لعصام الترابي مطبات كثيرة جدا مع (الخيول) والصيد وغيرها ، بس شفت انو (الموقف ده ) ممكن يكون ( مطب) اليوم. مطب يحكيه عصام الترابي ويقول : ( مرة انأ وزوجتي كنا جايين من خارج السودان شايلين معانا امانة لي اسرة ام درمانية معروفة مشينا ليهم في البيت ودخلوني صالون الرجال وزوجتي مشت مكان السيدات . سيد البيت مابيعرفني مشى جاب لي العصير وجا طوالي بقى يتكلم معاي في امور سياسية كتيرة جدا وبعد داك حول الكلام عن الفساد الاقتصادي والأشخاص البقو فجأة مليارديرات الراجل بدأ يتحدث عن شخصية اسمها عصام الترابي كلام صعب خالص قلت ليهو : ( ياخ اقيف أنت عصام الترابي ده بتعرفو ) ؟! قال لي بعرفو كيف مابعرفو؟! قلت ليهو شكلو كيف عصام الترابي دة ؟! قال لي زول اخضراني ماااكن كدا ) ..! قلت ليهو طيب شفتو بعمل الحاجات دي ؟! قال لي شوفتو، يا اخي ده بدخل جيبو مية مليون في اليوم ، ومافي (إبرة) بتخش البلد دي الا وسعادتو متحكم فيها ). يقول عصام الترابي: لاحظت انو الزول لامن اتناقش معاهو بنفعل جدا سكتا خليتو مواصل في قصص عصام الترابي و(أمثالو) والفساد الاقتصادي الدمروا بيهو البلد ،، والبلد دي مابتتصلح وما بتمشي لي قدام طول ما فيها (عصام الترابي والمعاهو) فجأة جات بت الراجل ومعاها زوجتي دخلوا وقعدوا في الصالون وهو من شدة الانفعال ما انتبه ليهم بعد شوية بتو لاحظت انو ابوها بتكلم عن عصام الترابي اللي هو انا قالت ليهو (يا ابوي قول بسم الله ) قال ليها (بسم الله في شنو ؟) قالت ليهو انت ماعارف القاعد معاك وبتتكلم معاهو ده منو ؟! قال ليها حيكون منو يعني شغال في الأمن ؟! قالت ليهو: (لا)..! قال ليها ( يكون اخو يوسف عبد الفتاح ) ؟! قالت ليهو: (يا أبوي ده عصام الترابي ذاتو )..! في البداية الراجل ماصدقنا قعدنا نقنع فيهو ، قمت قلت ليهو : ( دي بطاقتي وده الاسم : عصام حسن عبدالله الترابي). ياخي الزول اتجهجه بصورة عجيبة كدة وقعد يعتذر لي: (نحن ياولدي طبعا ده الكلام البنسمعو ).. قلت ليهو انت الكلام ده ما بتسمعوا لأنو انا سألتك عصام ده بتعرفو ، قلت بتعرفو ، شفت بعمل البلاوي دي ، قلت شفتو ... الراجل بقى في موقف صعب وناس البيت بضحكو عليهو في النهاية كلنا بقينا بنضحك طبعا الجل كان اصعب (مطب ) ممكن يلاقيو زول ... وده الحصل...
