هلال مريخ بدون جمهور من يعاقب من؟ كورة مسيخة مساخة (ممصمصة) زي موية الترمس رباطابي وصفها قال زي الأكلة المعمولة بي مرقة جداد وممكن نشبهها زي عرس المغترب العايز يرسلوا ليه العروس طرد كل الناس الحاضرين العرس اطراف اخرى، اصحاب العريس في هذه المباراة كانوا ناس الاعلام ناس قوون وناس عبدالرحمن عبدالرسول الذي ظهر بعد المباراة وهو (يتكشم) ويضحك وهناك ناس الأمن واحد بتاع فول كاتب على اللافتة الفول ابو لحمة، الزبائن قالوا ليه وين اللحمة قال ليهم يعنى شاى العروسة بدوكم معاه عروسة ولا شاى الغزالتين بدوكم معاه غزالايا، المهم (سكواها) سواها واتير توماس ما قصر معاه كأن لسان حاله يقول نحن مع الوحدة وضد الانفصال. المباراة بدون جمهور عقوبات طالت الهلال وجمهوره اللاعب رقم واحد وحرمت المريخ الجمهور والدخل وعاقبوا المشاهدين، الحصيلة كورة (بايخة). نقول لأهل المريخ مبروك وما تفرحوا بالثلاثة نقاط دي قبل كدة خليناكم زي الدرويش في الزفة. وكما يقول المصريون (كورة أوانطة هاتوا فلوسنا). هدايا الحلقة: 1. واحد داير يبكى بي دمعة بكى بى سليقة!. 2. واحد صحفى قال لبرناردشو انا صحفى احسن منك انت بتكتب بحثاً عن الفلوس وانا بكتب بحثاً عن الشرف، قال ليه صدقت كل زول بيبحث عن ما ينقصه!. 3. بمناسبة امتحان الاساس: البت في المدرسة، الاستاذة ودتها للناظرة، الناظرة قالت ليها عملتى شنو؟ قالت بس رميت وردة من الشباك، قالت ليها بس كده خلاص امشى فصلك بعد شوية جات بت يدها ورجلها مكسورة ورأسها مفلق، الناظرة قالت ليها انتى منو؟ قالت ليها انا وردة الرمونى من الشباك!!. 4. واحد حلف لو ولده نجح يضبح ليه خروف، قالوا ليه الحصل شنو؟ قال ليهم الخروف نجا من الضبح!. 5. واحد سكران وقع من الدور الرابع الجماعة اتلموا فيه وسألوه الحاصل شنو؟ قال ليهم والله ما عارف انا جيت هسع دي!. 6. رباطابي راكب في البص كلما يطلع الحقة يسف في طالب يقول ليه جيب سفة بعد كترها قال ليه انت بتقرأ في ياتو جامعة؟ قال ليه في جامعة الجزيرة، قال ليه انصحك تحول لجامعة الفاشر!. 7. واحد جنه يغيظ صاحبه قالوا ليه تتصور وانت ماشي عرفت الحمار وما عرفتك؟ قال ليه صدقت الحمير بتعرف بعض!. 8. أسماء كتيرة لأشخاص ب (هلال) ما سمعنا واحد اسمه مريخ، المريخاب قالوا في لاعب جيد اسمه هلال ابو يسجلوه!. 9. دكتور اسنان اشترى عود قصب سكر لقاه مسوس قام حشاه!. 10. الجعلى حكى نكتة لى مرته قالت ليه ها ... ها ... بايخة قال ليها ها ... ها ... طلقانة!. 11. حلفاوى لمن رمضان سخن قال والله حقوا يعملوه زي كأس العالم كل اربعة سنين وكل مرة في بلد!. 12. المدير رسل المراسلة الرباطابي قال ليه نادى لى محمد افندى بعد ? ساعة المدير هرش المراسلة قال ليه كلمتك قبل ? ساعة تنادي محمد افندى ليه ما جاء؟ قال ليه انت رسلتني علشان اكلمه ما قلت شيلوا فوق صفحتك جيبو!. 13. واحد جزار مشى يخطب لى ولده، ابو العروس قال ليه عايز مهر 50 مليون قال ليه انت حسبت الكيلو بى كم؟. 14. واحد صاحب خيال قال تتخيل الدنيا بدون نسوان تكون النتائج: اسواق هادية، شوارع فاضية، الشرطة مرتاحة، شركات الاتصالات خسرانة، خدمة رسائل مافى...!. خاتمة: الجمهور هو ملح المباريات وهو دافع الدخل انتوا عاقبوا المتفلتين والذين يخرجون من الخط وما تاخدوا البرئ بجريرة المذنب، ونكرر التهنئة لأهل الديار الحمراء ونقول ليهم كريم أدى غشيم. مع تحياتى،،،
