زول يدوه (3) مليارات جنيه لو ودوه اتحاد المهن الموسيقية مفروض يبقى أخطر من محمد وردي """""""""""""""""""""""""" باسكال قالوا ليك من جابوا ليه بكري قال انهوا لي تعاقدي مع المريخ – انا لا بلعب ليكم ولا حاجة """"""""""""""""""""""""""""""""""""""""" عنكبة دا قالوا ليك محسن سيد وقت بكون عاوز يدخلو في آخر (10) دقائق من عمر المباراة – بقول ليه قوم سخن من اول (10) دقائق في المباراة """""""""""""""""""""""""""""""""""""""""""""""" المريخ من (الفلس) عليه بعد ان لقط بكري المدينة كل قروش المريخ – انهى تعاقده مع باسكال """"""""""""""""""""""""""""""" • مرات بتحول ليك (رصيد) بالغلط في رقم غريب. • رقم بتكون قاطعو من رأسك. • تكون قدمت السبعة على الخمسة. • او قدمت الصفر على الواحد. • تضرب لصاحب الرقم الذي تم فيه تحويل الرصيد – تلقى التلفون قفل. • لاحظوا للحركة دي. • حوّل ليك (رصيد) لي رقم (عشوائي). • واضرب مباشرة لصاحب الرقم الذي حولت ليه (الرصيد) – ح تلقاه قفل التلفون طوالي. • ولا بنتظر. • ولا بتفاهم. • في ناس ممكن ما يقفلوا التلفون – لكن بقولوا ليك كلام احسن منو (قفلة) التلفون. • الواحد تضرب ليه. • اول مرة ما يرد. • تاني مرة ما يرد. • تالت مرة يرد. • تقول ليه : لو سمحت انا رسلت لي (رصيد) بالغلط في تلفونك دا. • يقول ليك : رصيد شنو؟. • ينكر ليك (الرصيد) ظاهر وباطن. • تقول ليه رصيد (زين). • يقول ليك لكن رقمي دا (سوداني). • تقول ليه موش رقمك دا ببدأ بي (تسعة). • يقول ليك ببدأ بي تسعة ولّا ببدأ بي اغنية – انا رقمي دا (سوداني). • تقول ليه انا رسلت لي رصيد بالغلط في رقمك دا. • يقول ليك ما وصلتنا حاجة – لكن اول ما يصلني (رصيد) برجعو ليك – ويقفل التلفون على كدا. • في زول تاني تضرب ليه تقول ليه : اسمع لو سمحت رسلت لي رصيد بالغلط في رقمك دا. • يقول ليك قلت شنو؟ - ارفع صوتك ما سامع حاجة. • تقول ليه رسلت لي رصيد في تلفونك دا. • يقول ليك : ما سامع حاجة – اضرب لي تاني. • تقفل التلفون – ترجع ليه تاني تلقى (هذا المشترك لا يمكن الوصول اليه). • يكون مرق برة البلد. • في واحد (شفت) – النوع البكون بصلّح اليوم كلو في (الفول). • يغسل ليه في (طماطمات) ونازل وطالع من الماسورة الى المطبخ. • زول عارف اي حاجة. • يقول ليك انت عارف انا متخيل لي الزول البقول ليك (هذا المشترك لا يمكن الوصول اليه) يتخيل لي كدا الزول دا (روسي). • اقول ليه عرفتو (روسي) كيف؟. • يقول لي ظاهر من (البطارية). • في ناس بقولوا ليهم كلام غريب كدا – ما عارف بيجيبوه من وين؟. • مثلا من الصباح يلاقيك واحد يقول ليك : بكري المدينة ما ح ينجح في المريخ. • ينتفك ليك الموضوع دا من مرحلة الاساس. • ما يخلي ليه (ديك) حايم. • يقنعك لمن (تتفتفت) قدامو زي الحديّة. • تقول ليه : لكن ليه ما بنجح؟. • زول ادوه (3) مليارات جنيه وما ينجح. • والله زول يدوه (3) مليارات جنيه لو ودوه اتحاد المهن الموسيقية مفروض يبقى اخطر من محمد