في مطلع السبعينات – (من القرن الماضي) ظهر في الخرطوم فنان شاب صغير – بشعر كثيف وقامة طويلة – وصوت (عنابي) جميل. الصوت العنابي فيه (جمادة)..زي جمادة اللبن لو بتعرفوا (الجمادة).
الجمادة دي فيها خلاصة اللبن كلو – وبطلعوا منها القسطة والسمنة والجبنة.
الاصوات الجميلة عندما تظهر غنائيا تحفر في وجدانيات الناس ..وتنقش في دواخلهم (غرف) من الطرب الجميل.
يحتفى السودانيون احتفاء كبيرا بالصوت الجميل ...ويخرجون اليه في حالة من حالات الاندهاش اللا ارادي.
ذلك الفنان صاحب الصوت الجميل عندما ظهر - زاحم الكبار ...وتصدر قائمة الفنانين الاكثر طلبا في الحفلات – والخرطوم مثل (مكتبة الجامعة) لا تستكين إلا لاصحاب المواهب العظيمة.
نافس الكبار وقتها محمد وردي وابراهيم عوض وعثمان حسين – ووضع (بصمته) في ذلك الخضم العظيم والتخوم العجيبة.
ذلك الفنان كان هو (نجم الدين الفاضل) ...الذي ظهر باغنيات اعطاها من (خصوصيته) الكثير ، فارتبطت به ارتباط اقوى من ارتباطها باصحابها الاصليين.
سيطر نجم الدين الفاضل على الوضع سيطرة تامة بالاغنية التى كتبها السر احمد قدور (يا حليلك اسمر) ولحنها العاقب محمد الحسن وتغني بها ثم اهداها لنجم الدين الفاضل اعجابا وبه وتشجيعا له.
يا حليلك يا اسمر ابيت لعيوني تظهر
مانعني الوصال
يا ورد الجناين النواره باين ابيت لي ما اعاين
وحرمت الحلال
تايه ما عليك لمين اشتكيك احتار عقلي فيك
وهجرانك محال
المعروف ان العاقب محمد الحسن قد تغني ايضا للسر احمد قدور باغنية ( يا حبيبي نحن اتلاقينا مرة – في خيالي وفي حياتي الف مرة)..الاغنية التى رفضتها كما قال السر احمد قدور عائشة الفلاتية عشان (الف مرة دي) ، فلحنها العاقب محمد الحسن وتغني بها – وتفاجأت من بعد عائشة الفلاتية ان الاغنية التى رفضتها تحقق انتشارا كبيرا ...وتتصدر الاغنيات وقتها من حيث الطلب والاستماع.
اعود الي نجم الدين الفاضل والذي قدمته اغنية العاقب ( يا حليلك يا اسمر)...وقدمها ايضا للحق بصورة جديدة ومختلفة ...بعد ان وضع فيها بصمته.
ايضا ظهر في ذلك الوقت نجم الدين الفاضل باغنية تراثية اكتشفها نجم الدين وقدمها للناس وحققت انتشارا وشعبية مبالغ فيها.
تلك الاغنية كانت هي (ليالي الانس)...حيث عرف نجم الدين الفاضل ان يصنع في ليالي الناس في ذلك الوقت (انس)...والفة بعد ان توحشت لياليهم ..وتضجرت سهرا وكدرا.
الي ان جاء نجم الدين الفاضل ليصفى كدرها الي انس.
ليالي الأنس لذاذ بالحيل
نعود للساحه الخاتيه رحيل
الاغنية شهيرة وقصتها معروف وقد روي نجم الدين الفاضل قصتها في حور نشر له في وقت سابق في صحيفة (الاهرام اليوم) عندما حكي وقال عن الاغنية :
(هي أغنية تراثية سمعتها من عائلة كريمة ترتبط بمنطقة البطانة وتحكي قصة رحلة قام بها أحد الشيوخ أو النظارة وتاه في الطريق فخاطب سائقه بقوله (يا ود باقير ما قلت خبير وين السلمة وين درب أم دير؟) فيرد (يا شيخنا خلاص الشفقة تطير هداك الوادي ودرب أم دير).
