محمد عبد الماجد …و…. تشاهد غدا (شالوا برهان ومحسن ورجعوا ابراهومة) بكرة اليوم ح يكون غريب شوية على المريخاب – ح يكون يوم (مقلبن) ليهم من صباحو. المشكلة ما في (الشبابيك). ولا في (المراوح). بكرة ما في مريخابي بفطر. هم عندهم قلب للفطور. الليلة (الفول) ح يبور. لو على مراد المريخاب – بكرة ما تشرق شمس – او يفطوا ليهم يوم (الاحد) من الجدول. المباراة في الابيض كانت بتجهجهم – في الخرطوم ح يعملوا شنو؟ – ح يتصرفوا كيف؟. صعبة عليهم. شفتوا بكرة اي واحد يعمل ليه شكلة مع (كمساري) ويكورك في الباقى – اعرفوه طوالي – دا بكون مريخابي. بكرة اخوانا (الكماسرة) يطولوا بالهم ويستحملوا (المريخاب) شوية –جماعتكم عاوزين ليهم سبب –اول (كمساري) يقابلهم في مركبة عامة بعملوا معاه (شمطة). اصبروا عليهم – نحن عارفين اقوان (بشه) بتعمل اكتر من كدا. بشه كل ما يواجه المريخ بجيب فيه على الاقل (هدف). اقوان بشه في المريخ على ذلك النحو: قون (سوداني) في اكرم…قون (سرحة) موسى الزومة. انتوا قايلين الشطب موسى الزومة شنو؟. الشطب موسى الزومة وخلاه يلعب في الاهلي الخرطوم – هدف بشه. موسى الزومة المباراة كلها سارح تقول في (حدايق السلام) ما استاد الخرطوم. يا زول (السرحة) دي ما بعملوها في استاد – سرحتك دي سرحة (حدايق). انا ما عارف بشه بجيب (السرحات) دي من وين؟…وبركبها كمان مع الكشافات. قون بشه في رمزي صالح قون (ام تي ان). رمزي صالح قايل الضرب في رام الله – اكتشف ليك ضرب (بشه) اخطر. يا جماعة انا بشرح ليكم في اهداف بشه في المريخ. قون (زين) في عصام الحضري. الحضري بعد هدف بشه داك – قال تاني ما في (تورتة) بتقعدني في البلد دي. كدا يعني بشه جاب هدف (سوداني) في اكرم – هدف (ام تي ان) في رمزي صالح – وهدف (زين) في عصام الحضري. اكيد بتكونوا طلعتوا تسألوا طيب هدف (بشه) في جمال سالم ح يكون شنو؟. هدف بشه في جمال سالم (ثريا). نحن ما بنتحير. مقسمين الحكاية بي نظام. ما في حاجة ح تروح علينا. طبعا بشه عندو هدف في المريخ في الدورة الاولى الحكم ما احتسبو لينا. ان شاءالله (بشه) يعوّض بكرة. بكرة بتاعين الركشات الراكب قبل ما يركبوه يسألوه : يا زول انت هلالابي ولّا مريخابي. لو قال ليكم مريخابي ما تشيلوه – بقعد يغالطكم ساكت في المشوار. مشوار العشرة جنيه ما بدفع ليكم فيه اكتر من اتنين جنيه. نحن المريخاب ديل بنعرفهم. القروش ما بدفعوها إلا في اللاعب البكون لعب في الهلال – دي حالة الدفع الوحيدة عندهم. و…. (وشنو تاني؟). سلك بكرة طبعا ح يدخل في حالة صعبة. سلك اول ما ح يقوم من النوم بقوم يكورك لي (اسلام) ويقول ليها سمعي لي معلقة عمرو بن كلثوم. نظام اعصابو بايظة. اسلام ح تقول لي ابوها – لكن معلقة عمرو بن كلثوم ما ادونا ليها – نحن حدنا يا بابا (دجاجي يلقط الحب). سلك ح ينفعل ويضرب الارض ويقول ليها طيب (عبدالماجد) داك البحفظو معلقة عمرو بن كلثوم شنو؟. يا اسلام ما تشتغلي بالموضوع كتير – الليلة ابوك اعصابو بايظة. بعدين يا سلك انا عبدالماجد دا من ولدوه لقيتو حافظ (ونشرب ان وردنا الماء صفوا ويشرب غيرنا كدرا