* كامبوس قال : (سيرجو في كل مباراة بيجيب قون) .. * ونحن نقول : (في وجود كامبوس في كل مباراة الهلال بيجى فيهو قون) .. * على كامبوس أن يلتزم الصمت حتى يُخلص فترته بسلام .. * كامبوس ده يا عاطف النور اتكلمو معاهو وقولو ليهو الأيام الجايه دى ما أيام تصريحات وتنظير .. * عشان ما يملانا فقر ساكت .. * جاي علينا رمضان وإحنا في رمضان الما بنريدو لو جاء فطر معانا بندس منو (البلح) .. * يلزم الصمت ويمسك لسانو عليهو .. * الأيام الجاية دى أيام (خم الرماد) .. * وخم الرماد بمفهوم الشارع (حرام) .. * الناس ممكن تخم الرماد في جو عائلي بسيط وعميق .. * يخمو الرماد ب(المشوي والمُحمر والمُسلق) وباقي الطيبات .. * ولكن خم الرماد بشكله الآخر مرفوض * الذى يستقبل رمضان بمعصية يكون قد أغضب الله في أيام غضب الله فيها يكون مجلجل .. * الهلال قبل سفره إلى المعسكر الخارجى وقبل مباراته أمام فيتا يحتاج لخم الرماد * والهلال في هذه الأيام الطيبات يشتهي (الحمام) .. * لحم الحمام يبدو هو الأنسب ليخم به الهلال الرماد .. * ولحم الحمام موجود في أم درمان العرضة جنوب .. * أفريقيا دى تلفها برجل واحدة ما بتلقى ليك حمام زي حمام العرضة .. * ولذلك نقترح أن يلعب الهلال مباراة وديه مع المريخ على أن يتم تخصيص دخلها لصالح تحفيظ الأطفال القرءان الكريم في الشهر الفضيل .. * نحفظ الأطفال القرءان حتى لا يخلط الجيل الجديد بين كلام الله والأمثال الشعبية .. * بنقترح كده .. * وأى زول طبعاً حر في (مقترحاتو) .. * قال ليك المريخ يهدد بالانسحاب من الممتاز .. * ويعنى شنو يعنى ؟ * قول انسحبو .. المشكلة وين يعنى ؟ * معتصم جعفر عامل قعر ورأس للمريخ ساكت .. * الدورى الممتاز ما واقف على المريخ * لو دايرين ينسحبو عليهم يسهل وعلينا يمهل .. * مريخ الفاشر ممكن يحل محل مريخ العرضة .. * حالياً مستوى مريخ الفاشر قريب جدًا من مستوى مريخ العرضة .. * تقريباً المستوى واحد .. * ما في فرق بين المستويات خصوصاً بعد أن سجل مريخ السلاطين فيصل العجب .. * بقى ما في فرق بين المريخين .. * العجب كان في مريخ العرضة ومشى مريخ السلاطين .. * ومحسن سيد كان في مريخ السلاطين وجاء مريخ العرضة .. * وكذلك إسماعيل صديق .. * يعنى الفرق بين المريخين هو (عزو) .. * مريخ العرضة رئيسو عزو ومريخ الفاشر رئيسو ما عزو .. * ده بس الفرق .. * عشان كده مريخ واحد يكفى .. * هو عليك الله يا معتصم جعفر الناس ديل أسبوع كامل ما قادرين يختارو ليهم كابتن معقولة تصدق ينسحبو ؟ * والله المريخ لو انسحب (شنبي ده يقوم في الظلط) .. * مريخ شنو البينسحب يا معتصم جعفر ؟ * المريخ ده ما بيقدر يتخذ قرار أصلاً .. * قلت ليك ديل كابتن ما قادرين يختارو * بالقرعة ما قدروا يختارو كابتن .. * الهلال طلب التأجيل والتقديم والتأخير لأنو مشغول ببطولة أكبر من تفكير أهل المريخ .. * زمان المريخ لما يصل دور ال(32) في الأبطال الاتحاد العام بيعلن حالة الطوارئ * أى حاجة يقول ليك تقديرًا لظروف المريخ الأفريقية .. * مباراة تكون معلنة في مدنى يجيبوها الخرطوم ويقول ليك تقديرًا لظروف المريخ الأفريقية .. * بله جابر يرفس اللاعب وينط فيهو جوز والحكم يبتسم معاهو تقديرًا لظروف المريخ الأفريقية .. * في الزمن داك أى حاجة يقول ليك تقديرًا لظروف المريخ مع ملاحظة أن المريخ في دور ال(32) .. * أى حاجة مربوطة بظروف المريخ .. * الطماطم في السوق لو سعرها زاد يقول ليك تقديرًا لظروف المريخ .. * هسه لما الموضوع بقى يخص الهلال الجماعة حرقهم .. * في زول قال ليكم اطلعوا من التمهيدى؟ * في زول قال ليكم نظمو (حوض البط) وطيرو من دور التمانية ؟ * مالكم ومال الهلال ؟ * الهلال ح يسافر ويعسكر ويلعب في المجموعات وإنتو لو ما عاجبكم إنسحبوا * دايرين البرمجة تكون زي ما هى لأنكم فاضين شغلة .. * قاعدين ساكت لا عندكم مجموعات ولا أبطال .. * والهلال ما بيلعب واليحصل يحصل .. * أى زول بيرقد على الجهة البتريحو .. * نحن ما بنلعب لأننا مشغولين بهموم تمثيل البلد والمحافظة على اسم السودان * عليك الله إنتو ما بتخجلوا ؟ * وكت طرتو من التمهيدى تساعدونا ولا تقوموا تعاكسونا ؟ * حاجة تكسف .. * مرة واحدة اعملو ليكم موقف وطني .. * أنا والله إتوقعت جمال الوالى (عزو) يتكفل بموية الصحة لنجوم الهلال لحدى ما دور الأبطال يخلص كمساهمة منه لممثل الوطن .. * لكن واضح إنو ما فيش فايدة .. * المريخ وزنو خفيف وإذا انسحب مريخ الفاشر قاعد وإذا ما انسحب فمصيره الوصافة .. * لكن أنا شايف حقو تنسحبو عشان ترتبو أموركم وتختارو ليكم كابتن برواقه كده .. * رواقه ب(الشاء) .. * و..و.. * واتعلمنا من ريدا ...(أكل الفشار) ..