة؟.. هم برضو ما بيمرضو؟.. ما بيتعادوا من مرضاهم.. حتى لو عدوى بالإيحاء.. دكتور الباطنية ممكن يتعادى من مرضاهو.. دكتور الجراحة تحت أي ظرف.. الوقاية والتعقيم فيهو تعبان ممكن يتعادى من مريض.. ويرقد ستية.. (ستية يعني.. لا ايد لا كراع).. لكن دائما في الأفلام والمسلسلات والمسرحيات المصرية بيجيبوا لينا الدكتور النفساوي مسحلب.. المرض النفسي والعقلي.. ما عندو مسبب واضح قدامك.. تقدر تقول أنا أحوش المسبب دا وأقدر أسيطر على المرض.. محتاج اجتهاد شديد وتعب شديد لحدي ما تحدد السبب شنو؟.. والجن ثقافة زيو وزي الأكل واللبس والبكيات زي ما قلت قبل كدا في مقال سابق.. زمان الزول البيبدا يجن بيركب القصبة.. يركبها وكأنها حمار.. ويقعد يفنجط ويبرطع.. دا مجنون في السودان.. وفي السودان في مناطق الحمار هو وسيلة المواصلات الوحيدة.. والحمار السمح ومشاي يعكس الوضع الاجتماعي لصاحبو.. نلقى في المدن الناس البيركبو الصواني الموجودة في نص البلد ويقعدو يمررو في العربيات.. الزول البيركب القصبة وعلاقتها بجنه وبالحمار.. نجد أنه كان نفسيا يعاني من مشكلة لها علاقة بالحمار.. وعليه فقد سحلب بالحمار ركوبا.. ويذكرني بقصة مشهورة عن المغترب الاستثمر قروشو كلها في السكر.. اشترى سكر كتير وشحنو في لوري من الجنيد بغرض بيعه في الخرتوم بأسعار عالية.. وفي البانطون بتاع رفاعة.. البنطون غرق وغرق معاه لوري السكر.. والسكر اتماص في الموية.. والزول بقى مباري البحر.. وكل مرة يضوق الموية باصبعو وماشي ويقول(حرم لي هنا حلو).. وأظنو وصل معاهو لحدي البحر الأبيض المتوسط.. وهو بيتخيل إنو سكرو طعّم البحر كلو.. معاهو حق والله كل سنين غربتو راحت في شربة ميه.. والله خايف الجماعة الداسين السكر الأيام دي تجي مطرة قوية يتماص كلو.. وستات الشاي يغرفن من مويتو.. ونحن نجغم ولو معاهو كراتين شاي اتماصت برضو، تكون جاتك من الله يا خادم الله.. ينقسم الجن إلى أقسام منها الجن الكلكي.. والجن الترللي.. والكك.. والسحلبة.. والجن هو أن تفقد منطق الأشياء.. النضم.. المشي.. السلوك.. ولا يخرج الجن عن الشي الحاصل في دنيا المجنون لما كان واعي.. فنجد الرجل الذي سحلب.. ملخصاً الوضع السياسي والاجتماعي والاقتصادي.. بقى يتفّن في نص موقف المواصلات.. وقدامو تلاتة كيمان تراب ويكورك للناس.. (يا ناس هوي عاينو جاي، الراجي الحكومة تتقلب الكوم دا في خشمو) ويكشح الكوم الأول.. (والعندو ولد ولدو، وراجيهو ينفعو، الكوم دا في خشمو) ويكشح الكوم التاني.. (والمديين زول قروش وراجيهو يرجعن ليهو.. الكوم دا في خشمو).. ويكشح الكوم التالت.. ويرجع يكوّم تاني ونفس الشي.. يجي الليل يمشي أهلو.. وتاني يوم من الدغش يجي يكوم ويكشح.. وفي ناس يكونو ممكونين ومجانين زيو علا داسين الجن حقهم يصدقوهو، يقولو ليهو.. (علي بجُملة الليمان.. صدقت).! الباب البجيب الريح- صحيفة اليوم التالي