الاغنية تلك خلقت بين الناس (انس)..وصنعت (إلفة) عجية في الوقت الذي قدمت فيه – ومازال للاغنية بصوت نجم الدين الفاضل مكانة كبيرة في النفوس وذاكرة تحتشد بالحنين:
اللهجو عسيل
في القري والريف ما لقيتلو مثيل
في بيتو ملك علي جيلو مدير
والعنبر فاح في الوادي أب سيل
الاغنية عرضت باكرا لادب الرحلات ..وتتطرقت الي (الشوق) في الارتحال قصدا للحبيب.
وين يا أم ضمير ظعنك شايل
وين الديفات وين بت نايل
براق القبله صبح شايل
و الدنيا خراب العرض الزايل
المعروف ان ادب الرحلات ..نثره وشعره دائما نجد فيه (الحكمة)..وقد ارتبط الترحال عند الشعراء بالفضائل والشجاعة والحكمة والشوق...كما عند ود ضحوية وابراهيم الفراش.
من الاغاني التى اشتهر بها نجم الدين الفاضل ايضا الاغنية التى كتبها اللواء ابوقرون (قطعة سكر).
قالوا قطعة سكر قلنا احلي وانضر
يا نعومة المخمل ولا عود الصندل
يا حنان يا حنه .. يا زهور في جنه
في جمالك تهنا ..تاه عقلنا وجنا
هذه اغنيات خفيفة ..تعبر عن الناس ...وعن احوالهم وكأنها لسان حال اي واحد بقع في مثل هذه الحالة.
اغنية (قطعة سكر) تلك ..ايضا كانت قد اخدت ليها (هوشة) كبيرة ...وكان اي عريس (فرحان) كدا بشترط الحفلة تبدأ بهذه الاغنية.
زكان يضمن ذلك في عقد الحفلة.
الي جانب هذه الاغنيات الخفيفة والتى كلها تميزت بلحن (الحفلات)..وبهجة وهجيج ...قدم نجم الدين الفاضل من اغاني الحقيبة اغنية (المنعوك اهلك)...وهي اغنية شهيرة من درر الشاعر عمر البنا.
المنعوك أهلك
لوهجرك طال انا بهلك يا خفيف
الروح منعوك اهلك
وهى الاغنية التى اخترتها لكي تكون موضوع حديثنا اليومي ...وقد وجدت حروفها تتفق مع حالة اللاعب فيصل العجب ...الذي تعرض لظلم ومنع (جائر)...زي (الرعي الجائر) من اهلو.
واهلو ديل ناس المريخ طبعا – الذين اجبروه على الاعتزال وحاصروه ليك بي خطاب اعتزال على السريع كدا ..لتنطبق عليه الاغنية تماما.
لورد التصريحات طبعا شبك ليك العجب (نقة)..وتلميحات وتصريحات لمن كتب خطاب الاعتزال – بقى ليه في رقبتو...(زي شنطة المدرسة).
هل منعو النسيم يجيب ريك
وهل منعو البدور تحكي محيك
وهل منعو الغصون تميل زيك
لو منعوك او سابوك ما بسيب غيك
ياخفيف الروح منعوك اهلك
اها يا جماعة عليكم الله بعد الكلام دا نحن قصرنا مع العجب – طبعا ناس سلك ومعاوية الجاك نكروا ليك (العجب).
بقوا كأنهم ما بعرفوه.
نكروه (حطب).
عشان كدا نحن لازم نذكرهم ليكم بالحاصل ..ولازم (ننصر) الموهبة دي ..ونقيف معاها على الاقل ..ما تبقى علينا حكاية اننا بنشيل اللاعب (لحم)..ونرموه (عضم) في الاعتزال.
