· الوزير الطيب حسن بدوي وزير الشباب والرياضية بولاية الخرطوم ، ووزارته مشكورين (ما يجوكم في كعب) استقال جمال الوالي من رئاسة مجلس ادارة نادي المريخ ومعه عدد من اعضاء مجلسه...منحوه (15) يوم – المهلة القانوينة لسحب الاستقالات. · وهاك يا تحانيس...(تقوم بينا العربية تودينا للسادة – العربية).
· مشوا ليه في البيت – وقعدوا يحنسوا فيه ..ودعا عصام الحضري من القاهرة ان تعتصم جماهير المريخ امام منزل جمال الوالي حتى يعود الوالي الي رئاسة نادي المريخ.
· كمان الحضري عاوز يجيب لينا (ميدان التحرير) في شارع عبيد ختم.
· السيد الوزير المحترم (بتاع المؤتمر الصحفي الذي حل فيه مجلس الهلال المنتخب) كان مقيّل عديل في بيت جمال الوالي – يحنس في الوالي ..ويتجرس من اجل العودة ، ويستجدي من اجل ذلك.
· الوزير كان كل يوم بشرب (شاي المغرب) في بيت جمال الوالي ...اجلالا وعملا بمبدأ (التحنيس).
· يا جمال الوالي عليك الله ارجع لينا.
· يا جمال الوالي نحن ما بنعيش من غيرك.
· يا جمال الحقنا وانجدنا.
· الوزير المحترم خلى وزارتو (لو عندو وزارة) واتفرغ لتحنيس جمال الوالي من اجل العودة.
· بعدين مجلس الهلال هذا ...الزول الوحيد الذي كان شغال فيه هو الامين البرير..معقولة تشيل الامين وتجيب ناس كرار التهامي الما شغالين.
· دا كلام شنو؟.
· واضح ان (السلطة) لا تريد للهلال ان يتقدم – فكلما حدث استقرار في الهلال ومشت الامور الي الامام تظهر المفوضية والوزارة عشان ترجعنا تاني للصفر.
· ديل ما فاضل ليهم إلا يجيبوا هاشم ملاح رئيس للنادي.
· دا الفضل بس.
· يعني نحن ح نظل في هذا الوضع ..استقالات وطعون ..ومحاكم.
· الاكيد انهم لا يريدوا للهلال ان يتقدم او يمشي الي الامام ..فكلما شمينا العافية ..المفوضية والسيد الوزير رجعنا تاني الف خطوة الي الوراء.
· غير هذا العمل (والايادي الخفية) التى لا تريد للهلال الاستقرار والديمقراطية ..والمضى قدما نحو اهلية الحركة الرياضية ...نجد ان ما جاء به الوزير شيء غير قانوني وغير اخلاقي كمان.
· لا يعقل ان ينتظر الوزير السيد الامين البرير ريئس نادي الهلال يسجل ويعمل ويقاتل وحده – ثم يقوم يحله ..وعندما يكون لجنة تصريف ..يختار التهامي وكرار وبحر ..ويبعد الامين البرير الذي كان اكثر المجتهدين في المجلس ..وكان على الاقل يستحق ان يكمل دورته التى تبقى لها شهور قليلة.
· سوف ندخل لفترة اخرى من الطعون والصراعات القانونية وعدم الاستقرار ...وكل هذه الفواتير سوف يدفع تمنها الهلال.
· ما جاء به الوزير ليس بعيدا عن ما جاء به عبدالفتاح السيسي الذي عزل رئيس الجمهورية المنتخب.
· تخيلوا وزير الدفاع عزل رئيس الجمهورية ..ثم سمّوا ما قام به (الجيش) ثورة ثانية.
· اذا كان ما فعله السيسي هو (ثورة ثانية)...طيب الانقلاب العسكري يكون شنو؟.
· كان يمكن من اجل الهلال ان نقبل من الوزير ان يحل مجلس الهلال ايام الصراعات والاعتصامات والخلافات التى كانت مشتعلة في الهلال.
· لكن الان ..البرير ومجلسه تبقى له فقط (5) شهور – يبقى مرفوض هذا الذي فعله وزير الشباب والرياضة بولاية الخرطوم.
