أمين خزينة الهلال الأسبق يعتبر مباراة القمة السبت (للقزقزة والاستمتاع) أحمد دولة: اسماعيل حسن.. مزمل أبو القاسم.. حسن محجوب أصابتم فوبيا الهلال.. والجماعة شغالين هضربة في نهار رمضان أمسكو سانيه مايلحقنا امات طه.. ويا سمعة يوم السبت حنبكيك بالدمعة والتلاتة نقاط في الجيب الخلفي سؤال برئ: الهلال فايت المريخ بي كم نقطة؟ وتجيبو أكرم.. تجيبو الحضري.. تجيبو حامد بريمة ذاتو مابحلكم تمسكو منو؟ سادومبا البمبا.. سانيه رجل الثواني.. ولا الغزال المابعرف المحال ولا عقرب المدينة الأقوانو زي نار الكمينة المريخ يعتمد على الباشا.. الباشوية في مصر انتهت.. ونحنا في رمضان بنحب التهام أي شي أحمر اسماعيل حسن محرش.. والمحرش مابكاتل.. ومزمل قاعد في الأهرام اليوم وعامل فيها كاتب سياسي ! قال أحمد دولة: قرأت ما ورد على لسان اسماعيل حسن وبقية الإخوة المريخاب في الصدى وكنت حريصاً على متابعة وقراءة كل ما أورده اسماعيل حسن من خلال صالون الكونفدرالية وتعجبت وتساءلت: اسماعيل حسن قايل نفسه اسماعيل حسن الشاعر الذي ارتبط اسمه بوردي فنان أفريقيا الأول الهلالابي القامة ولا شنو؟ وكاستهلالية أقول لاسماعيل حسن ونردد مع وردي بلسان أخونا اسماعيل حسن: أوع ياباكي تنسى في لحظة الوصية.. أنا عارفك حنين وبتشمّت عليَ حلفتك يا باكي وحملّتك أمانة الفاتك وروّح ما تبكي عشانو حلفتّك يا ونقي ايه آخرة بكانا.. كل الهلالاب بتفرح ونحن الهم طوانا وهذا سيكون لسان حال اسماعيل حسن وأخونا مزمل أبو القاسم وبسبوسة بعد مباراة القمة وأقول لصديقي اسماعيل حسن: المحرش مابكاتل.. نحنا عارفنك محرش من مزمل أبو القاسم وصاحب كبد الحقيقة لزاك وقعد في الأهرام اليوم وعمل فيها كاتب سياسي لكن قوليهو دا مابحلك من مباراة السبت ومابحلك من الحلاقة.. تمرقوا من مباريات الكونفدرالية تلقونا قدامكم في الممتاز.. تمرقوا من الممتاز تلقونا قدامكم في كأس السودان وكان طلعتو من دي تلقونا في دي وقلت لي يا مزمل أبو القاسم داير تعمل فيها سياسي برضو حاتلقانا قدامك في الاتحاد الأفريقي وأين ما تكونوا يدرككم الهلال ولو كنتم في استادات مشيدة (هاك الرد كاسل دا).. أقول لاسماعيل حسن إن المريخ دا دحين عندو كم نقطة في الدوري؟ والهلال فايتو بي كم نقطة؟ مجرد سؤال برئ وكدي أول حاجة قبال ما تتحدونا وتتكلموا عن الفوز وانتصار المريخ يوم السبت كدي أول حاجة وقفّوا شكلة حراسكم ديل ووقفّوا شكلة الجهاز الفني وبعد ما تكملوا التحانيس لأكرم الهادي والحضري وفاروق جبرة وريكاردو تعالوا اتحدونا ويا اخوي اسماعيل ويا بسبوسة ومزمل يكفي الهلال فخراً أنه أجبر المريخ وصديقي جمال الوالي على استقدام الحضري ودفع مبلغ 800 ألف دولار وبعد دا كلو الحضري لمن شاف الدفاع والرواكيب القدامو اختلق المشاكل و(كب الزوغة) لكن تاني جماعتكم حنسوهو وجابوهو والحضري قال ماحايدي أي فرصة للحارس أكرم الهادي ويعني (كرومي) يقعد على دكة البدلاء بس ومن عندي أقوليكم لو الاتحاد بقبل والحكم بفوتا ماعندنا مانع يقيفوا الاتنين في المرمى أما دفاع المريخ فحكايتو حكاية يوم السبت يمسك منو ويخلي منو.. يمسكوا كاريكا المزيكا ولا سادومبا البمبا ولا سانيه رجل الثواني ولا الغزال المابعرف المحال ولا عقرب المدينة الأقوانو زي نار الكمينة.. هجومنا نار منقد صحي صحي.. مش زي نار المنقد بتاعت حسن محجوب أما هجوم المريخ فيعتمد على احمد الباشا.. كل الأجانب في حالة بيات والاعتماد كلو على الباشا وهي الباشوية في مصر انتهت.. قال ايه باشا وخالي أطيان.