* يمكن أن يكون تسجيل أي محترف في كشوفات نادٍ قمة حدثاً، ولكن بالطبع فإن الحدث الأكبر يتمثل في نجاح ذلك اللاعب عندما يشكل لفريقه اضافة حقيقية ويبهر الجمهور بإمكانياته الفنية . * إعلام الوصايفة الذي يعيش أسوأ أيامه مع (تسجيلات خالية الوفاض) لم يجد ما يخدر به الجمهور، فأصبح الحدث عندهم هو متابعة حركة الطائرات التي يتخلف عن الحضور فيها للخرطوم المحترف المالي سليمانو كانوتيه ..!! * كل يوم والتاني الناس في المطار وكانوتيه متخلف و(طيارتو قامت) ..!! * سمعنا بطيارة تتأخر عن مواعيد الإقلاع تلاتة مرات، لكن راكب يتأخر عن مواعيد إقلاع تلاتة طيارات في تلاتة أوقات مختلفة .. (دي جديدة لنج وبتأكد أنو كانوتيه دا لاعب مميز) ..!! * معقولة لاعب ملك تخلف وتأخير وأخطر من (سودانير) ..!! * اللاعب (البتفوتو) الطيارة دا يا محمد عبد الماجد (ما بلحق) الكورة ..!! * انت يا كانوتيه طيارة منتظراك ما لحقتها داير تلحق بكري المدينة ..!! * المدينة دا يا كانوتيه زي (اللفتهانزا) .. (والبتفوتو الخطوط الأثيوبية ما بحصل الألمانية) ..!! * سمعنا في دنيا الإحتراف ب(لاعب مهول) لكن (لاعب ممهول) دي جديدة يا مزمل ..!! * أكتوبر (الممهول) بالدم صباح الخير ..!! * مفروض في جرايد الليلة تقروا خبر جية كانوتيه وتشوفوا صور المحترف الممهول، (لكن المالي دا ما مضمون ومعروف بعدم الإلتزام ممكن ينزل من الطيارة بعد ما يربط الحزام) ..!! * الغريبة كانوتيه قال ما وصل لسه مع الهلال لرقم محدد لأنهم ما قعدوا اتفاوضوا لكن (بحترم كلمته) مع الهلال ..(ويا كردنة الود المالي دا ما يغشك خليهو يحترم المواعيد قبل ما يحترم كلمته مع الهلال) ..!! * تاني لو الواحد قال ليك (مواعيدك مالية) معناها انتهى منك ..!! * معقولة كل يوم صحفيين الوصايفة في المطار يسألوا : (يا جماعة شوفتو المحترف المالي .. يا ناس صالة الوصول ((المالي)) جا .. يا جماعة كانوتيه المالي جا بجاي ولا ما جا) ..؟؟ * والزول أبو عيون كحيلة جا (مالي) بي هنا ..!! * كانوتيه كل يوم بعذر .. (الليلة الطيارة فاتتني كان عندي مشوار خفيف كدا .. تاني يوم قال الطيارة فاتتو لأنو عمل حادث .. اليوم البعدو قال النومة شالتو عشان كده الطيارة فاتتو) ..!! * (شالتو نومه) بالله دا محترف يعتمدوا عليه .. (انت عارف يا كانوتيه لو ناس الفيفا عرفوا البتعمل فيه دا ممكن يوقفوك ستة شهور) ..!! * ستة شهور كويسة معاك على الأقل تكمل نومك ..!! * بمناسبة الفيفا : وين عماد الطيب (لا حس لا تصريح لا خبر) ..؟؟ * هسه عماد دا بدل (يدعم) الهلال بالتصربحات ما كان يمشي يجيب المحترف المالي دا في يدو (صحبة راكب) ..!! * المشكلة عمده يجيب المحترف الكاردينال يقول ليه أدفع القسط الأول ..(كردنة ممكن يعملا عشان كده عماد ما بجازف) ..!! * يا الناطقة : معقولة محترف ما يركب الطيارة وما يعتذر عن التأخير ويقول حصل ليه (حادث سير) وناسكم الطيبين ديل منتظرين عفشو في السير ..!! * (سير) البلد ..!! * معقولة لاعب لا سير لا إعتذار لا سلوك ..!! * تخلف كانوتيه ما بنقدر ..(سير) الوادي المنحدر ..!! * الوقت الذي أهدره الوصايفة في إنتظار رحلات كانوتيه الجوية كان بإمكانهم أن يتعاقدوا فيه مع ثلاثة محترفين ويجنسوا اتنين ..!! * أنجز الوصايفة ملف كانوتيه بنجاح يحسدون عليه ..!! * أصبح الإنجاز الآن في (وصول اللاعب) لا في نجاحه ..!! * قالوا لكانوتية : (هل السبب في تأخرك عدم توصلك لإتفاق مالي مناسب مع الهلال ؟؟) .. ليضحك (ابو الكنت) حتى يستلقى على قفاه ويقول : (خلاف شنو ونحنا لسه ما قعدنا ولا اتكلمنا ولا ناقشنا) ..!! * الزول دا يا كردنة لسه جكتكم معاكم طويلة ..! * يا سلك اسمعها مني : (محترف شالتو نومة ما بشيل ليهو كأس .. وجوي لا تكلمني) ..!! * يا كانوتيه : ناس خليفة ديل بطيروا الفريق ويطيروا النوم من عينك ..!! * يا خليفة .. الناس ديل أدوك شارة الكابتنية ولا لسه .. (غايتو خليفة ممكن يخلي الدفاع والنص فاضي لكن بملأ الشارة) ..!! * (الشارة) منك منو يا خليفة .. (اتمسك بالكابتنية الهلال دا بقى كلو شفع زي فرق المراحل السنية) ..!! نقوش متفرقة * مطالبة الحكم الجزائري محمد بنوزة لمازدا بالرحيل عن المنتخب الوطني والبحث عن مدرب أجنبي، ستدفع مازدا في حواراته القادمة لتجاوز مربع الهجوم على الإعلام وتصويب سهامه ل(خفافيش الحكام) ..!! * طالما أن المنتخب ودع تصفيات (الكان) ننصح مازدا بالتفرغ في الفترة القادمة لكشف (الخفافيش)، فالوقت متوفر والبطولة مستمرة و(المنتخب مافيش) . * (خفافيش) حد أحسن من حد ..!! * نستعد هذه الأيام لمشاركة (ولدنا) بكري المدينة مراسم زواجه بالخرطوم ..!! * طبعاً العرس في صالة (نيلتون) و(فناني المريخ) جاهزين ..!! * غايتو عرس بكري دا يا الرشيد حيكون كرنفال .. تعالوا شاركونا واخدوا صور مع العريس .. (أصلو كل الطلعتو بيه من المدينة ألبوم صور) ..!! * عقد (صوري) ..!! * بالمناسبة : لازم نسمع في الحفلة أغنية (الصورة) ..!! * إتصوري ..!! نقش أخير * ليه تغطي الصورة صورة وريدنا داك يا بكري كلو
