* بيقولوا : (العز اهل) .. * وزول ما بيعز اهلو معناها ما عندو عزيز في دنيتو .. * وصلاح ادريس لما سجل لينا في الهلال (ولد اخو) مهيد خالد ادريس كان قصد يعز اهلو .. * مهيد قعد في كشف الهلال سنة قضاها كلها شراب موية صحه لحدى ما اتشطب .. * شرب موية الصحة لكن في النهاية صلاح ادريس عز اهله .. * وحسب ظني ان تسجيل مهيد في تلك الفترة كان القصد منه (عز الاهل) .. * هو يعز اهلو والهلال يحرق حسب فهم الارباب الوكت داك .. * ودى طبعا من سيئات صلاح ادريس الذى ساعود له غدا بأذن الله .. * المهم .. صفقة مهيد كانت من اجل (عز الاهل) .. * ولكن .. * سيرجو ده سجلتو لشنو يا الحاج عطا المنان ؟؟ * لو بحث الهلال في موضوع سيرجو سيجد ان كامبوس رشح سيرجو حتى (يعز اهلو) .. * أنا احلف سيرجو ده يا ود خالت كامبوس ويا كمان متزوج اختو .. * العز اهل .. * قرار إنهاء عقد سيرجو سيكون من مصلحة الهلال وسيجعل الحاج كبيرا في النظر .. * والحاج الذى كاد ان يتلاشى في نظر الجمهور عقب فشله الكبير في ملف التكميلية يحتاج لاصدار قرار ينهى به علاقة سيرجو بالازرق .. * ده ولد عاطل زي المصريين بتوعين الكاشير الجابهم الخندقاوى .. * الخندقاوى ده من تصرفاتو دى بيشبه المريخ .. * الزول ده جائز يكون شاف الوالى في المريخ ما بيديهو فرصة قال احسن اقول انا هلالابى .. * الخندقاوى داير يعز المصريين على حسابنا نحنا .. * داير يجيب عطاله يسجلهم عشان جمهور الهلال يموت بالضغط والسكرى .. * نرجع ونقول : * العارف عزو مستريح .. * طبعا في ناس الواحد بيكون عارف عزو ومستريح .. * وديل زي الغزال مهند الطاهر .. * مهند عارف عزو عشان كده مستريح من حكاية (رسالة الواتس) ، وجماهير الهلال تضحك على سذاجة من كتب الرسالة ونشرها .. * وفي ناس الواحد مستريح لكن ما عارف عزو .. * وكمان في واحدين الواحد عارف عزو لكن ما مستريح .. * دكتور كمال شداد عارف عزو لكن ما مستريح .. * لن يستريح شداد إلا عندما يشاهد منتخب السودان في كأس العالم .. * وهذا يعنى ببساطه ان شداد لن يستريح .. * خليك زي معتصم جعفر يا بروف .. * خليك زي جمال الوالى .. * قال : (العارف عزو مستريح) .. * طيب والما عارف عزو ؟؟ * جمال الوالى في لحظة (زنقة) فتح المصحف الشريف وشال كلام ما موجودة اصلا في المصحف .. * كلام الوالى جابو من بره ودخلو المصحف وتانى شالو من المصحف وهو في الاصل غير موجود في المصحف .. * وهذا الذى فعله الوالى هو خطأ شنيع جدا .. * نحن نفترض حسن النية ونقول ان جمال ما كان يقصد ولكن لماذا لم يعتذر .. * عموما حتى لا نشارك في الاثم لن نتبحر فيما قاله الوالى لدى إستضافته بقناة (قوون) .. * العارفو عزو مستريح .. اصلا هى مقولة لا تنطبق على جمال الوالى .. * كيف يكون جمال الوالى مستريح وفريقو طاير من بطولتين في ظرف شهرين ؟؟ * اللهم إلا يكون الطيران يمثل عز بالنسبة للوالى .. * مكسين الوالى .. * طلع بره الشبكه بسبب عصام الحاج .. * غايتو جنس غايتو .. * معسكر الهلال القادم إذا كانت نتائجة مثل نتائج معسكر القاهرة الاخير فلاداعى له .. * الهلال امام تحدى تاريخي يتعلق بمستقبله في الابطال .. * وامل الهلال ضعيف وسيقوى الامل في حال نجاح الاعداد وتجهيز بدلاء في حجم الاساسين .. * الهلال فشل في التسجيلات عشان كده ما عندو سكه إلا ينجح في الاعداد .. * ومشكلة الهلال لن تكون على الصعيد الافريقي بل سيعانى الفريق محليا في الدورة الثانية إذا لم يتحسب لذلك جيدا .. * الحاج عطا المنان ومجلسه تفكيرهم الان ما معانا .. * الناس ديل بقو مارقين عشان كده لا سجلو لاعبين ولا اعادو قيد اللاعبين الذين اوشكت عقوداتهم على النهاية وبالتالى لن يهتموا كثيرا بقصة المعسكر .. * وهنا ننتظر دور الاقطاب .. * ورينا شطارتك يا الخندقاوى .. * إتكفل بالمعسكر بدل تقضيها صور ساكت .. * نجاح المعسكر سيكون كلمة السر في مشوار الهلال المتبقى على الصعيدين المحلى والافريقي .. * ونجوم الهلال عليهم ان يستفيدو من المونديال .. * قال ليك في لاعب في المريخ جابو ليهو كرت الجزيرة مشى بدلو بكروت اسكراتش .. * عرفتو الناس ديل بيطيرو قبل الحمام ليه ؟؟ * كل العالم سيستفيد من المونديال إلا لاعبو المريخ ومعاهم سيرجو .. * وفي النهاية العارف عزو مستريح .. * والعارف عزو يكلم الما عارف عزو .. * و..و.. * وعزار علينا شالو ...(شاحن الموبايل وإتخارجو) ..