· لجنة تسيير المريخ كونها الوزير نفسه من (17) لورد وبعد مشاورات ومناقشات وتحانيس ..ليس مع اعضاء اللجنة وحدهم بل مع كل قطاعات مجتمع المريخ كله.
· الوزير (ذاتو) عندما جاء للهلال حل المجلس في المؤتمر الصحفي وكون لجنة التصريف في نفس اللحظة.
· بالله دا كلام.
· الهلال صاحب القيمة الاكبر ...والارث والحراك الديمقراطي والعمل الاهلي يحل الوزير مجلسه بهذه الطريقة (الصبيانية).
· اسوأ من هذا ان يكوّن الوزير لجنة تصريف تلتها من قدماء اللاعبين.
· هذه اللجنة لن تسيطيع تصريف امور الهلال (تمرين واحد)...خاصة اذا استقال منها ود المامون.
· يا جماعة – الله عرفوها بالعقل ..ولجنة تصريفكم تلك ..سوف تفشل في اول يوم.
· الخطوة التى قام بها الوزير غير قانونية ...والامين البرير الذي كافح وناهض الكثير من القرارات قادر على ان يعيد الامور الي نصابها الطبيعي.
· البرير خبر العمل القانوني ..وعرف طرقه وكسب الكثير من الجولات داخليا وخارجيا ....والذي يكسب في (لوزان) وتنصره الفيفا قادر على ان يكسب داخليا ...ما تفعله الموفضية والوزارة في الهلال ..اشبه بالذي يحدث في ملجات الخضار ..او سلخنات الابقار.
· اي خطوة غير قانونية او غير شرعية في الهلال مرفوضة ..والقانون عندنا مقدم على كل الاشياء ..وديمقراطية الهلال وشرعية مجلسه المنتخب سوف تأكده المحاكم.
· فقط نتمنى ألا يكون ذلك على حساب استقرار الهلال ..وموسمه الذي بدأ بقضية هيثم مصطفى ..والاعتصامات والاستقالات ..ووصلنا في منتصفه الي ان يحله الوزير.
· واضح ان السيد الوزير – مؤتمره الصحفي ذلك ..ما فيه اي شيء غير (موية الصحة) التى كانت في المنصة ..وقد كان السيد الوزير كلما يتذكر ان رمضان غدا ...يهرع الي قوارير المياه.
· هذا كل ما خرج به مؤتمركم الصحفي هذا.
· والهلال ..الله يشوفو بس ...تحاربه السلطة ...ويتعارك عليه اولاده ..وتختلف فيه الاراء.
· الله يكون في العون.
· على ما يبدو ان السيد الوزير يريد ان يقدم هذا الموسم كاملا الي اللوردات.
· (17) لورد ما كفوهم ...قاموا عينوا ليهم (ربع كليو) لورد في لجنة من اجل تصريف شئون الهلال.
· ملحوظة : بالطريقة دي الخرطوم الوطني ممكن تشيل الممتاز.
هوامش
· الهلال لو طار من كأس السودان بعد العملوا الوزير دا ما تستغربوا.
· انتوا الوزير دا (جبهة ثورية).
· جبهة ثورية شنو؟.
· الجبهة الثورية ما بتعمل كدا.
· دا شغل مؤتمر وطني عديل كدا.
· لو فريق الخرطوم الوطني اتقدم ...ممكن الوزير يحل مجلس الخرطوم ..ويجيب ليه قدماء لاعبين عشان يصرفوا اعمال المجلس.
· دا شغل بتاع (تفتيت).
· تفتيت عديل كدا.
· لكن الهلال في كل الاحوال – والله لو خليتو بدون مجلس ما بتجيه عوجة.
· الجماهير هى التى سوف تحمي الهلال وسوف تدعمه.
· نسأل الله بس ان يتوفر استقرار كافي للهلال.
· فقد ظل الهلال طوال ثلاث مواسم ..نعرض لهذه الهزات ..والصراعات والحفر.
· حفر من جوة ...وحفر من برة.
· الامين البرير ما بخلي حقو.
· وسوف يعود بالقانون.
· دي لخبطة ساكت.
· معقولة وزير يتعامل بمثل هذه الرعونة ...يجر ليه ورقة وقلم ويقطع ليه اسماء من رأسو ..ويقول دي لجنة تصريف الهلال.