كدا ما صاح يا جماعة – اسوأ الظلم هو الظلم الذي يقع لك من ذو القربي ..من الاهل.
العجب دا يا جماعة عاوز يلعب كورة – ما تقعدوا تكلفتو ساكت.
المريخاب طبعا عاوزين يغنوا للعجب اغنية (العجب حبيبي) عشان يعزفوا ليه على اوتار العاطفة دي – والعجب ما تشوفو طولو دا.
عشان الحكاية تظبط ..وتجي في نفس الحتة – وانتوا بعدين قارنوا الحكاية براكم – شوفوا الحاصل واحكموا بي نفسكم – ما تقعدوا تتنكروا فينا (زي بيت الاجار).
هل منعو القلم يكتب اسمك
وهل منعو الدرر تضوي كبسمك
وهل منعو الحرير يشبه جسمك
زاد غلبي فى قلبي موضوع رسمك
ياخفيف الروح منعوك اهلك
عشان كدا نحن ح نكتب ونكتب عن فيصل العجب ..(هل منعو القلم يكتب اسمك)..عشان تعرفوا نحن ما بنتكلم ساكت.
ونحن والله – اي حاجة عندنا بي نظام.
ناس مزمل ابوالقاسم وسلك ومعاوية الجاك ...لو عاوزين يعملوا لينا فيها الكورة اصلها كدا ...واي بداية ليها نهاية ...والتنظيرات البنعرفها ديك ...بنقول ليهم طيب انتوا كنت وين وقت هيثم مصطفى شطبوه من الهلال؟.
ما كان تقولوا كلامك دا.
نحن غايتو زي ما كتبنا عن هيثم مصطفى ...واعترضنا ح نكتب عن فيصل العجب ...(اصلو الحتة دي ما عندنا فيها خيار).
الحمدلله موقفنا واحد.
وما في زول بقدر يقول لينا ما تكتبوا في الموضوع دا ...يعني مجلس الصحافة ما بقدر يمنعنا في الحتة دي.
ح نكتب عن العجب لمن يقتنع.
هل منعوني اجيب ذكرك
وهل منعوني انظم شكرك
اسعفنى وراجع فكرك
انا مظلوم من اهلك ومن فكرك
ياخفيف الروح منعوك اهلك
بالمناسبة اغاني الحقيبة من اسرارها انك لو فتشت فيها ..اي موقف يمر بيك ..في اي جانب بتلقى ان اغاني الحقيبة لم تتجاوز هذا الموقف.
هسع عليكم الله (منعوك اهلك) دي ما بتنطبق على فيصل العجب.
ما تقعدوا تتلفتوا لي كدا زي (البنابر) قدام ستات الشاي ...وقت يكون ما في زبائن.
في اغاني الاهل ...والزعل والمنعة – طبعا لا يمكن ان نتجاوز اغنية هاشم ميرغني التى كبتها عزمي احمد خليل (عشان اهلك بخليك).
وافتكر ان الاغنية دي ممكن يغنيها الامين البرير رئيس نادي الهلال.
عارفين ليه؟.
ما تقعدوا تتلفتوا لي كدا ..زي الموبايل الفاضل فيه خط واحد.
البرير اي لاعب قال كان بيلعب في المريخ ما عاوزو ...(المعني عشان اهلك بخليك).
كفاية علينا الشغيل.
الشغيل مسكين وقت جاء الهلال عملنا ليه (121) كورس.
الطريف في الامر ..ان نصر الدين الشغيل قال ان اجمل ايام حياته هو يوم توقيعه في كشوفات الهلال.
شفتوا الكلام دا كيف؟.
والشغيل يا جماعة ما قاعد يكضب ..زول واضح وصريح ..وكشف عن احساسه الحقيقي ...هو سعيد جدا في الهلال لدرجة ان الشغيل الان بحمد الله على اليوم الشطبوه فيه من المريخ.
