من سخريات الاشياء ان اللاعبين الذين (اعارهم) المريخ كانوا ضمن المنتخب الوطني – على حساب الذين سجلوهم في خاناتهم لو الكورة كانت باختيار ارقام الفنائل كان جبنا (ميسي) من برشلونة واديناه الرقم (10) عقدة (الطول) جعلت المريخ يعيروا سعيد السعودي ويجيب أحمد أبكر فقط عشان بشبه نزار حامد في الطول الهلال في التسجيلات الاخيرة اضاف فقط سيرجيو ونيسلون مع ذلك استطاع الاخير ان يظهر الفرق اعلام المريخ اكتر اعلام في الدنيا بقدر يصنع ليك من الاشياء الفارغة موضوع. شتل ونفخ. ممكن يعملوا من اشياء لا قيمة لها قيمة. سيكافا – عملوها (بطولة) واكدوا بعدها ان المريخ وصل الى مستوى جيد وانه اضحى فريق خطير وقادر على تحقيق الانتصارات في كل المباريات. زحموا الدنيا ببطولة لا بتقدم ولا بتأخر واجبروا السلطة على دعم المريخ ب (6) مليارات جنيه. كان عملتوا ال (6) مليارات دي في المدينة الرياضية كان المدينة الآن اكتملت. المريخ بعد سيكافا اصبح عبارة عن صفر على الشمال – فقد المريخ صدارته للممتاز وتعادل في عدد من المباريات. حتى المباريات التى حقق فيها المريخ انتصارات كانت انتصاراته بفارق هدف وحيد وبعد مساعدة واضحة من حكام المباراة. اخطر من ذلك ان مستوى المريخ الفني تراجع بشكل كبير وانخفض مستوى كل لاعبيه – وقد ظهر ذلك حتى على مستوى المنتخب الوطني. نجوم التسجيلات الذين زحم بهم المريخ الاعلام وتحدث عنهم حديث (ابطال كرري) اتضح انهم كانوا اكبر اشاعة على الارض. لم يدخل من نجوم تسجيلات المريخ في يونيو الماضي اي لاعب للمنتخب...(طلعوا بتاعين جرايد ساكت). ومن سخريات الاشياء ان اللاعبين الذين (اعارهم) المريخ كانوا ضمن المنتخب الوطني – على حساب الذين سجلوهم في خاناتهم. وهذا يثبت قطعيا ان اللاعب الذي اعير افضل من اللاعب الذي تم تسجيله في كشوفات المريخ. ناس متوكل أحمد علي فالحين لي بس في (نتف) سلك الكهربة من عربة التلفزة. والله (النتف) دا لا عاوز ليه امين عام ولا عاوز ليه نائب امين عام. نادر مالك بي معارضته دي ممكن (ينتف) ليكم السلك. يعني يا متوكل أحمد علي ما تبقى كل انجازاتك واعمالك في المريخ انك (نتفت) السلك. اعار المريخ الطاهر سادومبا الذي تألق مع المنتخب امام نيجيريا...وقدم مباراة كبيرة جعل مجلس المريخ وجهازه الفني يضع الطاهر سادومبا في صدارة قائمة تسجيلاته في التسجيلات القادمة. وتمت اعارة اكرم الهادي سليم اللاعب الذي سوف يحرس مرمي المنتخب اليوم في نيجيريا. وهناك مصعب عمر وهو افضل الف مرة من بخيت خميس. كل الذين سجلهم المريخ لا اثر لهم في المنتخب الوطني – بل هم تراجعوا حتى بمستوى المريخ الفني. ومريخ الدورة الاولى يختلف كثيرا عن مريخ الدورة الثانية الذي يرتعد الآن كلما اتوا بسيرة مباراة القمة في الكأس والدوري. الهلال في التسجيلات الاخيرة اضاف فقط سيرجيو ونيسلون مع ذلك استطاع الاخير ان يظهر الفرق. المريخ اضاف في يونيو الماضي (13) لاعب سوف يغادر معظمهم كشوفات المريخ في تسجيلات نوفمبر القادمة. اي ان اكثر من (10) لاعبين في المريخ تبقى لهم في المريخ فقط (15) يوما – بما في ذلك هيثم مصطفى. حيث لم يتبق لعقد هيثم مصطفى مع المريخ غير (15) يوما. في التسجيلات الاخيرة – كان اعلام المريخ قد (ضرسنا) باللاعب أحمد أبكر الذي قالوا عنه انه شبيه (نزار حامد). قالوا بشبه نزار حامد في الطول. وبشبه نزار حامد في انه قادم من الامل عطبرة. لكن اتضح ان الفرق بين نزار حامد وأحمد ابكر فرق الليل من النهار ولا علاقة تجمع بينهما حتى ذلك (الطول) الفرحانين بيه ناس المريخ. أحمد أبكر لم يشارك مع المريخ وهو قد اعلن تمرده في بعض المباريات نتيجة لتجاهل الجهاز الفني له. أحمد أبكر سوف يكون من اوائل المغادرين لكشوفات المريخ في تسجيلات نوفمبر القادمة. سعيد السعودي الذي تمت اعارته لفريق الاهلي شندي . افضل الف مرة من أحمد أبكر. لكن عقدة (الطول) جعلت المريخ يعير سعيد السعودي ويجيب أحمد أبكر فقط عشان بشبه نزار حامد في الطول. يسألوهم من فنيات أحمد أبكر – يقولوا ليك أحمد أبكر (طويل) زي نزار حامد. انتوا وقت عاجبكم الطول – شاطبين نصرالدين الشغيل ليه؟. في زول هسع اطول من نصرالدين الشغيل. الكورة القدمها نصرالدين الشغيل امام المنتخب النيجيري ما كورة نصاح. وينو علاءالدين يوسف؟. طبعا ح تقولوا (مصاب). شوفوا نصرالدين الشغيل (ما شاءالله عليه) يلعب مع المنتخب ويلعب مع الهلال – ما في يوم قالوا مصاب – او قالوا موقوف. رغم ان اللاعب كانت سيرته في المريخ تطغى عليها الكروت الملونة. نصرالدين الشغيل (ما شاءالله عليه) في الهلال بقى يلعب كورة منظمة وهادية لا بتصيبو ولا بتكرتو. قلنا ليكم الهلال دا عندو (منظم). اي حاجة فيه منظمة – ما عندنا حاجة ساكت. نحن اي حاجة عندنا بنظام. وانتوا بتغالطوا. السنة كلها بتغالطوا. وينو هيثم مصطفى؟. هيثم مصطفى كان اكتر لاعب في السودان كورتو منظمة. هيثم مصطفى مشى المريخ – قال اخير ليه القعاد في البيت من اللعب مع ناس ضفر. ناسكم ديل مشوا وين؟. الجماعة وين؟. وين الناس الكنتوا فرحانين بيهم في التسجيلات الاخيرة – وعملتوا لينا بيهم (لخمة) في حركة المرور. تسجيلات المريخ الاخيرة كلها اثبتت ان اللاعبين الذين غادروا افضل من اللاعبين الذين تم تسجيلهم في المريخ. بخيت خميس لاعب الطرف الشمال في المريخ – يتفوق عليه مصعب عمر في كل الاشياء. بخيت شنو كمان. مع ذلك اتوا ببخيت خميس وتم اعارة مصعب عمر لفريق الاهلي الخرطوم الذي يقدم معه مصعب الان مباريات كبيرة ويسجل اهداف في معظم مباريات الاهلي الخرطوم. اما الكارثة الاكبر في المريخ فهو المصري ايمن سعيد. ايمن سعيد دا لا كورة ولا اخلاق. ايمن سعيد دا مع كورتو الشوية دي – مشى وقعد بيها في مصر. اللاعب الذي خرب كورة المريخ ولخبطها حقيقة هو ذلك المصري ايمن سعيد. دا سائط الدنيا سواطة. الغريبة مع سواطتو دي بطلعوه نجم المباراة. لاعب آخر ...