هناك مظاهر سالبة في عالم الكورة والرياضة، وهى (الانطنة) اى الذهاب للأنطون علشان الغلب يكون مضمون. لو دعاء قرآنى وطلب النصر من الله ممكن، لكن (التكتيف) والسحر في (الروسين والكرعين) ده نحن ضده ونخرج له الكرت الاحمر لان السحر من اعظم الكبائر واليكم تعريف له: السحر هو احدى الموبقات السبع التى وردت في الحديث الشريف وهى (الشرك بالله، السحر، قتل النفس التى حرم الله الا بالحق، اكل الربا، اكل مال اليتيم، التولى يوم الزحف، وقذف المحصنات المؤمنات الغافلات).. والملاحظ ان السحر يأتى بعد الشرك بالله مباشرةً، والسحر لانه من اعظم الكبائر وهو كفر وتعلمه كفر والساحر كافر ومعلم السحر كافر. اختلف العلماء في استتابة الساحر فمنهم من افتى باستتابته سبعة ايام فإذا لم يتب يقتل، ومنهم من قال ان الساحر لا يستتاب وانما يقتل في الحال. قال صلى الله عليه وسلم «حد الساحر الضرب بالسيف» وقال ايضاً «من اتى عرافاً فسأله عن شئ لم تقبل صلاته اربعين يوماً» وقال ايضاً «من اتى كاهناً او عرافاً فصدقه بما يقول فقد كفر بما انزل على محمد صلى الله عليه وسلم». الاسلام حرم ايذاء الناس وسعى الى كف الاذى عنهم وابان ان المؤذى لعباد الله يمقته الله ويمقته الناس وينبذه المجتمع، فالايذاء دليل على سوء الخلق وانحطاط الادب.. قال ابن المبارك «حسن الخلق طلاقة وجه وبذل معروف وكف الاذى» والشخص الذي يريد الشر بالناس بعمل السحر يغضب الله سبحانه وتعالى.. الرجل او المرأة التى تذهب الى الساحر ليسحر من اغضبها او من يريد ان يتزوج بها او بابنتها.. هذه الاشياء في عالم كرة القدم وتعمل بجهالة دون دراية لعاقبتها الوخيمة وهو امر انتشر واصبح له سماسرة وسوق رائجة. الراوابط الأسرية: السحرة يحاولون التفريق بين المرء وزوجه وهدم البيوت وهذا لا يسعد الا الابالسة. جاء في الحديث الشريف «ان ابليس يضع عرشه على الماء ثم يبعث سراياه فأدناهم منه منزلة اعظمهم فتنة يجئ احدهم فيقول ما تركته حتى فرقت بينه وبين امرأته قال فيدنيه منه ويقول نعم انت». الآن نجد من يشكك الرجل في سلوك زوجته ويمشي بالنميمة والفتنة بين الناس فاحذروا ايها الازواج من المحاولات التى يتولى كبرها شياطين الانس والجن. العظات والعبر: نحذر السذج الذين يذهبون للسحرة الذين يسمون بالاناطين ويستغلونهم بالطلبات الباهظة وايهامهم بأن النتائج مضمونة ويسلمونهم العمل او الشغل، ويطلبون منهم دفنه في المقابر او الاستادات (دفن الليل اب كراعاً بره) او يطلبون منهم دفن قرد او حمار حي وعلشان يسبكوا المسألة يطلبون منهم اشياء صعبة مثل: سحلية شولة او ضب اعزب او «قعونجة» حوصاء او خروف اسود وديك رومى وزجاجة ويسكى. يا اخوانا السحر كان بينفع الهنود كان بقوا ابطال العالم في الكرة والرياضات الاخرى. طرائف الاناطين وهدايا الحلقة: 1/ الفكي طلب البياض بتاعه من الفريق المنافس للصعود للدورى الممتاز بالعملة الحرة. جابوه ليه بالدولار ولما انهزم الفريق حملهم المسؤولية وقال ليهم انا طلبت البياض باليورو انتو جبتوه بالدولار وده عمل فرق عملة علشان الخدام اجانب وقاموا غيروا النتيجة (هاك السوق الاوروبية للدجل والشعوذة دي)!. 