العجب طبعا لو جاء الهلال عاوز ليه (213) كورس – عشان العجب دا قعد في المريخ كتير.
يعني (16) سنة في المريخ ...(121) كورس ما بتشيل لينا (ترسبات) الوصافة القديمة.
(71) كورس ساكت في صحبتو لي بلة جابر.
دي غير مزاملتو لي موسى الزومة.
غايتو لو العجب دا جاء الهلال ( قلت لو – ما تقعدوا تتلفتوا لي كدا)...لو جاء الهلال ح ادور ليكم فيه (كورسيات) لمن يبقى (رونالدو).
لمن يصغر (10) سنوات...ويبقى زي العود.
كمان نحن بنلعب في الهلال.
نعود الي (عشان اهلك بخليك) الاغنية التى يتغني بها الامين البرير لي اي لاعب قادم من المريخ.
كتير الدمعة فوق عينيك تشوفيني وتخبيها
تخافي علي اشيل همك عيونك تحكي بالفيها
وقدر مايقولوا ليك عني عشان ريدتنا تنسيها
تداري الآهه بالبسمة ريدتك لي تزيديها
دائما دا المبكيك عشان اهلك بخليك
غريبه نعيش زي الاغراب وما نتهني بالريدة
وكل ما نشتل الافراح تجي الاقدار تمد ايدا
شفتوا كيف؟.
قدر ما قلت ليكم نحن اي حاجة عندنا بي نظام ما بتصدقوا.
بعد كدا اعمل ليكم شنو – عليكم الله.
اشغل ليكم (كدا كدا يا ترلة وقاطرها قندراني).
ملحوظة : احسن نقيف هنا.
هوامش
الامين البرير دا كلموه.
قالوا ليه بكرة (السيستم) بتاع الفيفا بقفل الساعة 12.
12 ودقيقة ما بنفع.
عشان تكونوا عارفين.
وما تقعدوا تتغالطوا فينا ساكت.
الشيء دا يا البرير بقفل بكرة.
وبعد السيستم ما يقفل (موية فول) ما بتلقوها.
خلاص شطبنا زي ما بقول الرشيد علي عمر.
ناس المريخ لو جابو (اديكو)...مفروض طوالي يفتحوا ليه محل انبوبات غاز.
يعني عاوزنو يعمل ليكم شنو؟.
اديكو دا اكبر من العجب بي اربعة شهور.
اوليفيه من الكبر ...قالوا ليك بعد سبعة ما بشوف.
لا بشوف لا بسمع.
زولكم دا عاوز ليه زول يجيبو التمرين...وزول يرجعو.
قلت ليكم ما بشوف.
غايتو الكشافات جاءها زول.
الحضري براهو قال عمرو (42) سنة.
ويقولوا ليك العجب كبير.
الحضري مع الكبر ...كمان بدلع ...وبعمل اي حاجة في المريخ.
ولا بجامل.
حكاية مدرب الهلال دي الظاهر عليها ح تبقى مسلسل تركي.
بالمناسبة حسام حسن اتكلم عن مفاوضات الهلال معه من اجل قيادة الهلال فنيا.
وقد تحدث عن ذلك مساعده طارق السعيد.
يعني مدرب الهلال العربي ربما يكون حسام حسن.
يا البرير الدورة التانية قربت تنتهي ...انتوا عاوزين تجيبوا لينا مدرب متين؟.
اوعكم تكملوا لينا الدورة التانية بي احمد آدم.
موضوع زي دا ما بخارج معانا.
حسن كمال ذهب الي المريخ – نتمنى مالك.
عاوزين لينا مفاجأة وطينة كدا في اخر يوم.
ان شاءالله مفاجأة (معتزلة).
عاجل : عصام الحاج دا في اي لحظة ممكن يمشي مريخ الفاشر.
