وصايا الاسر للبنات المتزوجات حديثاً والقديمات كثيرة ومتنوعة في السودان، نكتفى بأغنية [كلام راجل أسمعا]: بنيتي حسابك كلام راجل اسمعا انتي حتى عجاج بيته عنقريبو فرشي وكورة ام قعر تحت سريرو جيبي ختى وقال وقلنا في لسانك لا تجيبي جارتك المهوهوة دا لي بيتك بخربي وكت تقضى خدمتك لي نارك اكتلى كلام لو تخاف من بيت لا تمرقى نصيحتي كان سمعتى لى بيتك امسكي *** الله والنبي كلام راجل اسمعا راجل كان ما ناداك لا تمشي تلحقا فجر كان ولا عندو لي عشيا امهلا لا تخلى ينقنق ولى كلامه تسفها لا تقوي راسك بكرة يقولوا طلقا بنيتي حسابك كلام راجل اسمعاه وعلى مستوى العالم العربي اليك كيف تطبخين زوجك؟: 1/ ضعى زوجك في قدر من الاهتمام والمحبة «بس هدى النار وهدى اللعب» هاك البريستو دا!. 2/ اسكبي عليه حنانك وعطفك «انتبهي حتى لا يغرق» بس ما تسكبي عليه موية سخنة!. 3/ ملحيه بقليل من الابتسام «خليها خفيفة حتى لا يقول عليك هبلة» اوعى من ملحات المفاريك اللايوقة!. 4/ حركي المزيج بملعقة الاعصاب الهادئة «الشكوى لله لازم تتحملى» بس ما تسدي ليه نخرته وتسقيه ليه بالقوة!. 5/ احكميه بغطاء من الثقة المضغوطة «زي حلة البريستو». 6/ ما تنسي 5 بهارات: 1/ لا تناقش 2/ لا تجادلي 3/ لا تطالبي 4/ لا تعاتبي 5/ لا تحاسبي. اذا أكملتِ هذه الوصفة هنيئاً لك الجنة في الآخرة ومستشفى التجاني الماحي في الدنيا. لبنانية وسودانية وخليها بالنية: لبنانية رسلت رسالة «مسج» بالموبايل لزوجها (حبيبي بدي جبنة بيضة متل وجك وسكر متل دمك وعسل متل فمك وشطة متل مشاعرك ) السودانية شافتها وغارت منها رسلت رسالة لزوجها (جيب لي بصل زي ريحتك وباذنجان زي لونك وقرع زي راسك الكبير وزيت زي دمك، اوع تتأخر بحرقك وبحرق ناس امك معاك). هدايا الحلقة: 1/ حرامي مسكته واحدة سمينة وقعدت فيه وقالت لراجلها بسرعة اضرب للشرطة راجلها قال ليها هو الرقم كم؟ الحرامي: 3 تسعات اضرب بسرعة!. 2/ الرباطابية: هل الاولاد ناموا؟ الزوج: ايوة وقفلت عليهم باب الاوضة، الرباطابية: يعنى ما في غيرنا انا وانت؟ الزوج: ايوة يا حبيبتي، الرباطابية: يبقى دي ريحة رجلك قوم اغسلهم الله يقرفك!. 3/ جعليين اسسوا شركة اتصالات سموها «اتصالات جعل» عملوا اعلان للتسعيرة: - من جعلى لى جعلى مجاناً. - من سوداني لى سوداني 5 قروش للدقيقة. - من شايقى لى جعلى 5 جنيه للدقيقة. - من شايقى لى شايقى لا يمكن الوصول اليه حالياً. 4/ حكمة اليوم «لو كانت الابقار تطير لصعب حلبها». 5/ قصير اتزوج قصيرة جابوا شافع لمن طهروه كمل!. 6/ الشاب جا لى رباطابي صاحب عطور قال ليه ركب لى ريحة بخة واحدة كل الحلة تشمها. قال ليه والله الا اركب ليك حلو مر، «هاك الكوجين دا»!. 7/ محشش متدين جديد شاف ولده ماسك السيجارة بيده الشمال ضربه كف وقال ليه باليمين يا كلب!. 8/ ادروب عمل رنة الموبايل صوت الفناجيل!. 9/ واحدة قالت لى حبيبها انا حلمت بيك امبارح هل انت حلمت بي؟ قال ليها انا بقرأ المعوذتين قبل النوم!. 10/ الجد لحفيده: امشي المدرسة علشان مدير المدرسة اتصل بأبوك وجاي الليلة يشوفك علشان غيابك كم يوم، الشافع: لا لا لا يا جدو امشى المدرسة انت علشان انا قلت ليهم جدو مات!. 11/ واحد انجليزيه تعبان عرس ومشى شهر العسل لندن، في الغرفة ظهر فار عروسه قعدت تكورك اتصل بخدمات الغرف قال ليهم: You Know Tom & Jerry? خدمات الغرف قال ليه Yes صاحبنا قال ليه Jerry is here. 12/ بايرة وشينة طلع ليها جنى قال ليها اطلبي العايزاه قالت ليه: عايزة 5 فلل و10 عربات مارسيدس و500 جزمة ورصيدي في البنك مفتوح الجني قال ليها: انا ما بقدر على كل دا مستحيل، قالت ليه: طيب عايزة عريس يحبني، الجنى طلع ورقة وقلم وقال ليها نعيد الطلبات لو سمحتى الوان العربات شنو؟ 13/ يمة انا بحبه قلبي معلق فيه ......... طراااخ، نعتذر لانقطاع الصوت الام كفتت البنت «حصرياً للجعليين فقط»!. خاتمة: الوصية في الذمة: المرأة السودانية وصيتها حسب المنطقة العايشة فيها غرباً او شرقاً او شمالاً، يعنى وصايا مصرية ولبنانية ما بتلفق مع نسوانا امات مفاريك وام دلدوم.
