الاحتمالات هنا بتوقفك على امشاط اصابعك عشان تسمّع ليك في السخانة دي قصيدة (دجاجي يلقط الحبّ)...ويجري من ناس الضرائب """"""""""""""""""""""""""" البعد الفلسفي العميق يبدأ من (اتلملم سحابي،عارفو ولابصب)..ياجماعة الله في (قنوع) اكترمن دا """""""""""""""""""""""""""""" صلاح ادريس يمتلك خبرة جيدة...وهو زول (شفت)...وعينه فاحصة ..لكن عنده مشاكل تقيلة ..واخطاء لااظنه تخلص منها """"""""""""""""""""""""""""""""""" اشرف الكاردينال عنده الطموح الكبير..وهو لم يأخذ نصيبه في التجريب في الهلال ..لكن انفعالات الكاردينال وعدم خبرته يمكن ان تشكل خطرعلى الهلال """""""""""""""""""""""""""""""""""""""" • فقه (الاحتمالات) في السودان هنا يضيق حد انك تفك رباط (الحذاء) وانت تستمع للخيارات التى هى امامك. • تفتح الشباك – وتطلع من جلدك ...(الواطة سخنة) ومواصلات مافي. • ضاقت ولما استحكمت حلقاتها قلنا يا رب (مطرة). • الاحتمالات هنا كلها (حزينة)...خياراتهم كلها بتودي التوج. • وتوقفك على امشاط اصابعك عشان تسمّع ليك في السخانة دي قصيدة (دجاجي يلقط الحبّ)...ويجري من ناس الضرائب. • الاحتمالات هنا كلها بي كترتها واحد. • تمشي تفحص الملاريا ..الطبيعي هنا نتيجة الفحص تكون يا في ملاريا يا كمان ما في ملاريا. • انا عمري ما شفت لي زول مشي يفحص الملاريا – الدكتور قال ليه : (ما في ملاريا). • ليه وقت في احتمال تكون ما في ملاريا بقولوا لينا دائما : (طلعت ملاريا)..يقولها ليك الفحيص هكذا (مشدوقا) وكأنه اكتشف الذرة. • اذن كل الاحتمالات ملاريا – ملاريا – لدرجة ان الناس بقت ما بتفحص ..الواحد من يشعر بيها كدا يمشي الصيدلية يجيب ليه حبوب او حقن زيتية. • تفحص ليه ..وكل الاحتمالات المطروحة (ملاريا). • خلوها الملاريا – اديكم (احتمال) تاني . ما عندو اي علاقة بالاحتمال الاول. • الليلة ح اسل روحكم ب (الاحتمالات) في السخانة دي. • شهر رمضان. • رمضان مالو كمان؟. • شهر رمضان ممكن يكون (29) يوم – وممكن يكون (30) يوم. • دي خيارات طبعية وفلكية ومنطقية. • تتخيلوا عمرنا ما صمنا رمضان (29) يوم. • جماعتنا ديل عادي جدا يقولوا ليك يوم 29 رمضان : (عليه فان يوم غد هو المكمل لشهر رمضان 30 يوما). • ليه ما قاعد يكون رمضان (29) يوم. • ليه طالع (30) يوم على طول..(ناسنا ديل ما بعرفوا يتحروا الرؤية) عشان كدا دائما بصومونا غلط – ويفطرونا غلط. • خلوه رمضان. • اذا اشتريت (بطيخة) وحملتها على كتفك (وهنّا) ساعة ونص الى ان تصل البيت - فان احتمالات هذه البطيخة يجب إلا تخرج من احتمالين يا بيضا يا حمراء. • وهذا (فهم) كل البطيخ في الدنيا. • ودا منطق البطيخ في الدنيا كلها. • لكن احتمالات (بطيخنا) هنا يا بيضا يا بيضا. • حمراء ما في. • جهة ماء لعبة في الاحتمالات وغيبت (الحمّار) من ان يكون احتمالا وانت تفتح (البطيخة). • قلت ليكم الناس ديل ضيقوها شديد..ما صدقتوني قعدتوا تغالطوا. • دائما بختاروا لينا في الاحتمالات – الاحتمال الاصعب. • بشوفوا اصعب احتمال شنو؟..وبعصروا عليه. • اقول ليكم حاجة تانية – عشان ما تقولوا انا بتكلم ساكت. • حاجة كلكم بتكون حصلت ليكم. • لو كنت مسافر برة البلد. • ومشيت تحجز من وكالة سفر. • موظف الحجوزات بقول ليك في طيارة الساعة عشرة صباحا وفي طيارة السادسة مساء. • لو كنت مستعجل وعاوز تسافر بدري ولاحق ليك موضوع ضروري وقلت ليه : خلاص احجز لي في طيارة الساعة عشرة. • الموظف بعاين في جهاز الكمبيوتر الذي امامه وبقول ليك : (والله طيارة عشرة دي مليانة – ما فيها طريقة). • لو كنت كمان عندك حاجات ما كملتها وعاوز تتأخر شوية ..