بشرٌ وبشر.. بالله كيف كل الناس بشر ناس تكسح كداري تدندن..حُسنك أمر وناس لينا..طوالي طوالي.. تركب همر ناس تبيت القوى..تلوك الصبر..تربط حجر..... ناس لينا شيء سمك نيل.. شيء روبيان بحر شيء كافيار.. شيشة وفودكا ..طرب وسهر ليه الناس ..ناس الناس.. ناس أم در صاروا غجر.. حتى ليل الفرح ..طقوسه شيخ هُبل بعد ما كان عديلة وزين ..لمة أهل .. عريس وعروس..عريسنا ورد البحر سار وسار..قطع جرايد النخل.. صبح عينك..عينك..أحضان وقٌبُلَ... ليل الفرح بعد الحصل.. فاتنا.. تركنا ورحل تهليل تكبير.. تضليل تكفير.. حتى الدين بيكم كفر الكوز هاج وماج أرغى وزبد..ردد وردد : تقول ليا كيف !! حتى الدين بينا كفر؟؟ يا زول العيشة هنية.. الناس مرضية ..مطرنا بحر أعمل حسابك أنت في خطر الله يخلي عليوة ونافع.. وحميدتي عنا يدافع أصبر بتجينا بكرة راجع أعمل حسابك أنت في خطر تقول الصبايا عند الزوايا سبايا.. والعيشة كدر مهما طالت بيك دروب السفر تقول ليا عيشتنا كدر في كدر أصلك مكابر ..يساري ملحد كفر.. ما بتفرز الألوان عميان بصيرة وبصر ما شفت الشروق.. وعمك سركور كله ذوق أماسينا كفر.. ليالينا وتر ناس كلتشي.. وارغو كفر ناس فرفور وعيال منصور.. وتر كيف تقول حتى إبليس أصابه الخجل من التمكين والتحصين.. والحنث باليمين سابنا تركنا هجا ورحل كيف تقول الدين بينا كفر استغفر وتوب ما عاد زمن بلدي يا حبوب.. ما عاد عمة وشال.. جلابية ومركوب عندنا أمام وأمام.. الكاروري عصام وعصام ديل ملائكة لا بشر : الكوز هدد توعد لمن فتر ناس تُكد الدوم.. وناس ايسكريم كل يوم ناس باقان اموم .. وناس عوض الجاز قالوا إنقاذ..هي لله.. النهب إنجاز والقدر يا نبتة.. القدر محتوم كله كوم ...وسجود اليسع كوم ناس الفرجوني ناس.. وناس ندوية بلا أحساس ناس ناس ..وناس ملكها الوسواس الخناس الجيش حميدتي والرادار نظر وعلماء السلطان في خبر كان لا بصيرة ولا بصر نبتة كبدها على ضناها انفطر بيننا وبينها سكة سفر وقد طال السفر ننادي في القمر يا قمرة ..ويا قمر يا قمرة اقلبي السمسمة الحمراء ننادي وننادي بالله.. بالله يا قمر مر شهر وراء شهر والقمرة ما بان ليها أثر كان زمان صبية ينادونها أم درمان كان للطاهر دكاكين كان أبو روف وكان بيت المال كان زمان.. وكله كلامنا الآن .. صار كنا وكان.. كنا وكان حليل كوراع أبو جلاجل.. باسطة بين.. فول الجان الترابي كوز والجمع كيزان الاسم إنسان والفعل شيطان لينا وضياء فلانة وفلان المجهر..الصيحة..وكمان ألوان قالوا صحافة وصحف .. سخافة وسَخَفَ ولمن هجرنا (السَخَفَ) بلا أسف لحقونا للتلفزيون.. والعهر فنون شيء كِسِار تلج..شيء سبح ودقون شيء تلاعب شفاه.. شيء غرودت عيون شيء روج.. شيء فتحة صدر شيء كسرة جفون ..شيء فكة شعر عدم فهم ..لو قلنا بهم..لظلمنا البهم صحي القلم ما بيزيل بلم وصحي الهرم مقلوب والدنيا حظوظ ومروة تساوي ألف.. وكم من ألف وكتين تكتب حرف بعد حرف يورق يباب ..يخضر جرف تنور دروب ..تسطع شمس.. تزرع أمل..زي عصيانا أمس و ديمة بكرة أحلى من أمس مروة مننا وفينا.. تحس بينا ولمن تكتب لينا .. بتكتب لينا معسكر كلمة..الأنتنوف شرق الجبل كاودا ..تضمد جراح.. تحلل خبر بلا وجل ولا ملل تغرس أمل تضيء الكون.. تشرق شمس وعصيانا بكرة أكبر من شمس والجاي أحلى من أمس عاد القمر يناغم ضفة النهر ينور لينا طول الدهر أصلوا بنبتة وناس نبتة أنبهر لمن شاف عصيانا داك الشهر من حينها نٌفُذَ أمراً صدر.. وصارت استدارة القمر دوماً ليلة التاسع عشر [email protected]
