[email protected] الزمن دا المرارة كترت في حياتنا لدرجة انو جلدنا تخن ناكل المر و ساكتيييين و صابريييين . لكن "مرارة“ الخروف السنة دي فرقت و وجعت ، فرقت لانو المفروض اننا في بلد تزعم بانها حتكون سلة غذاء العالم لكن طلع انها سلت روح المواطن الغلبان و الوضعو كويس سوا سوا !!! يعني ايه سعر الخروف يوصل لمليون و ....... او يتراوح مابين سبعميات تسعميات ؟؟!!! زمان كنا بنستغرب انو معظم الشعوب العربية التانية ما بتضحي و بيكتفو بي كم كيلو لحمة و انتهينا ، بس الظاهر انو خلال السنين الجاية حنبقي زيهم . السنة دي طلعنا نحنا "الضحية “ لسياسيات حكومتنا الخرقاء و امعانها في انها تزيد حياتنا الما و قرفا ، ما كفاااية بس الناس استقبلت العيد و هي طالعة من الرعب بتاع انفجار مصنع اليرموك ، كفاية على الام الفقدت ولدها "مرارة “فراقو ، كفاية "مرارة “الليلة العاشوها ناس برة بيوتهم و رعب العيال ، كفاية "مرارة“ البيوت الاتهدت و اتدمرت نتيجة الانفجار ، هسي ديل يلقوها من الخروف و الا من البيت العايز اعادة اعمار و الا من انهم ح ينزلو من اجازة العيد "اباطهم و النجم“ لا وبعد دا يطلع ليك علي عثمان يقول ليك :"لو كانو يظنون بانهم سينالون من عزتنا كلا و الف كلا !!!“ كلا ايه و نيلة ايه و هباب اييييييييه ؟؟؟ كنتو وين انتو لمن الطيارة جات قاطعة المسافة دي كووووووولها و لافي زول هبب ليها لمن ضربت و فاتت ، وجاي تقول لي عزتنا ، هو انتو خليتو فيها عزة ، ياخي دي بقت عرة !!! حيكومات تجى وحيكومات تغور بتحكم بى الحِجِى .. بى الدجل الكِجُور والماهية اف عيشة هاك وكف في هذا الزمن تف يا دنيا تف يالعبد الشقي ما اتعودت شكي لكن الكفاف فوقك منتكي والسوق فيك يسوق حالاً ما بتسر الدِنيِى أم صلاح تبدا من التُكُل من حِجّة صباح .. فى حق المُلاح فى الغُبُن الجديد .. فى القسط القديم وبيناتِن عشم .. فى الفرج القريب سامحوني على جو الكآبة الفي المقال لكن ياهو دا السودان ! بس برضو من خلال متابعتي لاصدقائي بمختلف اماكنهم و ظروفهم كان العامل المشترك بينا في العيد دا : عادي ، هادي ، باهت ، و اهو كل سنة و احنا طيبين ، في النهاية العيد بي ناسو، في ناس مجرد وجودها في حياتنا في حد ذاتو عيد يستحق الاحتفال به انشالله دايما تامين و لامين و ينعاد عليكم و انتو في احسن حال ، و البركة في امنيات الاهل و دعواتهم و حب الاصدقاء ، و اكيد كباية الشربوت :) كل سنة و انتم العيد :) ، كل سنة و كل عم عبد الرحيم بخير و عافية :) انا الليلة صحيت و كان نفسي في طعمية جادة معاكم قال ايه نباتيه ! المهم الباب دق لقيتو ولد جيراننا ناولني صحن ملئ بالمرارة !!!! فدوى مالك 27 اكتوبر 2012