وقلت لموظف الحجوزات احجز لي في طيارة الساعة السادسة مساء. • موظف الحجوزات بعمل نفس الحركة بعاين في شاشة الكمبيوتر ويقوم يقول ليك : (معليش طيارة السادسة مساء مقفلة – ما فيها طريقة حجز). • شفتوا المعاكسات دي كيف؟. • يشوفوا الاحتمال الاسوأ..ويجبوه ليك. • خلوا دا كلو. • مرات بجي صاحبك من برة ..يقوم يجيب ليك هدية. • يفتح الشنط ويقول ليك جبت ليك قميص. • يطلع ليه (قميصين) كدا ويقول ليك اعزل. • تصوروا (القميص) البعجبك وتعزلو بطلع عليك ضيّق. • تطضر تشيل (الاحتمال) التاني – غصبا عنك. • القميص خلوه. • يمكن الكلام دا ما يقع ليكم. • اديكم (نظرية) تانية. • مرات بتمشي ليك (حفلة). • حفلة عرس عادية. • تقعد ورا عشان تشوف كويس. • في الفاصل التاني ..(ما عارف ليه الفاصل التاني بالذات) بجن بنتين يقعدن قدام. • يكونن اخر ادب وتهذيب. • اصلو ما فيهن كلام. • تفكر طوالي في العرس ..(خاصة اذا كنت مغترب وجيت جديد في البلد). • تقوم تقول للزول الجنبك ...البنت السمراء ديك بنت منو؟. • يقول ليك ياتو فيهن ..الاتنين سمر. • تقول ليه : اللابسة طرحة خضراء ديك. • يقول ليك الاتنين لابسات طرح خضر. • انت مالك مصعبة كدا. • البنت الشايلة (جلاكسي فور) ديك. • يقول ليك الاتنين شايلات (جلاكسي فور). • بس عاين ..البنت الوقفت ديك. • يقول ليك الاتنين وقفن. • يا جماعة دي يحلوها كيف؟. • طيب يا سمعة انا بمشي اقيف ليك جنبها ..وانت شوفها وقت اقيف جوارها دي بنت منو؟. • تمشي تقيف جوار البنت وتجي راجع ..صاحبك سمعة يقول ليك انت بتسأل من البنت الكنت واقف شمالها وإلّا الكنت واقف يمينها؟. • يا ود الناس ..مالك عاوز تبقى لي زي ناس المحلية ..تمشي ليهم عشان تدفع رسوم العتب ..يدفعوك رسوم القميص اللابسو. • اسمع يا سمعة ..البنت السلمت على الحاجة ديك. • دي (تهاني). • تهاني منو؟. • تهاني بنت عمك جار النبي. • بالله – ما شاءالله – متين البنت دي كبرت كدا ...والله البنت دي وقت طلعنا من البلد كانت شافعة ساكت. • لكن انت بتسأل منها ليه؟. • والله يا سمعة عاوز اتقدم ليها رسمي..عاوز اخطبها يا زول...عاوز اعرس. • لكن. • لكن شنو يا سمعة؟. • لكن البنت دي (مخطوبة) – خاطبها ود عمها ..لكن البنت القاعدة جنبها دي لا مخطوبة ولا مرتبطة ولا متكلمين فيها. • يعني في العرس ..عاوزين تشوفوا لينا الاحتمال التاني. • معاكسات – معاكسات على طريقة (مجازفات – مجازفات) لربيع طه. • خلوه موضوع العرس دا – يمكن يكون عندكم فيه رأي. • انت مرات بتوقف ليك عربية امجاد. • دي فيها حاجة. • توقف ليك عربية امجاد عشان ماشي مشوار. • بتاع الامجاد بعد ما يقيف يقول ليك انت ماشي وين؟. • تقول ليه ماشي (الجريف غرب)..يقول ليك معليش لو كنت ماشي (الصافية) كنت سقتك...(تقول سايقك ساي). • بتاعين امجاد عاوزين يحددوا ليك المشوار المفروض تمشيه. • شفتوا نحن وصلنا وين؟. • في احتمالات اسوأ من كدا. • ادخل ليكم في الموضوع. • محمد النصري من كلمات عطا الكنيبلي غني اجمل اغنياته ..عندما عرض للعبة الاحتمالات تلك. • غني النصري (كلهن احتمالين)..فتمددنا شهقا لهذه الاحتمالات ..وقلنا نطلع من الضيق دا شوية ..وقت في احتمالين. • برضو حاجة كويسة يكون في احتمالين في ظل الاحتمال الواحد الماسكنو علينا الجماعة ديل. • وقت في احتمالين برضو (انجاز). • لكن محمد النصري صدمنا صدمة مبالغ فيها عندما عرض الاحتمالين على هذا النحو. • النصري يقول بعد هذه الشهقة والانتظار للاحتمالات : (اتلملم سحابي – عارفو ولابصب - كلهن احتمالين - ياشقا ياشقا). • عليكم الله في صدمة في البلد اكتر من دي ..