* إذا كان جمهور الهلال لا يرغب في إستمرار (الريس) أشرف الكاردينال رئيساً، فعليهم إدراك حقيقة أن فرقة الأصدقاء المسرحية في حاجة ماسة لإبداعات الرجل ..!! * بصراحة يا محمد عبد الماجد : إذا كان جمهوركم لا يريد (الريس) فحقيقة (النظام يريد) ..!! * ضحك المشاهدون من اعماقهم وهم يتابعون إفادات (الريس) كردنة مساء أمس الأول في برنامج (البحث عن هدف) على شاشة قناة النيل الأزرق، (ويا وصايفة الدرة ما المدينة الدرة كردنة) ..!! * يا جماعة أطلعوا أهتفوا للريس ..و(ريس ريس) يطلع كويس ..!! * مخطئ من يظن أن (الريس) كردنة يتمتع فقط بموهبة شعرية، فموهبة أشرف الحقيقية في الكوميديا وتقديم التعليقات الساخرة التي تؤكد أنه ممثل مسكون بروح الدعابة والمفارقات الفنية . * إعلام الوصايفة الذي هاجم أشعار كردنة ينبغي أن ينصف الرجل وهو يمتع الملايين عبر (مسرح الرجل الواحد) ..!! * قال كردنة أنه يريد لجمهور الهلال أن يتأدب بأدب الهلال، ونحن نضم صوتنا لصوت كردنة رغم أن (الريس أشرف) لم يشرح لنا أدب الهلال ..!! * يا ريس الناس دي ما دايرا تتأدب ..!! * يتطلب أدب الهلال أن تأتي مسيرات الجمهور الرافضة والمطالبة بعودة هيثم مصطفى لرئيس النادي في منزله في الفترة مابين الرابعة للسابعة مساء ..(راجع كتاب شرح الكاردينال لأدب الهلال ..باب المسيرات ..صفحة 29 الما بتدي الريس صفحة ينوم عليها) ..!! * الناس ديل يا (ريس) بعيدين شديد من أدب الهلال .. و(معقولة جايين تكوركوا قدام البيت الساعة واحدة ونص صباحا زي الناس الجايين يرجعوا ليهم " مرا طلقوها") ..!! * انت يا (ريس) كردنة بتجيب الأمثلة دي من وين ..؟؟ * و(ريس ريس) يطلع كويس ..!! * انت يا كردنة بتجيب (أمثلة كويسة) لكن ليه بتجيب (محترفين منتهين) ..!! * أثار حوار (الريس) كردنة سؤال فلسفي عميق وفتح باب تساؤل فكري كبير مفاده : (لماذا يأتي "الأجاويد" لحل مشكلة المرأة المطلقة ما بعد منتصف الليل مع أن الموضوع يمكن أن تتم معالجته في صبيحة اليوم التالي) ..؟؟ * نعترف لكردنة بأنه مبتدع نظرية (شفقة الأجاويد)، التي تسعى لحل المشاكل ليلاً مع أن الموضوع يمكن حله غداً و(الصباح رباح) ..!! * أمبارح انا جاي داخل علي شارع بيتنا زي الساعة واحدة ونص صباحاً لقيت مجموعة من ناس الحلة بدقوا في باب جيرانا، (قلت يا ربي الطلقوها منو والناس ديل جايين يرجعوها) ..!! * ناس حلتنا يوم الخميس بتحاوموا بعد الساعة واحدة صباحاً كتير جداً .. (الظاهر دا اليوم البرجعو فيهو النسوان المطلقات) ..!! * تلاقي الواحد بعد الساعة واحدة ونص صباحاً يقول ليك (انا جاي من أوفر نايت) ..(يا جماعة أوفر نايت مين والناس متشاكلين .. نحنا كردنة ورانا أي حاجة انتو جايين من مشكلة مرا مطلقة) ..!! * شكراً يا (ريس) كشفت لينا الأجاويد ومنك نستفيد ..!! * معقولة بعد واحدة صباحا يا كردنة ..(يعني الواحد لو داير يحل مشكلة مرا مطلقة إلا يجيب تصديق من شرطة أمن المجتمع) ..!! * يا جماعة الحفلة بتنتهي حداشر انتوا دايرين تحلوا مشكلة بعد الساعة واحدة ونصف صباحاً ..!! * معليش يا ريس كردنة ناس الهلال ديل زمنهم فارق ..!! * أدب الهلال حدد الزمن بس الناس ديل ما يتأدبوا بيه . * يا جماعة لو حبيتوا تمشوا في موضوع خليفة للكاردينال يا ريت تمشوا من بدري و(تأدبوا بأدب الهلال) ..!! * (أدب الهلال) يا الرشيد من سبعة مساء ما بزيد ..!! * يا كردنة بالنسبة للقروش : قلت لي قوتكم المالية كيف ؟؟ * لو ما خايفك تقول علي (معتوه) يا كردنة كان قلت ليك ما عندكم قروش ..!! * قوة الهلال المالية بعرفا آدم ..(ويا آدم جيب من "قوة") ..!! * قلت لي يا كردنة بكري تاني ما بلعب ..(كلامك صاح يا أشرف الموضوع أنتهى تاني بكري ما بلعب .... بيكم) ..!! * يا كردنة تم الجملة و(لسة باقي كلامنا عن الحوار بنتمو يا محمد فضل الله بكرة) ..!! نقوش متفرقة * كان وزير الشؤون الإنسانية كمال آفرو واضحاً وصريحاً كعادته وهو يقول على شاشة قناة (قوون) عبر برنامج خاص قدمه صديقنا حدباي خلال برمجة عيد الأضحى المبارك : (تعرفوا رغم إني هلالابي لكن أقول ليكم بصراحة ناس المريخ مترابطين اجتماعياً أكتر من ناس الهلال .. انا اكتر زول بشارك فى الأفراح والأتراح .. ناس المريخ أقطاب ومجلس أدارة وأعلام وروابط بتلقاهم في المقابر إذا مات ليهم زول .. بسرعة شديدة بتلقى كل الناس حاضرين .. في الأفراح مافي زول منهم بغيب .. عندهم شبكة رسائل خاصة رابطهم كلهم ما زي ناس الهلال ودي حقيقة وانا بقولا بوضوح وبدون حساسية) ..!! * وبدون حساسية كدا يا آفرو أمبارح عرس ولدنا بكري المدينة كان إستفتاء حقيقي، و(الصفوة بعد قلعوا درة البلد أمس عزوا الولد) ..!! * زواج بكري المدينة كان بمثابة مهرجان إستقبال لاعبين جدد ..!! * الحفلة كانت في صالة نيلتون في شارع المطار ..(والمطار بي وين .. المطار بجاي .. والصفر بي وين .. الصفر بهناك) ..!! * عدد الفنانين الذين لم يغنوا ضعف الذين وجدوا فرصة وشاركوا العقرب ليلة العمر ..و(وبكري سائر الليلة والحفلة محضورة .. عريسنا خلى للوصايفة صورة ومسك كردنة ماسورة) ..!! * أعجبني (كلتش) القلع عبد الحفيظ عندما صدح مغنياً : (يا شمات الله لينا من تسجيل بكري المدينة) ..!! * يا جماعة مافي داعي للشماتة ..(عشان ما نطبق ليكم حنة التلاتة) ..!! * قال لي الصديق العزيز القلع عبد الحفيظ الذي أدى فريضة الحج هذا العام : (تعرف انا من المدينة ولي المدينة) ..!! * ويا شمات الله لينا .. من (لدغة) بكري المدينة ..!! * غنى أمس بلال موسى وطلال حلفا ووليد زاكي الدين ومصطفى البربري وشكر الله عز الدين و(عندما غادرت الحفل لم ينته بعض صف المغنيين) ..!! * أهدى محمد عبد الحميد الضو حجوج العريس مصحف ونجمة من الذهب الخالص قدمها عضو مجلس إدارة نادي المريخ عبد القادر همد ..(والصفوة دائماً عز ومفخرة .. ويا بكري سمحة المقدرة) ..!! * غايتو يا مزمل : سجلتوا الولد ورقصتوا وقفتوا البلد ..!! * أمبارح في عرس ولدنا بكري شفت مزمل بالعمة قايلو وكيل العريس ..(غايتو يا صفوة يوم بتكتلوا ليكم "ناطقة") ..!! * واحد وصيفابي قال لي : (إن شاء الله ناس المريخ وقفوا مع بكري في العرس) .. ضحكت وقلت ليه : (ما تشيل هم الصفوة قاموا باللازم .. انا لما شفت ناس التعبئة في صالة نيلتون قايلهم ناس السيرة) ..!! نقش أخير * من المسلط ومن العين الشافتو ماصلت