* .. ويومان فقط تبقيا على ليلة إفتاء بكري المدينة في صحة الشكوى التي تقدم بها الوصايفة ورفضت لجنة الإستئنافات قبولها، بينما توعد الكاردينال بالتصعيد للفيفا، وما وضع (زعيم أمة الهلال) في حساباته أن القضية برمتها سيحسمها بعد غدٍ (ملك العقربة) وحينها ستزداد الجراح و(تكتر الهضربة) ..! * طبعاً بصراحة كدا يا بكري المدينة (انا معجب بحكاية انو كردنة زعيم أمة الهلال وشايف القصة دي لاقية عليهو وما بلقوا زعيم أحسن منو ) ..! * غايتو زي زعيمكم دا لو عندنا نحنا دائرة كورة ما بدخلا، ولو لقى فرصة ودخل اي قطاع (صمدو بقفل ليهو البلف، وبضبط الصرف) ..! * خلونا من (بلف) عبد الصمد ونرجع ل(مواسير) كردنة ..! * كردنا قال ماشي الفيفا لإنتزاع حقوق الهلال، و(بكري المدينة داير يقفل ملف الشكاوي مع درع الإستقلال) ..! * بكري ما زعلان من كلام كردنة، لكن متضايق من تخدير مجلس الهلال للجمهور و(كل يوم شكوى جديدة لكبسور) ..! * البلد دي بقت مليانة إعلانات (علاج بالأعشاب) وتصريحات (تداوي بالشكاوي) ..! * من يوم السبت تاني ناس الهلال ما بجيبو سيرة بكري ..و(ومشوارين تلاتة وإعداد الفجيرة بتكون حكايتو حكاية، والدفاع برفع الرأية) ..! * واليوم نرفع رأية إستقلالنا ..! * ناس مساوي حيقطعوا من أول مشوار و(يرفعوا الرأية) ..! * انتو يا كابتن فاهمين قصة (اليوم نرفع رأية إستقلالنا) دي غلط ..! * والغلط منك أصلو ما مني .. و(العقربة) بعد بكرة بتجنني ..! * بكري عمل (بروفة لمشية العقرب) في بورتسودان، والتطبيق الكامل للمشية بإستاد الخرطوم ..و(السبت يوم العقربة والخبت) ..! * يا (عقرب) أعمل في سيمبو زي ما انت داير لكن خلي قلبك رحيم و(عاين لي باتريك) ..! * مدرب الوصايفة البلجيكي باتريك بدأ مسلسل الأعذار، وقال ببجاحة : (ما جبتو لي فريق أفريقي ألعب معاهو قبل مباراة المريخ) ..! * خلاص بدينا ..(الكاردينال ما قصر جاب لاي واحد "أي باد" تاني الفريق الأفريقي لازمتوشنو ) ..؟ * أفتح يا باتريك الأي باد وخش علي (عمك قوقل) وجيب الفريق الأفريقي الإنت عايزو وأتفرج عليهو ..(ما تزعجوا زعيم أمة الهلال .. كردنة دا ما فاضي، وجاب أجهزة بتخليكم تلعبوا زي ما انتو دايرين في العالم الإفتراضي) ..! * انتو باتريك دا بستهبل ولا شنو يا محمد عبد الماجد (الخواجة دا تجيبوا ليه فريق افريقي من وين، طالما مافي فريق افريقي عندو مهرجان) ..؟ * انا جني وجن المدرب البكون عارف إعداد فريقو كلو (مهرجانات ومباريات إعتزال)، ولمن كورة القمة تقرِب (يخت يدينو في جيوبو زي السائح ويعمل رايح) ..! * بالمناسبة : كأس السياحة قال ما بدخل الدولاب إلا نجيب ليهو درع ..(وبعد بكرة بنفرج فيكم الشاف والسمع) ..! * كردنة حرارتو زايدة أول امبارح جاء منفعل من المطار للإستاد مباشرة، واحتمال لحدي يوم السبت لو واصل علي ذات الوتيرة البلجيكي يدخلو التشكيلة ..! * يا كردنة ما حك جلدك مثل ظفرك ..(أحسن تخش تلعب بدل تقعد في المقصورة وبكري في الملعب يتشقلب) .! * يا جماعة العقرب سمو فاير ..(وقال درع الإستقلال مسؤوليتي الكاملة) ..! * سم العقرب يتسبب في هبوط في التنفس وإضطراب في القلب ..(عشان كدا حقو ناس مستشفى القلب يوم السبت يكونوا جاهزين ويزيدوا عدد السراير، لأنو المدينة سمو فاير) ..! * بكري بحسم قضية الشكوى دي صاح الصاح، و(أعملوا حساب السم النقوع اللي البدن نتاح) ..! * تطلعوا من (العقرب) تجوا ل(الإباتشي) ..(غايتو الأسبوع دا المريخ والأهلي بفرجوا فيكم الغاشي والماشي) ..! * العقرب قضيتو بحسمها بنفسو، والبرنس منتظركم بباص القون، وبعد شوية بنسمعكم في شندي تكوركوا (يا الله درون يا الله درون) ..! * لو عندكم مع المدينة أي موضوع تعالوا بعد بكرة ..(والحساب ولد) .! * يا (عقرب) الناس ديل ما عندهم (ملسوع) أقصد ما عندهم (موضوع) ..! * ناس عبد الوكيل وشباب التعبئة جاهزين للنصر ، حقو تكلمو الصحاف يسعف الجمهور ويجهز المصل ..! * (مصل) يا أخت بلادي يا شقيقة ..! * (العقرب) جاهز و(ممصلوين) بإذن الله ..! * إتمصلي ..! نقوش متفرقة * قال كردنة أن الإتحاد متواطئ وقرار لجنة الاستئنافات بخصوص شكوى فريقه ضد المدينة لا يساوي ثمن (الصفر) الذي كُتب به ..! * رد (العقرب) على تصريحات كردنة تطالعونه بلوحة إستاد الخرطوم مساء بعد غدٍ، و(الرد بالمصل) ..! * كردنة قال ماشي (الفيفا) ..(الظاهر أنو زعيم أمة الهلال داير يكمل فترة الرئاسة تصريحات وشكاوي وإستئنافات) ..! * يا كبسور ما تخدر الجمهور ..! * هل سبق للوصايفة كسب أية شكوى تقدموا بها للفيفا ؟ ..(أبداً وطبعاً لا .. دائماً الحيثيات معطوبة والشكاوي مضروبة) ..! * حسمنا كأس السياحة وبقينا ناس درع ..(سمحة المهلة) ..! * العقرب وكتين ينشرع بياخد (الهلال) والدرع ..! * قلنا ليكم ما (تندرعوا) في العقرب ..(عشان الود ما يزعل وكلو ربع ساعة يقوم يتشقلب) ..! نقش أخير * أضرب أضرب يا (عقرب) ..!