للثورةِ نغني عروة علي موسى [email protected] وين بتروح وطن راجيك بحد الكاف وعمق النون مساهر ليك بشوف طيفك إزازي بعيد تبكي سماهو تشحتف رويحتو وراك وآه يا زول ضناهو هواك وكيف يا زول تسيبو ضناك ؟ ومين إقدر أحس الليل وكت تهجس نجيماتو ومين إقدر إعشي حبيب ساعة الهجعة إذا ما الهم مطوطو في غياباتو وإذا ما الناس تنوم غلبانة من هم الجُهال جاطو ومن ياتو ومن ياتو ؟ وين بتروح ؟ بريق الثورة يا شرقة شموس ووضوح ويا طلة وشيها صبوح ويا نوراً بجيك في شموخ و يا وطناً فداك الروح كانت مواجعك غنوتي وكان شعري ليك ضي دنيتي وأنا بيك بكون روعة الشاي الصباح و شمس الضحى الشايلة من نورك شعاع ضوت ضلام العتمة في درب الصغار قبل الفجر ما إطل نهار يا ثورة آمالك كبار غريبة حكاية الزمن البهد الحيل إقوم قلب الحزن ولهان إفتش عن ملامح حزنو في إنسان إشوف موج البحر حزنان إشوف ضل الشجر باهت إشوف غيم المطر فايت إشوف كل الزمن أحزان إشوف بي العين ظلم إنسان إمشي إساسق المسكين في درب الهجير الشاح .. عشان لبن الصغير الناح عشان قلم الكبير إنداح عشان الليل إفارقو نواح من جوع الشتاء الصيّاح وخاطر زولنا مشدوه على عطف البراح موكَّر في الهموم نوّاح مجروح بي السخف القرار مو صاح وخاطر زولنا بي هم العيال مشغول وخاطر زولنا ما بخبر قروش بترول وخاطر زولنا لقمة عيش وبقجة فول عمرو الظالم ما بعرف هموم مسكين وما بعرف سهامو الطايشة تكتل مين وإبقى الشاي وموية الفول قضية عريضة في وجه النظام الشين خروج الناس من شان داك أجمل صورة بتزّين جمال النيل وأنبل نفحة من نفس السماحة تشيل وآه يا ناس نضالا تليد وأنضر من ضمير الحاكم العربيد وأكبر من قرار تشريد ومن تهديد خروج الناس ما جابوه من ربعاً يقال عربي ولا سرقوه من جمعة صلاة الله خروج الناس جمال تاريخ وروح السبقوا في المعراج وزولاً بعرف الثورات ما وصوه ناس ناتو ولا ربعن سنين فاتو بعرف كيف أقول لا لا وينور لي ضلماتو ويشعل ثورة للتاريخ ... عشان تتعلم العُربان ... عروة علي موسى ،،،