تحدث عنه اعلام المريخ بصورة خيالية ..ونصبوه نجم الموسم من خلال مباريات معدودة. وعشان تسجيلو في كشوفات المريخ كان بصورة غير قانونية – ناس المريخ بقوا في كل مباراة يمنحوه نجومية المباراة. وصاحبكم صدق. مشيتو في الميدان اتغيرت. ذلك اللاعب هو مجدي عبداللطيف الذي كنت اظن مع الاعلام الذي وجده سوف يكون اول لاعب في المنتخب. لكن واضح ان المدير الفني للمنتخب الوطني محمد عبدالله مازدا غير مقتنع بي مجدي عبداللطيف. مجدي شنو البلعب في اعمدة مزمل ابوالقاسم؟. ما شفنا ليه اي كورة. انظروا للاعب الصغير عماريه لاعب الاهلي شندي الذي قدم مباراة كبيرة ورائعة امام المنتخب و(سطر) الناس ما قاعدين يكتبوه في ذلك اللاعب. مجدي عبداللطيف البقرأ الكلام البكتبوه فيه يقول القبة تحتها فكي. كان على الكتابة – كان طلع ميسي. وصاحبكم ما عندو اي شيء. جماعتكم ديل وين؟. انتوا وقت فرحانين بيهم كدا ..بتسكوا في ناس بكري المدينة مالكم. ديل بقوا ينوموا ويصحوا ويحلموا بي بكري المدينة. ديل من حالة الوهم العايشين فيه ..سجلوا بكري المدينة واختاروا ليه رقم الفانلة ذاتو. هي بقت على رقم الفانلة يعني. اديناكم (8). و (8) هسع فضل يقعد في بيتو من يلعب معاكم. عاوزين (9) عشان تقعدوه برضو في البيت. لو الكورة كانت باختيار ارقام الفنائل كان جبنا (ميسي) من برشلونة واديناه الرقم (10). (9) الشفناه بلعب قدام نيجيريا دا – بلعب في المريخ. ليه؟. مالو؟. حاصل عليه شنو؟. انطس في رأسو. اصحابكم خلاص – فاكرين انهم حلوا المشكلة. فاكرين انهم قاعدين يفكروا كدا. قالوا شنو؟. قالوا بكري المدينة اختار الرقم (9) في المريخ. والله بتحلموا في جنس حلم. احلموا – كان على الارقام هينة. ما في اصلو مشكلة. بس عشان تكونوا عارفين – (9) دا قال ما بلعب مع (20). تسعة طبعا بكري المدنية. عارفين عشرين منو؟. تراوري يا جماعة انتوا مالكم بتنسوا. ........ ملحوظة : مالو الكلام بقى ليكم حار؟. هوامش نخشى كثيرا على المنتخب اليوم. ان شاءالله المنتخب ينستر..وما نتهزم كتير. يا سلك لو عاوزين (9)..تعالوا ليه انتوا في الهلال. عندنا فرص مفتوحة للصحفيين. تعال وجيب معاك مزمل ابوالقاسم ومعاوية الجاك وهيثم كابو. ما عندكم اي مشكلة. وبنفتح الفرصة برضو للجماهير للانضمام للهلال. انتوا وقت الزول دا عاجبكم كدا ما تختصروا الحكاية وتشجعوا الهلال. جمال الوالي لو جاء الهلال بنديه رقم فانلة محمد عبدالكريم في مجلس الهلال. اها قصرنا معاكم. اتمنى ان اشاهد اطهر الطاهر في مباراة القمة. واسأل الله ...ان يلعب الهلال امام المريخ بتشكيلة هجومية فيها كاريكا وبكري المدينة ومحمد عبدالرحمن. كأس السودان دا جربوا فيه اي حاجة. ........... عاجل : انتوا قايلين بكري المدنية دا (مقصورة). وإن طال السفر - محمد عبد الماجد صحيفة قوون
