الجنون فنون •المجنون: الفكرة ياسيدي تتلخص في الآتي:- بالنسبة للكهرباء نكسر لمبات بيوتنا، ونعمل ثلاجاتنا دواليب، والمكيفات ترابيز، وننسى حاجة اسمها كهرباء.. •(......) لكن يا عكننه نشوف كيف بالليل؟ •المجنون: ناس عنتر وعبلة وقيس وليلى، وبني أمية وقينقاع كانوا عايشين كيف؟ •(....) ما فهمتك كيف يعني؟ •المجنون: نجيب الحطب من الغابة ونولعو وبس. • (.....) ها يازول.. الغابة ما باعوها. •المجنون: صاحب الكهرباء ده أسمو منو ؟! • (....) اسمو "مكاوي".. •المجنون: ومعناه شنو مكاوي ده ؟ •(....) والله مكاوي دي، نسبة لمكةالمكرمة. •المجنون: يعني أهلو من مكة عشان كده سموه مكاوي؟ •(....) لا يا شيخ.. سموه مكاوي لأنو بيسافر مكة كتير.. •المجنون: بيسافر من كيسه ولا من كيس الحكومة؟ •(....) الله أعلم ..! •المجنون: الزول ده إمبراطور ولا شنو ؟؟! •(....) يا ابن العم ما قلنا ليك ما تتكلم في السياسة. •المجنون: عشان كده أنا حبيتك.. تترم رم.. •(....) طيب الموية حلها شنو؟؟ •المجنون.. "تترم رم".. •(....) عليك الله ما تعلقنا في تترم رم، وركز في الموية.. •المجنون: شوف الموية دي حلها في الحمير والقِرب.. •(....) كيف يعني؟؟؟ •المجنون: نرجع تاني لعصر "القِرب" البتشيلها الحمير وخلاص.. •(.....) ها المجنون ده الموية عملو ليها عدادات دفع مقدم و "ترسو البحر". •المجنون: برضو ده عبود ؟؟! •(....) الله أعلم. •المجنون: شنو يا حبيب أنت فكت منك تاني؟؟ •(....) ترم.. ترم. •المجنون: طيب شوف لينا حل للأكل.؟؟ •(....) حل الأكل يكمن في ترك الخبز والهمبرغور واسكلوب باني. •المجنون: طيب ناكل شنو؟ •(....) نرجع للفتريتة والقراصة وملاح الكول وأم رقيقة. •المجنون: ها المجنون ده..الحاجات دي كلها صدروها. •(....) طيب نأكل شنو؟ •المجنون: تأكل هوا وبس. •(....) هاك الهواء ده.. وأثناء حوارنا ونقاشنا البناء لحل تلك الأزمات الفادحة الجلل، أحسست بيد أمي الحنونة توقظني من النوم وتقول لي: يا ولدي قوم من النوم الشمس مرقت.. قلت لها باسماً.. دخليها وأقفلي الباب.. هذا كله مع حبي وأشواقي ،،، E.mail: [email protected]