* وكل حدث غريب يصبح خبراً صحافياً جدير بالنشر والإبراز ، لذا فإن أساتذة التحرير الصحافي دائماً ما يرددون : (إذا عض الكلب الرجل فذلك ليس بخبر، ولكن إن عض الرجل الكلب فذاك هو الخبر) ..!! * وعندما يذهب الهلال شاكياً فذلك ليس بخبر، ولكن عندما يشكو أحد الهلال فذاك هو الخبر ..!! * ويوم تقدم نادي الخرطوم الوطني بشكواه العادلة ضد الهلال في قضية مهزلة سيدي بيه تلوى الكلب في الشارع العام وسد نباحه الأفق فالرجل قد غرس أنيابه في احشائه، وأقدم علي تصرف غريب جعل فعلته خبراً..!! * في قضية الخرطوم لأول مرة يجد (كبسور) نفسه مشكواً ضده ..!! * كبسور (ملك الشكاوي) منذ زمن البرقاوي ..!! * رغم كثرة شكاوي كبسور التي لا تحصى أو تعد لم نسمعه يوماً قد كسب شكوى ..!! * ما غادر كبسور بطولة أو خسر صفقة لاعب إلا وقال أن لديه شكوى ..!! * سمعنا عن تضميد الجراح و(التداوي بالأعشاب)، إلا أن (الكبسوراب) ملوك (التداوي بالشكاوي) ..!! * قالوا أمس أنهم سيتقدمون بشكوى للفيفا ضد لاعبنا وولدنا بكري المدينة، و(يا كبسوراب الفيفا مشهودة) ..!! * انتوا الكبسوراب ديل ما بخجلوا ولا شنو .. (كملتوا الشكاوي .. كل يوم جارين مشتكين .. شيلوا قروشكم وأبقوا متخارجين) ..!! * أجمل مافي شكوى الكبسوراب أنها ستقدم للجنة اللاعبين غير الهواة التي لم تجتمع لتحسم الشكوى التي تقدم بها المريخ ضد هيثم مصطفى منذ أكثر من ثلاثة أشهر ..(يعني موضوع المدينة بتحسم بعد نهاية تعاقده مع المريخ، وللوقت داك الهلال بكون مشغول بشكوى نزار) ..!! * يا نزار تعال ما تجهجه الكاردينال ..!! * تحبوا الشكاوي و(التخدير) وخداع الجماهير والتلتلة .. و(الغريبة مفاوضاتكم فالصو رغم التطويل والجرجرة) ..!! * المدينة قال الموضوع ما أخد مع الوالي ستة دقائق .. (يعني بلغة الحساب يا كبسوراب كل سنة بدقيقتين .. والله يا "أبو الجيم" وريتنا لكن .. إقناع يمشي على قدمين) ..!! * (جيمي) ما بنقدر سيل (الإقناع) المنحدر ..!! * يعني (ابو الجيم) لو قعد مع لاعب (نص ساعة) اللاعب بسجل للمريخ مدى الحياة ..!! * قلت لي يا سلك (اللاعب لو قعد مع الوالي ما بقوم) .. وما البقعد مع الوالي يا سلك (طيارتو بتقوم) ..!! * ستة دقائق دي (بدل زمن ضائع) وما بتدي الواحد فرصة يسلم كويس ..(لكن زمنك حاسم وغالي يا ريس) ..!! * طبعاً يا مزمل بكري جايينا وخاتي في رأسه أنو هو أبو السرعة وأسرع من الدليفري ذاتو .. (جا لقى الوالي في دقائق معدودة بحسم للاعب مستقبل حياتو) ..!! * بمناسبة مستقبل (حياتو) .. يا ريت الإتحاد الأفريقي ما يكون عندو علم بشكوتكم دي لأنو خسائركم المتلاحقة للشكاوي يا (كبسوراب) بقت مهزلة، وما بتتعظوا رغم أنكم بقيتوا في لجان الكاف ونسة ومسخرة ..!! * معقولة يا (ناطقة) كل يوم جارين مشتكين وخسرانين .. ( حقيقي كرهتوا الكاف الشكاوي وخجلتوا مجدي شمس الدين) ..!! * يا مجدي بمناسبة شكوى المدينة : كورة الوصايفة ووفاق سطيف في نهائي الأبطال متين ..؟؟ * الجماعة ضربوا لعمر بخيت ما رد طوالي طلعوا بيان، لكن العاجبني في مهند الطاهر (قفل باب المفاوضات) قبل ما (يقفل التلفون) ..!! * مهند ما عندو أخلاق للتنظير والإقرار والكلام الكتير .. (قفل الباب وفتح الواتساب والجماعة بقوا يفتشوا في التبرير) ..!! * لحفظ ماء الوجه : قال الوصايفة أن مهند الطاهر ماشي إسبانيا .. (ونحنا بدورنا نقول لكم أولادنا شفوت عمرهم ما خذلونا ومرحباً بك يا وردة في برشلونة) ..!! * فعلاً الراحة البلقاها اللاعب في المريخ بتديك إحساس أنك عائش في اسبانيا ..!! * يا خليفة ما تضحكوا على الجمهور يعني مهند ماشي إسبانيول ..!! * نحنا نسجل وإعلام الهلال يبرر ..!! * أمبارح في جريدة (ناس الرشيد) خبر في الصفحة الأولى عن إغلاق عمر بخيت لهاتفه وتهربه من المجلس بحجة أنه في مشوار مع أسرته بالحلفايا وإنتظار أعضاء المجلس له بلا جدوى مما حال دون إصطحابه لتجديد عقده، وفي ذات العدد وفي نفس الصفحة منشور بيان مجلس الهلال الذي أعلن فيه عدم رغبته في التجديد للكابتن .. (يا جماعة أتفقوا عمر ما رد وتاني بعد داك قفل التلفون والمشكلة هاتفية، ولا عدم التجديد توصية فنية) ..؟؟ * يا ستار .. الحال بطال في العرضة شمال ..!! * لكن يا جماعة مهما كان كردنة دا رئيس نادي لو أتصور مع لاعب، وفشل في التسجيل، وتصريحاته كانت ما منطقية ومستفزة، وخفض السقف، ورفع درجة التوتر، ورفض يدفع، وسافر خارج البلد، وأدار النادي بالواتساب برضو مفروض تحترموه طالما هو رئيس الهلال ..!! * بأمانة كلام محمد عبد الماجد أمبارح عن كردنة ما عجبني ..(لو انتوا يا محمد بتقولوا عن الريس بتاعكم كدا نحنا نقول عنو شنو) ..؟؟ * بعدين الكاردينال دا قلتو ما بدفع وما بكتب حتى شيكات أوكي، لكن بكتب شعر ما تشككوا في شاعريتو لأنها آخر ما تبقى له ..(بس القصيدة عندو بتاخد زمن شوية ما ستة دقائق) ..!! * ما تشفقوا يا وصايفة صبر مافي .. كردنة ناوي يدير الهلال ب(زول بريدك زي مافي) ..!! * قلت لي يا حماده كردنة كل مميزاته (أنو زول عندو قروش ولما جا الهلال عطل الحاجة الوحيدة البتميزو) ..!! * يا جماعة القروش ما كل حاجة ..(كردنة محتاج فرصة عشان يطرح أفكار) ..!! * يا جماعة كردنة ما جايكم (خزنة ولا حصالة) جاي يقدم تجربة مختلفة في (فن الإدارة) ..!! * يا وصايفة ما تستعجلوا وشدوا حيلكم .. (نحنا شايفين كردنة دا مناسب بالنسبة ليكم) ..!! * أمبارح الأرباب ظهر بمقال .. (يا جماعة أدعموا بعض بالطريقة دي بتفرتكوا الهلال) ..!! * أين كبار الهلال .. لا بد أن يتدخلوا لفض النزاعات وحسم الصراعات ..(أين انت يا برير يا كبير أمة الهلال)..؟؟ * انا شايف القصة دي لو مشت بالطريقة دي (البرير مفروض يتدخل) ..!! * قال محمد عبد الماجد أمس أن (إعلام الكاردينال) يتحجج في فشل المجلس بقيم وموروثات الهلال ليداري خيبة المجلس في كسب المريخ لبكري المدينة، مضيفاً أن القصة لو فيها قيم ومثل الكاردينال ما ببقى رئيس الهلال ..(يا محمد لو سمحت ما تتكلم في خيار الديمقراطية وتطعن في الشرعية) ..!! * الزول دا عندو سقف، وانتو دايرين القصة جايطة وبتحبوا الصرف ..!! * خير (صرف) لخير خلف ..!! * الصرف دا ما أي زول بقدر عليه .. (الصرف داير زول يدور القصة بمزاج رايق ويحسم الصفقة في ستة دقائق) ..! * (رايق) عليكم .. يلا (إتكردنو) وعلي اللعيبة ما تتجننوا ..! * يلا يا عماد الطيب طبقوا الموروثات وأقفلوا غرفة التسجيلات ..!! * بكرة بإذن الله نحدثكم عن تصريح عماد الطيب الأضحوكة ..(والظاهر أمينكم العام برا الصورة وما عارف منو الماسك الصفارة ومدور الكورة) ..!! * قلت لي يا عمدة الكباتن الكبار لا يمكن أن يوقعوا علي إقرار ..!! * إتقرري ..!! نقش أخير * لو (تقاضي) أو تبرر أو تجافي زول جهجهكم زي المدينة مافي