وردي. • يقول ليك بكري المدينة (كهربتو) زايدة ناس الهلال كان عندهم (منظم) في الوسط – بضبط ليك شوية كدا كهربة بكري المدينة. • ناس بشه ونزار حامد ونيلسون. • ما شفت (الشغيل) دا جاء كيف من المريخ واصبح كيف في الهلال. • الشغيل هسع في الهلال بقى زي (الجراح) يلعب ليك الكورة زي ما الكتاب بقول. • تقول فطموه بي (منظم). • لكن في المريخ البضبط كهربة بكري المدينة منو؟. • كهربة بكري المدينة دي تولع ليك الكشافات عديل كدا – (بخت الكشافات). • خلاص يا الهلالاب عاوزين تقبولوا على الولد. • انتوا الزول البتقبلوا عليه ما بنفع تاني. • عليكم الله يا هلالاب – خلوا بكري المدينة يستمتع شوية بي ال (3) مليار جنيه. • ادوه (موسم) زي هيثم مصطفى. • يمين مباراة ما نديه ليه...(خلاص اقنعوا من بكري المدينة). • باسكال قالوا ليك من جابوا ليه بكري قال انهوا لي تعاقدي مع المريخ – انا لا بلعب ليكم ولا حاجة. • المشكلة ما فينا. • قلنا ليكم المشكلة في المريخ – البنظم كورة بكري المدينة منو؟. • بكري المدينة دا في الهلال كانوا بلعبوا معاه (طيارات). • ناس (بشه) قبل ما بكري المدينة كان بستلم الكورة – كان بكونوا قدامو. • ناس كاريكا اسرع من الكورة. • لكن في المريخ (المميزات) دي ح يلقاها وين؟. • المريخ كهربتهم عامة كدا زايدة. • عنكبة دا قالوا ليك محسن سيد وقت بكون عاوز يدخلو في آخر (10) دقائق من عمر المباراة – بقول ليه قوم سخن من اول (10) دقائق في المباراة. • عشان (الكهربة) تظبط شوية. • وناس بلة جابر. • وعلي جعفر. • وبخيت خميس. • ورمضان عجب. • ومجدي عبداللطيف. • هم ديل براهم عاوزين ليهم زول يظبط ليهم (كهربتهم). • ديل مفروض يربطوهم بي حبال. • لا عندهم كورة ولا حاجة. • كورتهم زي كتابة ناس سنة اولى. • بعدين في المريخ ما في احساس بالمجموعة – ما في زول بشيل التاني – كلو زول في رقبتو. • اللعب فردي في المريخ. • ديل النار بزيدوها حطب. • وبكري المدينة بي القروش الدفعوها فيه دا – مع ناس بلة جابر ما بيلعب. • هيثم مصطفى لعب في الهلال (17) سنة – مع (الحفر) العملوه ليه في المريخ ما قدر يلعب. • خبرة (17) سنة ما قدرت تروض تمرد لاعبي المريخ على هيثم مصطفى. • هيثم مصطفى – جمال الوالي استهدفو ليك...خلى اللاعبين. • بكري المدينة بانفعالاته وعدم انضباطه و(3) مليار – تتخيلوا ناس امير كمال ديل بلعبوا معاه. • تلقاهم هسع بعاينوا للقروش الدفعها فيه المريخ شررا. • ما معقول اللاعب في المريخ يعيدوا توقيعه ب (100) مليون جنيه. • وبكري المدينة يجيبوه ليهم ب (3) مليار جنيه. • ليه جايبنو من (اكسفورد). • غايتو الهلال دا صعب بشكل. • الهلال قيمة. • الهلال كبير. • (3) مليار جنيه – إلّا يلعب براهو...