كل الاماكن متحكرة القلب ، القلب النابض بي شوفة الزولة السمحة ، الزولة اللمحة لما تعاين من شابكها تسارقك روحك أنفاسك ، تطلع تنزل مرجيحة شوقك ، تساسق جواها الناس الالفة و لمن تدي الطلة من بينات عينيها، الشرقت فيها مواعيد الرجعة ، يمكن ما أرجع للضفة ، إلا اتحزم بيها البحر، البحر السادي مواجع اليابسة ، يا زولة يا قمحة ، نفضي عني غبار اللون ، و خلي الاماكن صِفِر ، حتي أساويك فيني الضحكة ، ضحكك لمن أتفرهد بيهو ، أضم روحي علي ، و اتداري عليك من الهم ، بس لكن الهم : - إنك جوايا ملامح بُكرة ، تدي الشمس الطلة ، حتي أشوفك و تحلي حلاة القعدة ، مابين شوقك و الاماكن تنبع فيني ، تنبع عندي بحار من ريد و حنان ، وعندك يسجع قولي : - حبابك ، حباب ألفتك وين ما كنتِ و أنا متيبس من الدهشة !! كل أماكنك أنا ، و كلك مني ، لومِنك ما بارحتو مكانك ، او خليت للضل الشارد مني ينسج دربك من دون عنوان ، أدخلي علي يا مارقة مني فاجة وريدي ، و خاتة ملامحك ، مارقك أنا من سجني و داخل بيك ، كل دروب الدنيا ، الباتت تسرح تمرح في عينيك ، يا زولة يا قمحة ، نفضي عني غبار اللون ، و خلي لأماكني حِبراً ، أكتب بيهو مجيك من غير رجعة حتي أساوي فيني الضحكة أضم روحي عليك ، اتداري من هم وجعي، كوني القمحة و كوني اللون ، كوني الحِبر الستف كراريس الكون ، إذا ما كل سطر تاه في الزحمة، إنتي بداية كل سطوري ، حبابك وين ما كنتي ، انا متيبس كايس للبحر الأغرق فيني حروفك ، أو ساحل الظن الأوصلني حداك ، كيفن ما أغرق إذا ما كل الاماكن نبضت زرعتني متاريس من خوف ، نبضت بي شوفة الزولة السمحة ، الزولة القحمة ، الزولة السمحة .. __________ السر الشريف - 20 ابريل 2014