(يا شقا يا شقا). • نمشي وين نحن – والشقا يقالد فينا متل (هدوم العيد). • قابع في خطواتنا متل (النعال). • البعد الفلسفي العميق يبدأ من (اتلملم سحابي ، عارفو ولا بصب)..يا جماعة الله في (قنوع) اكتر من دا. • الزول دا من سحابو قنعان. • هو قنعان بي منطق ..(عارفو ولا بصب). • ثم يعرج عطا الكنيبلي الى (كلهن احتمالين يا شقا يا شقا). • بالله عليكم في (احراج) اكتر من كدا. • في (شقا) اغلد من الشقا دا. • وتقولوا لي فكها شوية ...والحياة ما بتساهل ..والدنيا اصلها كدا ..ونحن كلنا بنلعب على احتمالين يا شقا يا شقا. • والله مفروض الزول يشيل (شنطتو) ويفوت. • يطلع من البلد دي – مدام احتمالاتها كلها بقت يا شقا يا شقا. • نحن ساكت تاعبين نفسنا. • ما عاوز ادخل في عرض اغنية النصري نكتفي بهذا المقطع المشحون بالشقا. • لكن شقا جميل من غير شك ..وهو يخرج لنا هذا النص الرائع والجميل. • تذكرت احتمالات محمد النصري تلك (يا شقا يا شقا)...وانتخابات الهلال يتسابق فيها صلاح ادريس واشرف سيد احمد الكاردينال ..(يعني يا شقا يا شقا). • دي يا شقا يا شقا ذاتها البقولوها. • نكتب نقول شنو؟..ونحن ما عندنا خيارات تانية. • لو سقط الكاردينال ..بفوز الارباب ..(دا الشقا الاول). • ولو سقط الارباب ..بفوز الكاردينال ..(دا الشقا التاني). • ما عندنا اي (شقا) آخر. • لو طلعنا من دا بنقع في داك. • عليه الموضوع ما مستاهل..ولا عاوز ليه (قومة نفس). • ما فارقة معانا في حاجة ..قادرين نتعامل مع اي (شقا). • صلاح ادريس يمتلك خبرة جيدة...وهو زول (شفت)...وعينه فاحصة ..لكن عنده مشاكل تقيلة ..واخطاء لا اظنه تخلص منها. • اشرف الكاردينال عنده الطموح الكبير..وهو لم يأخذ نصيبه في التجريب في الهلال ..لكن انفعالات الكاردينال وعدم خبرته يمكن ان تشكل خطرا على الهلال. • وكلهن احتمالين يا شقا يا شقا. • على العموم الجمعية العمومية للهلال قادرة على اختيار (الشقا) الافضل. • هذا طبعا اذا اتخلصنا من كمية (الطعونات) التى قدمت من الشقا الاول في الشقا التاني والشقا التاني في الشقا الاول. • سوف نتجاوز الكتابة حول هذه الانتخابات ولن ننقل للناس هذا (الشقا). • كفاية على الناس الطعون. • ... • ملحوظة : ادخل على الهوامش. هوامش • هسع لو لعب المنتخب السوداني ضد غانا او نيجيريا او الكاميرون ..الاحتمالات المفروض تكون معروضة شنو؟. • الانتصار – والتعادل ...والخسارة. • نحن ح يكون عندنا خيار واحد ...وهو الخسارة. • الهلال في المجموعات يمكن ان يتأهل ويمكن ألا يتأهل. • نخشي ان تكون الاحتمالات عدم التأهل او عدم التأهل. • قدر الهلال اصبح (لجنة التسيير). • يمكن الحاج عطا المنان بسبب تلك الطعون يحكم الهلال (5) سنوات. • سيرجيو واصل اهدافه. • وكامبوس يكسب الرهان تاني. • المباراة الثالثة رسميا على التوالي يسجل فيها سيرجيو. • مباريات الهلال في كأس السودان امام الاهلي الخرطوم والخرطوم الوطني ادخلت الهلال في مأزق حقيقي. • الهلال عليه مراجعة مواقفه. • الحاجات دي ما بنستحملها في البطولة الافريقية. • بشه فتح. • وقت بشه يفتح ما بتكون في مشكلة. • لكن اقول ليكم حاجة. • جماعتنا ديل بطيروا. • متعودين على الطيران. • نحن في انتظار (طيرانكم). • ..... • عاجل : اصابة نيمار دا لو ما كانت في كأس العالم كنت قلت اللاعب الضربو في ضهرو هو (ضفر).