وطينا). حافظها براهو. الولد من يومو (هلالابي). انت لو عاوز (اسلام) تحفظ ليك الكلام دا – خليها تشجع الهلال. ما معقولة يا سلك تشجع لي (عنكبة) وتكون حافظة لي (قفي قبل التفرّق يا ظعينا نخبّرك اليقين وتخبرينا). لو حفظت الكلام دا يا سلك – البخليها تشجع ناس ضفر ومجدي عبداللطيف شنو؟. هسع عليك الله مجدي عبداللطيف دا لو قابلتو في (طابونة) بشجعو. بكرة اليوم ح يكون صعب شديد على المريخاب. مامون ابوشيبة من الساعة تسعة صباحا بقول ليهم عندنا (ضربة جزاء) في الدقيقة (34) من الشوط الاول الحكم ما احتسبها لينا. الجماعة بقولوا لي ابوشيبة لكن يا استاذ المباراة ما بدأت. ابوشيبة بقول ليهم احسن نجهز مبررات الخسارة من بدري. ناس بكري المدينة ديل ما بنقدر عليهم إلّا بالطريقة دي. معاوية الجاك رئيس تحرير صحيفة الهدف العائدة للصدور غدا ..قالوا ليك اجتمع بالصحفيين والكتاب والعاملين في الصحيفة – وقال ليهم نحن بكرة ح نصدر لكن بعد بكرة ما معروف…عشان كدا كملوا لينا كلامك بكرة. معاوية الجاك يوم مباراة القمة طبعا لا بيأكل (طعمية) ولا بشرب (لبن) ..بقول ليه يا معاوية علاقة الطعمية باللبن شنو؟. معاوية الجاك بقول لي ناس الهلال ديل ممكن يعملوها – ما في حاجة بعيدة عليهم – اتوقع منهم اي شيء. و… (اكمل يا جماعة). انتوا مالكم ضايقين ؟ – الواطة لسع ما صبحت. قالوا ليك (هيثم كابو) فتح التلفزيون لقى ليك الناس غرقانة …البلد غرقت. ووالي الخرطوم بقول في لقطة ارشيفية : (نحن استعداداتنا جيدة للخريف – وما في اي مشكلة). هيثم كابو ما كضب طوالي قال : والله انا خايف استعدادات برهان للهلال تكون زي استعدادات والي الخرطوم للخريف. الوالي يقول الاستعدادات جيدة للخريق – اول مطرة تصب يقول ليك نحن اتفاجأنا بمعدل الامطار. ديل بتفاجأوا بالنقناقة. اها يا ناس المريخ عشان ما تتفاجأوا ساكت – الهلال ح يجيكم بي كاريكا وبكري المدينة وصلاح الجزولي ومحمد عبدالرجمن. امطار وسيول وفيضانات. دي (مطرنا) من هسع. بكرة المريخ ح يعفي (برهان) ان شاءالله. ح يقولوا هو برهان فاضي لينا من السفر الي اثيوبيا. نحن برهان ذاتو ما عارفنو بيدرب المريخ ام سان جورج؟. بكرة محسن سيد ان شاءالله ح يمسك (حي العرب). يا ناس حي العرب انتظروا محسن – اصلو أحمد ساري استقال. محسن سيد فاضل ليه في المريخ (24) ساعة. ابراهومة ح يرجع يمسك المريخ. وح يشرف على بقية المباريات في الممتاز. خلي تلفونك فاتح يا ابراهومة. الحاجات دي كلها ان شاءالله ح تحصل. قالوا ليك مزمل ابوالقاسم – بكرة ح يكون عاوز يضع مانشيت صحيفة الصدي بقوم يقول ليهم : (غندور ينعي الحوار الوطني). ناس ابوشيبة يلحقوا العدد في المطبعة ويقولوا لي مزمل انت قايلها دي (اليوم التالي). يا مزمل ما تلخبط. نحن عارفين. نحن مقدرين اليوم صعب عليكم. انتوا تعالوا هنا – كلامي الفوق داك كلو جبت سيرة (الجبهة الثورية). لا. جبت سيرة الصادق المهدي. لا. قلت الكهربة الايامات دي بتقطع كتير. لا. ذكرت منصور خالد. لا. طيب مالكم بترجفوا كدا؟. معقولة (بكري المدينة) يعمل كل الحاجات دي. يا زول اطلع. طلعنا. و… انتهى.