2/ الفكي رفض يشيل بياضه بالشيك وقال للجماعة يا شيك مصرفى يا خطاب ضمان يا كاش لانه بقلل النقاش وفي حالة الكاش هناك 5% Discount (خصم خاص). 3/ الفكي قال للجماعة علشان تغلبوا لازم تتمرنوا من العصر حتى المغرب وتعملوا معسكر كارب واللاعبين مع الخصم يلعبوا ضاغط والمهاجمين يسددوا من خارج خط 18 ويركزوا على الزوى ويقفلوا مفاتيح اللعب في الفريق الخصم بعد ما كسبوا عينوا (حاج ابكر) فكي ومساعد مدرب للفريق. 4/ الاداري قال للانطون عايزين نغلب الفريق المنافس 6/صفر حاج ابكر قال ليه (لا كده كترته المحلبية)!. 5/ حاج ابكر جابوه النادي وجابوا ليه كباية شاي بي لبن (شفط اللبن) وخلى الشاي الاحمر في الكباية وقال ليهم الشاي الاحمر بساهر بي!. 6/ زوجة صحت من النوم نص الليل ما لقت راجلها في الاوضة مرقت تفتش ليه لقته في الصالة واقف قدام النتيجة بعاين ليها وبيبكي. قالت ليه مالك يا حبيبي في شنو؟ قال ليها تذكرى من 25 سنة لما ابوك اكتشف البيناتنا وقال لي لو ما اتزوجتها انا حأدخلك السجن تاخد تأبيدة؟، قالت ليه آآي متذكرة دي حاجة ما بتتنسي، قال ليها وهو بيبكي اكثر لو كنت انسجنت كان هسع اخذت افراج!. 7/ صاحب خيال اجر بيت الجماعة قالوا ليه البيت ده مسكون ما سمع كلامهم بالليل قام الجان عايز يخوفه قعد جمبه وقال ليه ممكن سيجارة المسطول عاين ليه وما خاف منه وقال ليه اتفضل، تانى يوم جاه مطلع عيونه وقال ليه ممكن سيجارة قال ليه اتفضل، ثالث يوم الجان جا ناكش شعره ومطلع اسنانه وخشمه طالع منه دم قال ليه ممكن سيجارة؟ برضو اداه وقال ليه ما ملاحظ انه الدخان بقى يأثر على صحتك!. 8/ ضب كضاب شديد قال لى حبيبته «الضبة» انا كنت تمساح بس حبك هلكنى!. 9/ واحد جلده اتصل بيه صاحبه هاتفياً: كيف يا راجل؟ والله الحمد لله، وكيف الاولاد؟ والله تمام التمام، وكيف معاكم الزراعة السنة دي؟ والله مية المية، أها رصيدك كيف؟ قال ليه قلت شنو؟ ما سامعك!. 10/ زوجة قالت لى راجلها الجعلى دلعنى: قال ليها انتى قمر قالت ليه انت شمس قال ليها انتي لؤلؤة قالت ليه انت ماس، قال ليها انتي قطة قالت ليه انت كلب قال ليها انتي طلقانة!. 11/ كديس حنكوش مشى الصيدلية قال للصيدلى لو سمحت عايز سم فار!. 12/ واحدة ركبت الحافلة وشايلة شافع شين. السواق قال ليها «الشنا عندكم» قامت زعلت ومشت الكنبة الورا قعدت جمب واحد برة الشبكة، قال ليها جيبي القرد ده وامشى شاكلى السواق!. خاتمة: اخرجنا الكرت الاحمر للسحرة والدجل والشعوذة، ويا ريت كلنا نلعب نظيف او كما يقال Fair Play. مع تحياتي،،،