ناس قريعتي راحت الدافعين فيهم (100) مليون جنيه الجابرهم شنو يحرقوا دمهم وبكري طالع بالتقيلة. • بعدين يا جماعة المريخ دا اصلا فيه مشكلة اضاعة الفرص. • يعني ما ناقصان (اضاعات). • تقوموا تجيبوا ليهم الضياع الاكبر. • تاني مباريات المريخ عاوزة ليها (صبر). • لو ما عندك (صبر) ما تجازف وتدخل مباريات المريخ. • ديل ح يفقعوا ليكم (مرارتكم). • تاني مباريات المريخ ح تنتهي بهدف مقابل (91) فرصة ضايعة للمريخ. • لكن حكاية الرصيد الاتحول في رقم غلط دا ما وضحتو ليكم. • ما تميت ليكم الموضوع. • ناس الهلال (الفيفا) دي حافظنها حفظ. • وهم عندهم مستندات تأكد توقيع بكري المدينة للهلال ومع (الصور) كمان. • قضية الهلال مضمونة. • ولا عاوزة ليها (محامي). • اقنعوا من ال (3) مليار يا ناس المريخ. • اعتبروها اتحولت في رقم غلط. • ومع ال (3) مليار – ح تكون في (غرامات). • ح تفهموا حاجة. • وقعتوا وما سميتو. • المسألة الآن مسألة وقت – ليس إلّا. • ......... • ملحوظة : الحكومة بضيّع في قروشها في الفاضي. هوامش • بالعقود والاوراق بكري المدينة سوف يعود الى الهلال. • ناس المريخ عاوزين يتحرفنوا ويعيروا اللاعب. • اي نادي كلموه قبل ما يدخل في ورطة ان اللاعب من حق الهلال. • ما تغشوا الاندية ساكت يا ناس المريخ. • فيصل موسى دخل كشوفات الهلال في صمت. • نتمنى له التوفيق والنجاح في الهلال. • فيصل موسى اصلا رغبتو اللعب في الهلال – عشان كدا ما قدر يلعب في المريخ. • الفرق بين بكري المدينة وفيصل موسى – ان الاول وقع في كشوفات المريخ بقيمة مالية فاقت ال (3) مليار جنيه. • اما فيصل موسى لم يكلف الهلال شيئا. • بكري المدينة تنتظره الفيفا. • وفيصل موسى لا. • المريخ من (الفلس) عليه بعد ان لقط بكري المدينة كل قروش المريخ – انهى تعاقده مع باسكال. • بقى ما عندهم قدرة على الصرف دا. • كبوها في بكري المدينة وقعدوا يتفرجوا. • صلاح ادريس وهو رئيس نادي للهلال سابق – يفترض ألا يكتب عن رؤساء الهلال بهذه الصورة. • ويفترض صلاح ادريس بالذات الايامات دي ما يعلق. • يسكت بس. • لو صلاح ادريس عاوز يخدم الهلال فليكن عمليا – ويقدم المحترف اديس واحمد حسن والدعيع للهلال. • وبعدين يتكلم. • لكن زول ما بقدم حاجة للهلال وبنتقد كمان. • بل ان صلاح ادريس في المواسم السابقة دعم المريخ باكثر من لاعب. • وينتظر ان يدعم صلاح ادريس المريخ في هذا الموسم ب (فارس عبدالله). • الحكاية بقت واضحة. • الحكاية بقت ظاهرة. • المريخ مدعوم من اكثر من جهة. • الحكومة نفسها بتدعم في المريخ. • والكاردينال شغال براهو. • يا كاردينال نشوف ح تعمل شنو في هذه التسجيلات. • في التسجيلات ينجح الرئيس او يهان. • والكل ينتظر ماذا بعد صرف النظر عن المعز ومهند وعمر. • الناس بنتظروا في مفاجآت تغطي الفقد الذي تعرض له الهلال. • في ايد الكاردينال يقلب الطاولة لصالحه. • باسكال – مالو فرحان كدا. • جمال الوالي – يا دوب العملية بدأت. • وناس متوكل وصديق علي صالح فاكرين الموضوع (فتح خشم). • ....... • عاجل : جمال الوالي عرف نفسو ما بقدر على الشغل دا – قام اعلن عن قيام الجمعية العمومية للمريخ في شهر ديسمبر....(ما بدري يا ريس)...يا كاردينال اخلص حقك قبل هجرة الوالي الى (لندن) – ناس صديق علي صالح ديل نحن ما بنعدهم.